Ti nah tluôn ênao êa Mỹ Lâm, să Hoà Thịnh, grăp tlam mmăt knăm năm grăp hruê kăm, ênai brô̆ guitar mbĭt hŏng dŭm asăp mmuñ siam, êdu êun dưi kwang... mđrăm mbĭt hŏng ênai čĭm, ênai angĭn thut... Tinei amâo mâo anôk rang mdah hŏng pui mngač ƀlêč ƀlir ôh. Ti anei mâo sa êa mil mtah siam êdi mơ̆ng rơ̆k ktơ̆k mbĭt hŏng dŭm čô mnuih êdu êun, siam, êdu êun msĕ si krĭng ƀuôn sang Hoà Thịnh. Tinei, ênhiang mmuñ dưi mkŏ mjing mơ̆ng phung ƀuôn sang khăp kơ brô̆ mmuñ, leh anăn čŏng pioh mnĭt mmông, klei thâo pô duh kơ êpul êya. Leh anăn mơ̆ng anăn, anôk anei jing leh anôk bi tuôm amâo bi kčah êlâo ôh mơ̆ng lu mnuih. Hdră ngă ênưih ƀiădah hlăk mjing sa ai êwa mrâo kơ klei hdĭp dhar kreh ti krĭng ƀuôn sang Hoà Thịnh - anôk lŏ krŭ wĭt ktang phĭt mơ̆ng leh gưl êa lip prŏng mlan 11 thŭn dih. Ayŏng Nguyễn Hữu Đồng, sa čô mnuih ƀuôn sang Hoà Thịnh, sa čô ba anăp mtô kơ dŭm êpul ba anăp đru kơ mnuih ƀuôn sang msir mghaih klei truh mơ̆ng êa lip hƀuê ênuk. Leh anăn dŭm hruê anei, ñu kreh nao ti dŭm anôk bi tuôm Mỹ Lâm čiăng mmuñ dŭm klei mmuñ khăp čiăng kơ mnuih ƀuôn sang, ƀĭng găp pô hmư̆. Hŏng ñu dưi nao hgŭm anăn jing klei mơak, klei hơ̆k mơak. 
"Kâo ăt msĕ hŏng dŭm ayŏng adei mưng thâo ăt tŭ ư êdi hŏng hdră anei. Leh khua gĭt gai hluê ngă dŭm klei anei, kâo ƀuh ƀuôn sang pô jing jăk siam hĭn; mnuih ƀuôn sang mâo bruă mă, klei hdĭp ai tiê ăt jăk hĭn."

Mơ̆ng 4 hruê kăm mkŏ mjing, hdră bi mjĕ mjuk ênhiang mmuñ êpul êya bi tuôm hŏng Mỹ Lâm mâo nanao sa čô pĕ brô̆ 70 thŭn ƀiădah kngan pĕ brô̆ mbruă êdi - Phạm Duy Binh ti ƀuôn hgŭm Tuy Hòa. Knăm năm grăp hruê kăm ñu mơ̆ng Tuy Hòa găn dŭm pluh km čiăng truh ti Hòa Thịnh čŏng ngă bruă kơ mnuih khăp kơ ênhiang mmuñ hŏng jih ai tiê. Binh yăl dliê:
"Hlăk mâo klei hâo hưn Hòa Thịnh mkŏ mjing klei bi mjĕ mjuk klei mmuñ ênao Mỹ Lâm, kâo - sa čô thâo tông guitar leh anăn thâo mmuñ - ƀuh klei bi hmô anei jing mdê êdi. Hmei mprăp nao hgŭm hŏng ai tiê čŏng pô. Kâo ƀuh klei anăn yuôm bhăn êdi."

Mbĭt hŏng klei bi tuôm hŏng Mỹ Lâm, dŭm mlam kdŏ mmuñ lŏ dưi mkŏ mjing ti dŭm anôk hlăm ktuê êlan găn dŭm kdrăn lŏ. Hdră klei kdŏ mmuñ êpul êya anei mâo klei hgŭm mơ̆ng phung čŏng ngă bruă mda asei čiăng pŏk mlar wăl dhar kreh kơ mnuih ƀuôn sang krĭng ƀuôn sang să Hoà Thịnh. Hdră bruă kdŏ mmuñ êpul êya anei kyua mơ̆ng ayŏng Phương Văn Lành, Khua bruă Đảng să Hoà Thịnh mphŭn pŏk leh anăn dưi pŏk ngă hlăm ai tiê čŏng ngă. Amâo čhĭ hră nao dlăng ôh leh anăn dưi mkŏ mjing hlăm tlam hruê năm grăp hruê kăm. Mnuih thâo pĕ brô̆ srăng mguôp pĕ brô̆, thâo mmuñ đru mmuñ. Leh anăn hlei pô čiăng yăl dliê klei êa lip ăt dưi nao hgŭm mơh. Phương Văn Lành, brei thâo, leh dŭm thŭn mkŏ mjing, gru hmô bruă hiu čhưn ênguê "Bi tuôm hŏng Mỹ Lâm", mjing leh klei iêo jak mdê êdi:
"Boh tŭ tal êlâo hmei hluê ngă mrâo êgao dưi iêo jak lu phung tuê hiu čhưn ênguê hlăm leh anăn êngao ala čar, tăp năng êngao čar hriê čhưn, bi mjĕ mjuk hŏng mnuih ƀuôn sang alŭ wăl. Anei jing sa hdră jăk êdi čiăng kơ hmei hưn mthâo pŏk rup ƀuôn sang truh hŏng ƀĭng găp leh anăn phung tuê hiu čhưn ênguê hlăm, êngao ala čar."
Mơ̆ng ênao êa Mỹ Lâm, truh kơ dliê čư̆ êa Bầu Đá, mơ̆ng ƀuôn mnga krih truh kơ ênao êa Lạnh leh anăn wăt dŭm kdrăn lŏ tiah ktuê ƀuôn sang êđăp ênang… mjing leh pŏk rup ƀuôn sang Hòa Thịnh êđăp ênang, ƀrư̆ hruê ƀrư̆ iêo jak lu mnuih hriê čhưn dlăng, tui ksiêm.