Hdră mtô bi hriăm hgơr dua - čing tlâo - čing êma jing bruă ngă hlăm hdră bruă kdrêč mrô 6 Hdră kñăm ala čar mđĭ kyar bruă duh mkra - ala ƀuôn krĭng mnuih djuê ƀiă leh anăn krĭng čư̆ čhiăng kơ klei "Kriê pioh, mđĭ lar ênoh yuôm dhar kreh djuê ana jăk siam mơ̆ng dŭm djuê ana mnuih djuê ƀiă mguôp hŏng mđĭ kyar bruă hiu čhưn ênguê" mâo Knơ̆ng bruă dhar kreh, mjuăt ktang asei mlei leh anăn hiu čhưn ênguê Dak Lak hluê ngă.

Hlăm êbeh 2 mlan hriăm, phung hđeh Sang hră gưl tlâo čiêm rông hđeh mnuih djuê ana ƀiă Đinh Núp, să Phú Mỡ leh anăn phung êdam êra să Xuân Lãnh mâo phung thâo mbruă mtô bi hriăm hdră tông hgơr dua, čing tlâo, čing êma thâo mbruă; hluê ngă dŭm klei kdŏ čhuang mguôp hŏng grăp ênhiang čing, klei čing. Nguyễn Thụy Phương Hiếu, K'iăng khua knơ̆ng bruă dhar kreh, mjuăt asei mlei leh anăn hiu čhưn ênguê čar Dak Lak brei thâo, mơ̆ng wưng mâo phung thâo mbruă mtô bi hriăm hluê ngă klei tông hgơr dua boh, čing tlâo boh, čing êma boh, phung hđeh păn kjăp hdră ngă bruă pral, khăp čiăng hriăm leh anăn dưi hluê ngă jăk dŭm klei tông čing mguôp hŏng dŭm knăm mơak knhuah gru mơ̆ng djuê ana pô. Leh adŭ hriăm anei, phung hđeh dưi mjuăt bi hriăm, hriăm čiăng jing phung ba anăp lŏ čuê bruă kriê pioh dŭm boh tŭ yuôm knhuah dhar kreh jăk siam mơ̆ng djuê ana pô.

"Phung hđeh mâo leh klei đĭ kyar prŏng êdi. Kyua mâo phung thâo mbruă mtô bi hriăm, phung hđeh mphŭn thâo leh anăn bi êdah jăk êdi dŭm klei tông čing ăt msĕ mơh dŭm ênhiang kdŏ čhuang. Anei jing knhuang mphŭn jăk găl. Knơ̆ng bruă čang hmăng sang hră srăng lŏ dơ̆ng mkŏ mjing êpul hđeh anei jing êpul phŭn čiăng mđĭ lar hlăm wưng kơ anăp. Mơ̆ng anăn, phung hđeh srăng mâo lu klei găl nao hgŭm hlăm dŭm klei bi lông, klei kdŏ mmuñ amâo djŏ knŏng hlăm êpul êya ƀiădah lŏ ti dŭm sang hră mnuih djuê ƀiă leh anăn dŭm sang hră hlăm alŭ wăl čar čiăng bi mjĕ mjuk, hriăm mbĭt, đru kriê pioh dhar kreh djuê ana pô."

Klei tông Hgơr dua - Čing Tlâo - Čing Êma jing klei bi mguôp mơ̆ng tlâo mta kdrăp tông ayŭ jing Hgơr dua - Čing Tlâo - Čing Êma hlăm ênhiang mmuñ, ênhiang kdŏ leh anăn klei kdŏ čiăng mjing sa hdră kdŏ mmuñ jăk siam êdi. Ênai mơ̆ng Hgơr Dua - Čing Tlâo - Čing Êma mâo lu ênhiang mdê mdê, mâo dŭm boh tŭ yuôm dhar kreh êlam êdi. Kyua mâo boh tŭ yuôm anăn kyua anăn thŭn 2015, Klei tông Hgơr Dua- Čing Tlâo- Čing Êma mâo Phŭn bruă Dhar kreh, Mjuăt ktang asei mlei leh anăn Hiu čhưn ênguê tŭ yap jing mnơ̆ng kriê pioh amâo êdah klă gưl ala čar. Bruă mkŏ mjing knăm mơak hlăm wưng akŏ yan mnga amâo djŏ knŏng jing klei bhiăn dhar kreh êpul êya ƀiădah lŏ jing bruă klă sĭt kriê pioh lehanăn mđĭ lar boh tŭ yuôm knhuah dhar kreh. La Văn Hãng, Khua Adŭ bruă Dhar kreh să Xuân Lãnh, čar Dak Lak brei thâo:

"Mơ̆ng thŭn 2016 truh kơ ară anei alŭ wăl krơ̆ng kjăp mkŏ mjing knăm anei čiăng krơ̆ng kjăp leh anăn mđĭ lar knhuah dhar kreh mnuih ƀuôn sang dŭm djuê ana ƀiă ti Xí Thoại leh anăn Xuân Lãnh.. Hmei gĭr ktưn wăt tơdah klei găl leh bi mŭt mbĭt hluê ngă bruă sang čư̆ êa alŭ wăl dua gưl mâo klei dleh dlan ƀiă hmei ăt krơ̆ng kjăp mkŏ mjing čiăng mjing klei găl kơ mnuih ƀuôn sang dŭm djuê ana ƀiă bi mjĕ mjuk hrăm mbĭt leh anăn lŏ dơ̆ng kriê pioh, mđĭ lar knhuah dhar kreh djuê ana pô. "

Hgơr dua, čing tlâo, čing êma jing knhuah dhar kreh jăk siam mơ̆ng mnuih djuê ana Bahnar leh anăn Čam, dưi kriê pioh leh anăn lŏ čuê kơ lu ênuk gưl. Mơ̆ng dŭm knăm mơak êpul êya truh kơ adŭ hriăm hruê anei, ênai hgơr, ênai čing, ênai čĭng ăt kwang nanao, mkŏ ênuk gưl hđeh hŏng knhuah gru djuê ana pô. Anôk bruă djŏ tuôm čar Dak Lak mkŏ mjing mtô bi hriăm kơ phung hđeh amâo djŏ knŏng đru kriê pioh sa knhuah dhar kreh yuôm bhăn, ƀiădah lŏ mjing thiăm dŭm boh kdrŭt hđeh čiăng kơ klei jăk siam anăn lŏ dưi kriê pioh, mđĭ lar leh anăn lar bra hlăm klei hdĭp hruê anei.