A Riêu Âr Pục amâo mâo djŏ knŏng jing sa knăm mnuih djuê ana Pa Cô. Anei lŏ jing anôk bi grăng kđi klei hŏng klei k’hưm êdi mơ̆ng phung khua mduôn, hŏng dŭm mta klei bhiăn mâo leh mơ̆ng đưm dôk hlăm klei hdĭp ƀuôn sang tinei. Êlâo kơ hdră bhiăn knŭk kna truh hlăm krĭng dlông anei, mơ̆ng dŭm klei bhiăn djuê ana anăn bi krơ̆ng klei êđăp ênang hlăm klei hdĭp aguah tlam mnuih ƀuôn sang. Tui si klei mĭn mnuih djuê ana  Pa Cô, tơdah mâo dŭm klei amâo mâo thâo bi djŏ hlăm gŏ sang, hlăm găp djuê, snăn amâo mâo dưi čŏng hjăn pô ôh mghaih msir, bi nao mbang ti anăp phung khua mduôn. Êjai anăn, knăm A Riêu Âr Pục dưi mkŏ mjing msĕ si sa klei bi mgrăng prŏng hlăm yang ƀuôn. Khua mduôn Lê Tuấn Mõ, ƀuôn Kê Ré, xã A Lưới 3 brei thâo, knăm anei dưi mkŏ mjing kñăm mghaih msir dŭm klei amâo mâo thâo bi djŏ hlăm klei hdĭp ƀuôn sang.

“Knăm Âr Pục tal anei jing mghaih msir dŭm klei amâo mâo thâo bi djŏ hlăm klei hdĭp mnuih ƀuôn sang, boh nik mghaih msir amâo mâo knŏng hlăm klei bi khăp, ƀiădah mghaih msir wăt klei amâo mâo thâo bi djŏ kơ lăn ala, klei bi mmiă sang pưk… Jih jang klei amâo mâo thâo bi djŏ anăn, tơdah ka dưi mghaih msir ôh, snăn iêo phung khua mduôn, lehanăn iêo wăt hŏng ƀuôn riêng gah čiăng mđrăm mbĭt bi trông, lehanăn bi tŭ ư, bi mgrăng dŭm mta klei amâo mâo thâo bi djŏ hdơ̆ng găp anăn.”

Klei mdê mơ̆ng knăm A Riêu Âr Pục jing ti klei klă mngač, lehanăn kơ klei êngiê hlăm bruă bi mgrăng. Amâo mâo djŏ knŏng phung khua mduôn mơ̆ng dŭm tĭng djŏ tuôm, lu phung khua mduôn mâo k’hưm mơ̆ng dŭm boh ƀuôn mkăn ăt dưi jak iêo. Grăp čô mnuih mâo k’hưm, amâo mâo klei djŏ tuôm ôh hŏng boh klei anei, srăng dưi ruah jing pô kiă kriê klei bi mgrăng, rơ̆ng klei mtăp mđơr kơ dŭm tĭng.

Knăm anei dưi mkŏ mjing hŏng klei bhiăn kjăp. Dơ̆ng mơ̆ng bruă mprăp mnơ̆ng dhơ̆ng, klei iêo jak êpul hgŭm phung khua mduôn hlŏng truh kơ klei bi mgăl, klei hlak mblang, lehanăn klei bi blŭ hrăm. Phung nao hlăm klei bi grăng anei srăng bi êdah klei mĭn pô hŏng klei klă mngač, hŏng klei blŭ năng đăo knang, tăp năng klei blŭ mâo dŭm klei due, thâodah msĕ si klei kưt muiñ. Leh mđing hmư̆ ênŭm jih klei blŭ, snăn êpul hgŭm phung khua mduôn srăng mđrăm mbĭt kruak boh tŭ boh klei bi mgrăng knhal tuič.

Klei yuôm bhăn mơ̆ng mta kñăm anei mâo A Riêu Âr Pục jing amâo mâo djŏ jing klei bi kmhal ôh, ƀiădah đuĕ nao kơ klei bi mgrăng. Hlăm grăp boh blŭ hlak mblang, klei mtă mtăn mơ̆ng phung khua mduôn  bi êdah ai tiê klei thâo khăp, klei thâo pap, mâo klei êdu êun, lehanăn bruă klam hŏng ƀuôn sang. Kyuadah kdlưn hĭn kơ anăn jing,klei mnuih ƀuôn sang djuê ana Pa Cô čang hmăng dưi kriê kjăp klei thâo bi mguôp hlăm ƀuôn sang.

Leh mâo dŭm tĭng bi tŭ ư kơ boh mơ̆ng klei bi mgrăng, mâo dŭm klei bi ƀuăn rơ̆ng dưi ngă. Tơdah ka mâo ôh boh hră čih, mnuih djuê ana Pa Cô yua đĭgn đrao điêt mjing mnơ̆ng bi knăl kơ klei pô ƀuăn. Dŭm đĭgn đrao điêt anăn jing leh klei bi knăl kơ klei pô ƀuăn, jing klei uêñ klam lehanăn klei đăo knang hŏng yang ƀuôn.

Ară anei, jih jang klei gĭr kriê pioh knhuah gru dhar kreh, knăm A Riêu Âr Pục dưi lŏ kơrŭ mjing, lehanăn hưn mthâo hlăm tar ƀar. Pô mbruă Nghệ nhân Hồ Thị Tư brei thâo, klei lŏ kơrŭ wĭt knăm anei, amâo mâo djŏ knŏng jing klei lŏ bi kriê pioh dhar kreh djuê ana Pa Cô ƀiădah lŏ đru kơ phung tue, lehanăn kơ hđeh gưl mrâo thâo săng hĭn kơ klei tŭ dưn klei thâo bi khăp, klei kpă hŏng klei bi grăng hlăm yang ƀuôn mâo kriê pioh leh mơ̆ng dŭm ênuk.

“Klei lŏ kơrŭ wĭt knăm Âr Pục mơ̆ng djuê ana Pa Cô pioh hưn mdah klei jăk siam mơ̆ng dhar kreh djuê ana, msĕ si klei bhiăn ênuk đưm, hŏng jih jang tue thâo, lehanăn wăt hŏng phung hđeh gưl mrâo. Leh ƀuh knămanei lu mnuih thâo săng hĭn kơ klei yuôm bhăn mơ̆ng knăm yuôm bhăn anei.”

Êlâo dih, bruă mghaih msir dŭm klei amâo mâo thâo bi djŏ, mnuih djuê ana Pa Cô kreh mkŏ mjing klei tlŏ kbao čiăng hdơr knga kơ yang adiê đru kơ bruă bi mgrăng mâo klei tŭ dưn. Ară anei, hdĭp hlăm eneuk kreh dhar leh, klei bhiăn tlŏ kbao amâo lŏ nga ôh. Knŏng kriê pioh dŭm knhuah tông čing čhar, kdŏ čhuang, lehanăn dŭm klei kưt muiñ mơak hlăm krah čư̆ dliê leh yang ƀuôn krơ̆ng nanao klei thâo bi mguôp. Phan Thanh Hải, Khua knơ̆ng bruă dhar kreh, mjuăt asei mlei ƀuôn prŏng Huế, knơ̆ng bruă ksiêm duah, kơrŭ wĭt dŭm knăm djuê ana, amâo mâo djŏ knŏng kơ klei bi kriê pioh dŭm knhuah gru dhar kreh, ƀiădah lŏ jing klei găl mrâo kơ bruă mđĭ kyar bruă hiu čhưn ênguê hlăm yang ƀuôn.

Băng: “Knơ̆ng bruă dhar kreh, mbĭt hŏng knơ̆ng bruă hiu čhưn eneguê bi đru kơ alŭ wăl hưn mdah dŭm êpul famtrip, bi ksiêm duah, lŏ kơrŭ wĭt dŭm knăm đưm bi djŏ hlăm bruă hiu čhưn ênguê. Kâo mĭn klei tŭ dưn mơ̆ng dhar kreh yuôm bhăn dưi kriê pioh bi kơrŭ mjing, sĭt nik  srăng lar bra hĭn hlăm yang ƀuôn, lehanăn srăng jing sa mta bruă kơ bruă hiu čhưn eneguê jăk snăk.”

Khădah klei hdĭp ênuk ara anei mâo leh lu klei bi mlih, ƀiădah klei tŭ dưn mơ̆ng knăm  A Riêu Âr Pục mâo leh mnuih djuê ana Pa Cô kriê pioh. Anăn amâo mâo jdŏ jing klei yăl dliê hơăi mang, ƀiădah lŏ jing klei bi knăl kơ klei thâo bi mgrăng hlăm klei hdĭp yang ƀuôn, mjing klei bi knăl kơ ai tiê klei thâo bi mpŭ kơ klei djŏ, klei thâo bi mguôp, lehanăn ai tiê klei thâo khăp dưi lŏ ksul mbŭ hlăm lu gưl ênuk ti krah čư̆ dliê duôr čư̆ prŏng./.