Ƀuôn hgŭm Đông Ninh Hòa mâo lu klei găl mđĭ kyar bruă tuh tia mkra mjing, ƀuôn prŏng hŏng lu hdră bruă prŏng msĕ si dŭm wăl tuh tia mkra mjing Ninh Diêm 1, 2, 3, Ninh Thủy leh anăn dŭm krĭng mnuih ƀuôn sang dôk. Ƀiădah, hnơ̆ng đĭ kyar bruă duh mkra 9 mlan akŏ thŭn mơ̆ng alŭ wăl knŏng mâo 7.76%, dôk hlăm êpul să, ƀuôn hgŭm mâo boh tŭ dưn ƀiă hĭn. Lê Minh Tâm, Khua anôk bruă sang čư̆ êa ƀuôn hgŭm Đông Ninh Hòa brei thâo: lu hdră bruă ti ƀuôn hgŭm ăt dôk hlăm wưng ruh mgaih anôk ala, ka dưi pŏk ngă, mjing boh tŭ dưn đĭ kyar bruă duh mkra kyua anăn dleh dưi mâo mta kñăm đĭ kyar jih thŭn jing 16%. Êlâo hĭn, alŭ wăl mđing brei čan prăk duh bi liê bruă knŭk kna leh anăn bi leh ruh mgaih anôk ala čiăng dŭm hdră bruă pral pŏk ngă.

“Hmei hluê ngă hdră duh bi liê bruă knŭk kna, si srăng ngă, mơ̆ng ară anei truh kơ knhal jih thŭn mâo 100%. Hluê ngă jăk hdră ruh mgaih anôk ala, ti alŭ wăl ƀuôn hgŭm mâo 12 hdră bruă, truh ară anei, hmei bi leh 3 hdră bruă leh. ăt adôk 9 hdră bruă dơ̆ng, truh 15/20/12 brei bi leh. Anăn jing dŭm hdră čiăng đru mguôp mđĭ kyar 16%”.

Klei yăl dliê ti Đông Ninh Hòa ăt bi êdah sa boh sĭt hlăm rup bruă duh mkra Khánh Hòa: mâo klei găl, mâo hdră bruă ƀiădah kyua lu klei gun kpăk anăn êmưt bi mlih jing ênoh đĭ kyar. Msĕ hŏng bruă rŭ mdơ̆ng, khădah đĭ truh 36% mkă hŏng wưng anei thŭn 2025, ƀiădah ăt adôk hnơ̆ng lu êdi dôk kpăk đuôm. Nguyễn Thành Phú, Khua knơ̆ng bruă rŭ mdơ̆ng čar Khánh Hòa brei thâo, knơ̆ng bruă dôk gĭr ruh mgaih čiăng kơ bruă rŭ mdơ̆ng đru mguôp lu hĭn:

“Tơdah hmei dưi mghaih msir dŭm hdră bruă djŏ tuôm ruh mgaih klei dleh dlan, gun kpăk. Dŭm hdră bruă srăng pŏk ngă mtam bruă duh bi liê, lŏ dơ̆ng bi leh, đru mguôp jăk kơ êpul bruă hiu čhưn ênguê. Tĭng kơ phung duh bi liê ăt brei mâo klei gĭr, Knơ̆ng bruă rŭ mdơ̆ng lehanăn dŭm Knơ̆ng, dhar bruă srăng mtrŭt mjhar nanao čiăng mtrŭt mđĭ bruă rŭ mdơ̆ng. Si ngă tơdah mâo anôk rŭ mdơ̆ng jing mđing pŏk ngă, brei ngă mđrăm mbĭt, bi tơdah mâo anôk rŭ mdơ̆ng leh lui nanao snăn amâo mâo klei tŭ dưn ôh kơ bruă rŭ mdơ̆ng".

Boh tŭ 9 mlan thŭn 2026, Khánh Hòa mâo hnơ̆ng đĭ kyar GRDP êbeh 11.2%, snăn mta kñăm đĭ kyar 10.88% mơ̆ng thŭn 2026 jing năng ngă. Dŭm klei gĭr ruh mgaih klei gun kpăk hlăm dŭm hdră bruă, mđĭ lar boh tŭ dưn hlăm dŭm bruă mâo klei găl msĕ si hiu čhưn ênguê, pui kmlă, logistics… amâo djŏ knŏng kñăm mjing boh tŭ dưn klă klơ̆ng kơ thŭn anei, ƀiădah lŏ jing tur knơ̆ng kơ klei đĭ kyar hlăm dŭm thŭn kơ anăp.

Khua knơ̆ng bruă sang čư̆ êa čar Khánh Hòa Nguyễn Việt Hùng mtă kơ dŭm knơ̆ng, dhar bruă, alŭ wăl brei păn kjăp boh klei anôk bruă duh mkra, hdră bruă hlăm alŭ wăl, bi mklă dŭm anôk bruă đru mguôp phŭn hlăm klei đĭ kyar čiăng mâo hdră msir djŏ guôp. Mkra mlih klei ngă hră mơar brei klă sĭt, mjing klei găl kơ mnuih ƀuôn sang leh anăn anôk bruă duh mkra.

“Akâo kơ dŭm să, ƀuôn hgŭm brei păn kjăp alŭ wăl, thâo klă ya hdră bruă, hlei anôk bruă duh mkra dôk đru mguôp phŭn kơ klei đĭ kyar mơ̆ng să, kơh dưi mkă tĭng. Dŭm alŭ wăl mđing kơ klei mlih mrâo hră mơar knŭk kna. Si ngă tơdah truh kơ să, ƀuôn hgŭm, dŭm hră mơar knŭk kna mơ̆ng mnuih ƀuôn sang, anôk bruă duh mkra, gŏ sang ngă bruă duh mkra êngao knŭk kna găl ênưih, amâo ngă klei dleh dlan jing ăt đru mguôp kơ klei đĭ kyar”.