Knơ̆ng bruă sang čư̆ êa ƀuôn hgŭm Đông Gia Nghĩa brei thâo alŭ wăl mkŏ mjing leh êpul ngă bruă pral leh anăn pŏk ngă dŭm hdră msir mkhư̆ hlue si klei kčah mtrŭn. Mơ̆ng klei ksiêm dlăng, mâo 40 drei ŭn gŏ sang Mai Thanh Sự ti alŭ ƀuôn sang Đồng Tiến mâo klei bi knăl êngoh hlơr, lui klei huă ƀơ̆ng, klei kbiă êrah ti gŭ klĭt leh anăn djiê.

Leh mâo boh tŭ, bruă sang čư̆ êa alŭ wăl čuăl krĭng anôk mâo klei ruă, mkŏ mjing ba dơr jih jang êpul ŭn hlue si hdră kčah, mbĭt anăn bi mdoh, mdjiê kman krĭng rông mnơ̆ng hŏng êa drao leh anăn čŭr kô̆. Mbĭt hŏng bruă mkhư̆ anôk mâo klei ruă tưp, ƀuôn hgŭm Đông Gia Nghĩa mđĭ ksiêm dlăng ti krĭng wăl mâo klei ruă tưp leh anăn dŭm krĭng riêng gah; hâo hưn mtô mblang, ktrâo lač kơ mnuih ƀuôn sang ba yua dŭm hdră msir rông mnơ̆ng doh êƀăt, amâo dŭ mdiăng, čhĭ mnia amâodah čuh tă ŭn mâo klei ruă.