Ti ƀuôn Hai, klei yăl dliê kriê pioh dhar kreh djuê ana dưi mphŭn mơ̆ng grăp gŏ sang. Êdah êdi msĕ si gŏ sang Y-Yak Byă, kreh iêo jing Aê Khuê. Ară anei gŏ sang ñu ăt djă pioh sa kdrăp čing leh anăn êbeh pluh boh čeh dŭm mta. Grăp thŭn, gŏ sang pô mkŏ mjing dŭm klei ngă yang msĕ si ngă yang pin êa, mak thŭn mrâo leh anăn nao hlăm dŭm hdră bruă čing čhar mơ̆ng ƀuôn sang. Aê Khuê brei thâo:

“Ară anei hmei ăt krơ̆ng kjăp leh anăn mtô bi hriăm dŭm boh tŭ yuôm dhar kreh djuê ana msĕ si tông čing leh anăn dŭm klei ngă yang kơ anak čô hlăm gŏ sang. Gŏ sang kâo bi hmô nanao hlăm bruă anei. Dŭm klei ngă yang mơ̆ng mnuih Êđê lu jơr, ngă yang ti sang amâodah ti pưk hma, ngă yang kơ yang čư̆, yang êa… Dŭm klei bhiăn, klei mưng jăk siam ăt dưi kriê pioh leh anăn hluê ngă nanao.”

Mơ̆ng klei thâo săng mơ̆ng grăp gŏ sang ti ƀuôn Hai  kyua anăn knhuah dhar kreh djuê ana Êđê dưi lŏ čuê. Hlăk êjai lu ƀuôn sang tuôm hŏng klei dleh dlan hlăm bruă kriê pioh dŭm mta bruă dhar kreh djuê ana snăn ti ƀuôn Hai, dŭm knăm ngă yang pin êa, knăm mơak hdĭp jŏk, klei bi kƀĭn čing čhar ăt dưi mkŏ mjing nanao. Mbĭt anăn, dŭm bruă dhar kreh mơ̆ng mnuih ƀuôn sang mâo nanao klei hrăm mbĭt, đru mơ̆ng dŭm hdră êlan mơ̆ng knŭk kna. Phung đảng viên, khua mduôn, mnuih mâo kơhưm kreh bi tuôm, mtrŭt mjhar mnuih ƀuôn sang nao hgŭm hlăm dŭm mta bruă dhar kreh êpul êya, mbĭt anăn mtô kơ phung mda asei dŭm klei jăk siam hlăm klei bhiăn djuê ana Êđê. Y-Bơ̆i Byă- Khua bruă Đảng ƀuôn Hai, să Čư̆ Mta, čar Dak Lak brei thâo

“Kâo mbĭt hŏng phung khua mduôn, phung mâo kơhưm mâo nanao klei mđĭ ai phung hđeh, mbĭt anăn drei srăng djă pioh nanao dŭm boh tŭ yuôm dhar kreh djuê ana hlăm klei hdĭp. Jih jang mnơ̆ng yua pioh ngă yang, ngă yang pin êa, akâo hjan leh anăn akâo klei suaih pral dưi djă pioh msĕ si êlâo adih."

Y-Bơ̆i Byă lŏ brei thâo, kyua mâo dŭm hdră êlan mơ̆ng knŭk kna leh anăn klei hgŭm kngan sa ai, snăn klei hdĭp mda mơ̆ng 132 gŏ sang hŏng êbeh 520 čô mnuih ti ƀuôn Hai ƀrư̆ hruê ƀrư̆ mlih mrâo. Bruă duh mkra ƀrư̆ đĭ kyar, mnuih ƀuôn sang ƀrư̆ thâo săng hĭn kơ bruă kriê pioh, bi lar knhuah gru dhar kreh djuê ana.

“Ară anei knơ̆ng bruă dhar kreh mđup brei kơ ƀuôn Hai sa kdrăp čing leh anăn dŭm kdrăp čŭt hơô djuê ana Êđê. Hlăm ai tiê mnuih ƀuôn sang bŏ hŏng klei mơak, mbĭt anăn phung mda asei ăt krơ̆ng kjăp knhuah bhiăn ngă yang leh anăn tông čing msĕ si sa knhuah dhar kreh jăk siam mơ̆ng ƀuôn sang. Hluê hŏng dŭm klei ngă yang amâodah klei ngă yang pin êa, mnuih ƀuôn sang hlăm ƀuôn krơ̆ng kjăp leh anăn lar bra hlăm klei hdĭp.”

 Kriê pioh dhar kreh djuê ana jing kriê pioh phŭn agha leh anăn lŏ čuê dŭm boh tŭ yuôm kơ dŭm ênuk gưl êdei. Hŏng klei hrăm mbĭt mơ̆ng gưl bruă Đảng, bruă sang čư̆ êa leh anăn mnuih ƀuôn sang, knhuah dhar kreh mơ̆ng mnuih Êđê ti ƀuôn Hai srăng lŏ dơ̆ng kriê pioh, jing klei bi mguôp êpul êya, đru mkŏ mjing klei hdĭp dhar kreh ƀrư̆ hruê ƀrư̆ lu jơr leh anăn mjing tur knơ̆ng kơ klei đĭ kyar hơĭt kjăp mơ̆ng ƀuôn sang./.