Hŏng akŏ "Bi mguôp êpul êya - Bi lar knhuah gru", anei jing hruê knăm tal êlâo dưi mkŏ mjing leh să Phú Túc dưi mkŏ mjing, kñăm đru kriê pioh, mđĭ lar knhuah dhar kreh dŭm djuê ana mguôp hŏng hưn mthâo mnơ̆ng dhơ̆ng lŏ hma, mnơ̆ng dhơ̆ng OCOP mơ̆ng alŭ wăl. Hruê knăm mâo klei nao hgŭm mơ̆ng 14 êpul hriê mơ̆ng dŭm alŭ, ƀuôn ti alŭ wăl să, mbĭt hŏng 3 êpul bi mjĕ mjuk hriê mơ̆ng dŭm să Ia Rsai, Ia Dreh leh anăn Uar.

Jing sa hlăm dŭm êpul mâo ênoh mnuih nao hgŭm lu, ƀuôn Čư̆ Ung iêo mkrum êbeh 60 čô mbruă, phung bi lông leh anăn mnuih hgŭm hur har mprăp kơ hruê knăm. Klei êdah kdlưn mơ̆ng êpul ti hruê knăm jing lŏ mkŏ mjing knăm mnăm kpiê 3 - sa klei bhiăn knhuah gru jiă knhuah dhar kreh mơ̆ng mnuih Jarai. Nay Noar - Pô mbruă ƀuôn Čư̆ Ung lač:

"Ƀuôn hmei nao hgŭm hlăm hruê kƀĭn čhưn Dhar kreh djuê ana ngă sang mkra wĭt klei mnăm kpiê 3, mkŏ mjing čiăng kơ anak čô êdei dih ñu thâo klei bhiăn mnăm kpiê 3 mơ̆ng mnuih Jarai si ngă. Ƀuôn hmei bi êdah klei bhiăn mnăm kpiê 3".

Ai êwa mčhĭt muăt, bŏ hŏng êa mil mơ̆ng Hruê knăm Dhar kreh - Mjuăt ktang asei mlei dŭm djuê ana mnuih djuê ƀiă să Phú Túc amâo djŏ knŏng mđing ti wăl tač Phú Túc ƀiădah lŏ mčhĭt muăt hlăm êlan dơ̆ng. Dŭm klei ruĕ êbat hlăm êlan dơ̆ng, mdah tông čing, kdŏ čhuang mjing ai êwa mčhĭt muăt êdi. Dŭm klei bi lông mjuăt ktang asei mlei msĕ si tăp mdiê hŏng giê, ktŭng klei, kdŏ čhuang, đĭ kwưng mbĭt hŏng klei rang mdah kdrăp čŭt hô djuê ana đưm jak iêu lu mnuih ƀuôn sang alŭ wăl leh anăn phung tuê hiu čhưn ênguê mđĭ ai. Pŏk rup êdah êdi jing dŭm klei rang mdah kdrăp čŭt hơô djuê ana, đru bi mni kơ ênoh yuôm kdrăp čŭt hơô djuê ana leh anăn hưn mthâo kơ knhuah dhar kreh mơ̆ng mnuih Jarai. Amai Nay H'Dơ hriê mơ̆ng ƀuôn Lâm Viên brei thâo:

"Êpul rang mdah kdrăp čŭt hơô hmei mâo 7 čô. Mâo 2 êpul hơô kdrăp čŭt hơô djuê ana mơ̆ng đưm. Bi sa êpul mâo mniê hơô kdrăp djuê ana mrâo mrang. Mơ̆ng anăn brei kơ jih jang mnuih ƀuh, khădah klei hdĭp êlâo adih amâodah ară anei, kdrăp čŭt hơô dưi mdê mdê, ƀiădah ăt ba klei jăk siam mơ̆ng mnuih ƀuôn sang hmei pô"

Êngao kơ hdră bruă dhar kreh - mjuăt ktang asei mlei, Knăm mnia mblei mnơ̆ng dhơ̆ng lŏ hma OCOP să Phú Túc mâo 24 anôk rang mdah mnơ̆ng dhơ̆ng mơ̆ng 14 êpul mơ̆ng dŭm alŭ, ƀuôn, rang mdah lu mta mnơ̆ng ƀơ̆ng huă djuê ana jăk êdi msĕ si: kđeh čĭm êmô ƀhu sa mđiă, čĭm mnŭ ăm hŏng êsei brông, we (mta mnơ̆ng ƀơ̆ng djuê ana), kpiê čeh, trŏng phĭ hla hbei ƀlang, kan kô̆ Sông Ba ghang…jak iêu lu phung tuê hiu čhưn ênguê leh anăn mnuih ƀuôn sang alŭ wăl nao čhưn dlăng, blei yua, ƀơ̆ng.

Ngô Đức Mạo –Khua anôk bruă dhar kreh, hâo hưn leh anăn mjuăt ktang asei mlei să Phú Túc, čar Gia Lai bi mklă Hruê knăm dhar kreh - mjuăt ktang asei mlei dŭm djuê ana mnuih djuê ƀiă leh anăn Knăm mơak mnơ̆ng dhơ̆ng lŏ hma, hưn mthâo mnơ̆ng dhơ̆ng OCOP să Phú Túc tal I thŭn 2026 ba truh lu hdră bruă dhar kreh jăk siam. Hlăm Wăl anôk dhar kreh, phung mbruă lŏ mdah wĭt wăl anôk hdĭp mda êpul êya, mdah klei tông čing, hrĭ mñam, bi lông tăp mdiê, pơ̆k mñam, krah mkra rup leh anăn rang mdah kdrăp mnơ̆ng yua, kdrăp tông ayŭ djuê ana. Hluê anăn, đru mguôp kriê pioh, mđĭ lar knhuah dhar kreh dŭm djuê ana, hưn mthâo pŏk rup krĭng lăn, anak mnuih leh anăn dŭm mta mnơ̆ng jăk yâo mơ̆ng să Phú Túc, Gia Lai.

“Mơ̆ng leh pŏk ngă gru hmô bruă sang čư̆ êa alŭ wăl dua gưl truh kơ ară anei, bruă dhar kreh, mjuăt ktang asei mlei ti nah gŭ mâo klei êdu kƀah. Kyua anăn, thŭn anei hmei kčĕ kơ Knơ̆ng bruă sang čư̆ êa să mkŏ mjing Hruê knăm Dhar kreh - Mjuăt ktang asei mlei dŭm djuê ana mnuih djuê ƀiă kñăm kriê pioh, mđĭ lar knhuah dhar kreh mơ̆ng mnuih ƀuôn sang Jarai ti alŭ wăl. Khădah klei găl kơ prăk kăk dôk dleh dlan, hnơ̆ng mkŏ mjing ti gưl nah gŭ, ƀiădah truh ti wưng anei dŭm alŭ, ƀuôn mâo lu klei sa ai, hur har hriăm mjuăt, mprăp kdrăp yua. Hruê knăm mjing leh gru kruăk, jing tur knơ̆ng đru mguôp kriê pioh, krơ̆ng kjăp knhuah dhar kreh mơ̆ng mnuih ƀuôn sang Jarai."

Hruê knăm Dhar kreh - Mjuăt ktang asei mlei dŭm djuê ana mnuih djuê ƀiă leh anăn Sang mnia mnơ̆ng dhơ̆ng lŏ hma, hưn mthâo mnơ̆ng dhơ̆ng OCOP să Phú Túc gưl tal I thŭn 2026 đru mguôp bi msiam êa mil klei hdĭp mơ̆ng mnuih ƀuôn sang dŭm djuê ana. Klei bi mguôp plah wah kriê pioh knhuah dhar kreh djuê ana mơ̆ng đưm leh anăn hưn mthâo mnơ̆ng dhơ̆ng lŏ hma, mnơ̆ng jăk yâo đru mguôp bi kjăp klei bi mguôp êpul êya dŭm djuê ana, mbĭt anăn mjing boh kdrŭt mđĭ kyar bruă hiu čhưn ênguê hơĭt kjăp kơ alŭ wăl./.