Hluê ngă Hdră kñăm ala čar mđĭ kyar bruă duh mkra - ala ƀuôn krĭng mnuih djuê ƀiă leh anăn krĭng čư̆ čhiăng, dŭm thŭn êgao, ƀuôn hgŭm Ba Vinh, čar Quảng Ngãi mđing tal êlâo prăk duh bi liê mkŏ mkra anôk bruă nah gŭ, êlan klông krĭng ƀuôn sang, sang dhar kreh, dŭm hdră bruă mkăp kơ klei hdĭp mda êpul êya leh anăn kriê dlăng klei suaih pral mnuih ƀuôn sang. Mbĭt hŏng ênoh prăk duh bi liê mơ̆ng Knŭk kna, dŭm hdră brei čan prăk hŏng ênoh prăk mnga hdjul jing boh kdrŭt, jing anôk knang đru kơ lu gŏ sang jhŏng mđĭ kyar bruă duh mkra. Êdah kdlưn msĕ si gŏ sang Phạm Văn Rôm. Mơ̆ng prăk čan hŏng ênoh prăk mnga hdjul, Phạm Văn Rôm jhŏng duh bi liê pla 4 ha ana akasi, rông ŭn, mnŭ, kyua anăn bruă duh mkra gŏ sang ƀrư̆ ƀrư̆ hơĭt kjăp:

“Mâo klei đru mơ̆ng Knŭk kna, Knơ̆ng prăk Knŭk kna mjing klei găl kơ mnuih ƀuôn sang čan prăk mă bruă snăn lač kluôm mnuih ƀuôn sang mâo klei găl čiăng mđĭ kyar bruă duh mkra gŏ sang, ƀrư̆ ƀrư̆ dưi lăm lui klei ƀun ƀin.”

Wưng thŭn 2026 - 2035, să Ba Vinh bi mklă bruă mđĭ lar ai dưi, kriê pioh leh anăn mđĭ kyar dŭm bruă djuê ana mơ̆ng đưm jing hdră êlan yuôm bhăn čiăng mjing hdră duh ƀơ̆ng sui kơ mnuih ƀuôn sang. Trần Thị Thanh Thúy, Kiăng khua anôk bruă sang čư̆ êa să Ba Vinh brei thâo:

“Hdră ala čar kñăm djŏ tuôm kơ ngăn prăk bruă knuă, snăn êlâo hĭn alŭ wăl mđing bi mguôp čiăng đru leh anăn mđĭ lar dŭm gru hmô sui hŏng anei mnuih ƀuôn sang ngă leh. Sitôhmô msĕ si adŭ bruă pơ̆k mñam, anei jing dŭm bruă ngă mâo đru leh snăn srăng lŏ dơ̆ng mđĭ lar leh anăn ngă jing hdră mkŏ mjing mnơ̆ng dhơ̆ng kơ mnuih ƀuôn sang. Ƀiădah ngăn prăk anei dưi jao ngăn prăk amâo mâo lu ôh snăn alŭ wăl čang hmăng srăng bi mguôp jih jang hdră ala čar kñăm čiăng duh bi liê mkŏ mjing mnơ̆ng dhơ̆ng phŭn kơ mnuih ƀuôn sang.”

5 thŭn êgao, mơ̆ng phŭn mkăp prăk dŭm hdră ala čar kñăm, čar Quảng Ngãi pŏk ngă leh 26 hdră bruă đru mđĭ kyar bruă duh mkra hluê ênoh yuôm leh anăn 399 hdră bruă mđĭ kyar êpul êya, đru kơ mnuih ƀuôn sang ƀrư̆ ƀrư̆ čŏng pô mkra mjing, bi hrŏ klei jưh knang kơ klei đru. Knŏng hlăm thŭn 2026, Quảng Ngãi kah mbha êbeh 1.000 êklai prăk mơ̆ng phŭn mkăp prăk Hdră ala čar kñăm mđĭ kyar bruă duh mkra - ala ƀuôn krĭng mnuih djuê ƀiă leh anăn krĭng čư̆ čhiăng thŭn 2025 bi mlih.

Dŭm alŭ wăl dôk ruah dŭm gru hmô djŏ guôp čiăng mđĭ lar klei găl grăp krĭng. Anăn jing mđĭ kyar krĭng pla mjing tei nan mguôp hŏng bruă mkra mjing ti să Ba Vì, pŏk mlar dŭm gru hmô ktơr, rông mnơ̆ng ti Ba Xa leh anăn mđĭ kyar krĭng ana êa drao ti Măng Ri. Xiêng Thanh Phúc, Khua knơ̆ng bruă djuê ana leh anăn klei đăo čar Quảng Ngãi, brei thâo:

“Hdră ala čar kñăm wưng thŭn 2026 – 2030, bruă mkŏ mjing pŏk ngă dŭm hdră ala čar kñăm mđĭ kyar krĭng mnuih djuê ƀiă srăng pŏk ngă kjăp hĭn hŏng boh sĭt. Srăng pŏk ngă dŭm gru hmô bi hmô gru mngač mnuih djuê ƀiă ti alŭ wăl čar tŭ dưn hĭn, kjăp hĭn, mâo boh tŭ dưn hĭn leh anăn mâo mnơ̆ng dhơ̆ng klă klơ̆ng, mguôp hŏng bruă đru kơ mnuih ƀuôn sang tlaih ƀun leh anăn tlaih ƀun kjăp”

Hŏng klei mđing dlăng mơ̆ng Đảng, Knŭk kna mbĭt hŏng klei gĭr ktưn kpưn đĭ mơ̆ng mnuih ƀuôn sang, dŭm hdră ala čar kñăm srăng lŏ dơ̆ng mđĭ lar boh tŭ dưn, mjing boh kdrŭt ktang kơ hdră mđĭ kyar bruă duh mkra - ala ƀuôn krĭng mnuih djuê ƀiă leh anăn krĭng čư̆ čhiăng ti alŭ wăl čar Quảng Ngãi hlăm wưng mrâo.