Hruê 8/10, ai êwa mprăp kơ Hruê knăm Dhar kreh djuê ana Mông tal 4 thŭn 2026 mkŏ mjing mjêč ti Điện Biên. Dŭm êpul phung mbruă, phung kdŏ mmuñ, phung bi lông mơ̆ng 11 čar dôk mđing mjuăt bi hriăm, bi leh dŭm hdră kdŏ mmuñ, mbĭt anăn mprăp dŭm anôk rang mdah, mnơ̆ng dhơ̆ng jăk siam, mprăp hưn mthâo dŭm boh tŭ yuôm dhar kreh leh anăn mnơ̆ng dhơ̆ng mơ̆ng mnuih ƀuôn sang djuê ana Mông truh hŏng phung ƀuôn sang, phung tuê hiu čhưn ênguê.

Hruê kăm dhar kreh djuê ana Mông tal 4 mkŏ mjing mơ̆ng hruê 9 - 11/10, hŏng giăm 800 čô mbruă, phung kdŏ mmuñ, phung bi lông hriê mơ̆ng 11 čar mâo: Điện Biên, Tuyên Quang, Phú Thọ, Thái Nguyên, Sơn La, Cao Bằng, Lai Châu, Lào Cai, Thanh Hóa, Nghệ An leh anăn Dak Lak. Bi Điện Biên mâo 101 čô mbruă, phung kdŏ mmuñ, phung nao hgŭm hlăm dŭm mta dhar kreh leh anăn 62 čô bi lông hlăm 6 klei bi lông hŏng 35 mta. Dŭm alŭ wăl ba dŭm mta mnơ̆ng djŏ tuôm hŏng klei hdĭp leh anăn dhar kreh Mông dŭm krĭng kwar, mơ̆ng kdrăp čŭt hơô, mnơ̆ng pơ̆k mñam, mnơ̆ng mkra hŏng kiê kngan mơ̆ng đưm truh kơ mnơ̆ng dhơ̆ng lŏ hma, mnơ̆ng jăk leh anăn dŭm mta mnơ̆ng pioh kơ klei hdĭp. Anei amâo djŏ knŏng jing anôk hưn mthâo mnơ̆ng dhơ̆ng, ƀiădah lŏ đru kơ mnuih ƀuôn sang thâo săng klă hĭn kơ klei yăl dliê dhar kreh ti tluôn grăp mta mnơ̆ng dhơ̆ng.