Tui si hdră êlan, Daklak tă êlan mđĭ kyar bruă hiu čhưn ênguê mtah, kjăp siă suôr hŏng bruă kriê pioh knhuah gru dhar kreh ƀuôn sang, lăn mnga êa mơak, lehanăn mkŏ mjing dŭm mta mnơ̆ng kơ bruă hiu čhưn ênguê jiă knhuah lăn dap kngư. Lu hlăm anăn jing bruă hiu čhưn ênguê lăn mnga êa mơak, anôk mdei msăn, anôk hiu čhưn truh hlăm ƀuôn sang ksiêm duah kơ dhar kreh, bruă hiu čhưn ênguê hlăm đang hma, hlăm đang kphê, bruă hiu čhưn ênguê hŏng êman, lehanăn mđrĭng anăn jign dhar kreh čing čhar lăn dap kngư. Ti anôk trông čhai, lu phung bi ala bi lač Daklak mâo lu klei găl kơ bruă hiu čhưn ênguê kyua lăn mnga êa mơak mơ̆ng dliê, drai, ênao êa čŏng mâo mbĭt hŏng knhuah gru dhar kreh ƀuôn sang tinăn. Siămdah, čar lŏ tĭng mkă bi nik ya mta dôk mâo leh pioh mđĭ kyar klei găl pô, snăn duh kơ dŏ anăn jing tal êlâo hĭn. Phan Bửu Toàn, K’iăng khua êpul hgŭm bruă hiu čhưn ênguê ɃP.HCM lač.

“Kâo mĭn tal êlâo jing Daklak bi ksiêm dlăng jih jang ya dŏ mâo leh, lehanăn hlăk tăp hnơ̆ng mrâo, lehanăn gĭr lŏ mkŏ mjing lehanăn bi kjăp, mđĭ boh tŭ čiăng kơ drei krơ̆ng kjăp klei găl anăn pioh mđĭ bruă. Sitôhmô, lač kơ kphê snăn arăng bi lač truh kơ Daklak yơh, snăn boh kphê amâo mâo djŏ knŏng tăp anăn ôh, ƀiădah lŏ mđĭ knhuah hdĭp kơ kphê, snăn lông ngă lăng jih jang bruă hdĭp hŏng kphê, mmông anăn kơh kphê srăng jing mnơ̆ng mâo ênoh hĭn. Bi tơdah drei amâo mâo ôh klei bi mdê mơ̆ng atur kjăp drei mâo leh, snăn drei lŏ bi msiam ti kdrêč ê’un.”

  Mâo đa đa klei blŭ bi lač bruă hiu čhưn ênguê Daklak ăt dôk mâo lu klei dleh kpăk msĕ si bruă nah gŭ ka djăp ênŭm, kƀah mnơ̆ng jăk, bruă hiu čhưn ênguê êjai mlam kƀah, ka mâo lu ôh phung duh mkra duh bi liê kơ bruă anei. Tui si   Đặng Xuân Vũ, Khua knơ̆ng bruă hiu čhưn ênguê Đắk Việt, klei klah klap mơ̆ng dŭm anôk hiu čhưn ênguê hlăm čar dôk ngă dleh dlan kơ bruă mkŏ mjing dŭm  tour kjăp jăk, kñăm krơ̆ng jơ̆ng phung hiu čhưn ênguê:

  “Dơ̆ng mơ̆ng ngŏ hlŏng kơ yŭ čar snăn ka mâo klei bi mguôp kjăp mbĭt ôh, ƀuh ară anei dôk bi klah, dŭm mta mnơ̆ng mâo msĕ mơh, lehanăn boh kbưi dua nah ƀuh jing kbưi hĭn mơh. Kyuanăn čiăng mâo klei thâo bi hgŭm mbĭt, mjing dŭm tour mbĭt ƀiădah ka dưi ngă, bi tơdah mmông đuĕ hriê, amâodah nao plah wah dua anôk ñu jĕ hĭn sĭt nik mgi dih klei anei srăng ênưih hĭn mkŏ mjing.”

Lê Phúc Long, K’iăng khua knơ̆ng bruă dhar kreh, mjuăt asei mlei, lehanăn hiu čhưn ênguê čar Daklak brei thâo, čar hlăk tă êlan kơ bruă hiu čhưn ênguê tui si hdră êlan lông hiu čhưn, đih dăm sui hrue, lehanăn mđĭ mnơ̆ng bi liêmơ̆ng phung tue, hrô kơ klei mđĭ ênoh mnuih hiu čhưn. Mbĭt hŏng anăn, car lŏ dơ̆ng mđing mkŏ klei bi hgŭm hŏng dŭm alŭ wăl ktuê hang ksĭ kwar krah, čiăng mkŏ mjing dŭm êlan hiu čhưn ênguê mkŏ êa ksĭ hŏng dap kngư:

 “Kyua dŭm klei dôk dleh kpăk anăn bruă hiu čhưn ênguê Daklak dôk êmưt nanao mkă hŏng dŭm alŭ wăl mkăn msĕ si hŏng Gia Lai amâodah Khánh Hòa lehanăn Lâm Đồng. Knơ̆ng bruă mâo leh mơh klei bi hgŭm hŏng dŭm knơ̆ng dhar bruă pioh hâo mdah kơ knơ̆ng bruă sang čư̆ êa čar, mâo dŭm mta djŏ tuôm truh hŏng knŭk kna, dŭm phŭn dhar bruă, snăn lŏ bi dôk guôn dŭm knơ̆ng dhar bruă mâo klei blŭ. Čiăng mđĭ kyar bruă hiu čhưn ênguê snăn knơ̆ng bruă srăng kčĕ mkŏ mjing hdră mtrŭn đru kơ bruă mđĭ kyar hiu čhưn ênguê yang ƀuôn hlăm čar, lehanăn dŭm bruă hlăm klei hiu čhưn ênguê, mơ̆ng anăn srăng mâo jar kơ hdră êlan pioh djăp alŭ wăl mbĭt hŏng dŭm dhar bruă hlue ngă hlăm wưng tinăp.”