Sa aguah ti plao ksĭ Nhơn Châu (Cù Lao Xanh), dŭm boh mran trah mă kan ăt truh ti kdrŭn ksĭ msĕ hŏng grăp hruê. Knŏng mdê mă, ti kban kdrŭn ksĭ lŏ mâo thiăm lu măi mă rup, mdar video, ăngpul, phung kdŏ mmuñ leh anăn leh anăn dŭm êtuh čô tuê. Phung mưng leh hŏng ai hdĭp êđăp ênang mơ̆ng ƀuôn trah mă kan ară anei jing “phung hưn mdah” hlăm klei yăl dliê klei hdĭp aguah tlam mơ̆ng pô. Phung kdŏ mmuñ hluê phung trah mă kan nao ti êa ksĭ, ñu êa dlăng san hô, nao djăp bĭt anôk mơ̆ng plao ksĭ, blŭ hrăm hŏng mnuih ƀuôn sang alŭ wăl. Truh kơ mmông mlam, sa anôk kdŏ mmuñ dưi mdơ̆ng ti krah plao ksĭ iêo jak dŭm êbâo čô mnuih ƀuôn sang leh anăn phung tuê.

Amâo djŏ knŏng jing sa hdră kdŏ mmuñ, Nhơn Châu gưl tal êlâo dưi mâo dŭm êklăk čô ktuê dlăng hlăm kluôm ala thâo hŏng dŭm pŏk rup klă sĭt kơ anak mnuih leh anăn klei hdĭp ti plao ksĭ taih kbưi. Amai Hồ Thị Đoan Trang, mnuih ƀuôn sang alŭ Tây, să Nhơn Châu, brei thâo, mnuih ƀuôn sang hơ̆k mơak êdi êjai ƀuôn sang pô dưi ƀuh hlăm hdră mđung rup leh anăn mâo wưng mjĕ êrô hŏng phung kdŏ mmuñ:

“Kâo hơ̆k mơak kyua sui sin leh mâo sa hdră prŏng leh anăn iêo jak lu phung tuê hriê hŏng plao ksĭ Cù Lào Xanh hmei. Kâo hmăng hmưi jing plao ksĭ srăng mâo lu hdră prŏng hĭn čiăng mđĭ kyar bruă hiu čhưn ênguê”.

Nguyễn Tiến Dũng, khua dlăng bruă Đảng să Nhơn Châu brei thâo, sa ai mơ̆ng hdră klă sĭt đru kơ rup plao ksĭ dưi bi lar hlăm dŭm tur knơ̆ng hâo hưn, iêo jak thiăm lu phung tuê hriê ti alŭ wăl:

"Hlăm hdră “Say Hi rực rỡ” mrâo anei hlăm mbah hâo hưn mnuih ƀuôn sang, lu mnuih ƀuôn sang leh anăn phung tuê thâo kơ Nhơn Châu lu sơnăk. Kâo hmăng hmưi Nhơn Châu hŏng klei găl mơ̆ng hdră srăng iêo jak lu phung tuê čiăng hưn mdah rup, anak mnuih, klei hdĭp alŭ wăl leh anăn wăl anôk anei čiăng mđĭ kyar hlăm wưng kơ anăp.”

Mbĭt hŏng dŭm hdră mđung rup klă sĭt, Gia Lai ăt dôk yăl dliê klei hưn pô hŏng rup video. Hrô kơ mdar video hlăm anôk krip, lu êpul mkra film ruah dŭm alŭ wăl nao mbĭt hŏng hdră bruă Tây Sơn čiăng wĭt bi êdah sa wưng hƀuê ênuk hing ang. Kđông kahan, anôk hriăm mblah, đang war rông seh amâodah sang mnă dưi wĭt rŭ mdơ̆ng amâo djŏ knŏng čiăng đru kơ mdar video.

Leh mkra film, jih jang wăl anôk anei srăng dưi lŏ djă pioh msĕ si sa anôk mkra film, anôk phung tuê dưi mŭt hlăm wưng hƀuê ênuk, tui ksiêm kơ dhar kreh kơ krĭng lăn dưi dlăng jing anôk phŭn klei čăm Tây Sơn. Pô mkra film Võ Đức dôk hluê ngă sa hdră film rup ti să Tây Sơn brei thâo:

“Kâo hmăng hmưi dưi jĕ giăm hŏng phung tuê hŏng êa mil mrâo hluê si hdră bruă mâo sĭt čiăng mâo klei mjĕ giăm, mâo ai tiê leh anăn klă hŏng klei hdĭp aguah tlam, jĕ giăm hĭn hŏng grăp čô. Anôk anei dưi rŭ mdơ̆ng čiăng đru kơ phung tuê hiu čhưn ênguê, msĕ si sa mnơ̆ng kriê pioh điêt mâo êpul mkra film brei kơ ƀuôn sang pô”.

Tơdah film rup djă pioh klei đưm, klei mmuñ lŏ pŏk sa ƀăng bhă ba phung mda asei truh hŏng Gia Lai. Mega Concert "Gia Lai - truh ti êa ksĭ” hlăm knăm phŭn pŏk Thŭn hiu čhưn ênguê ala čar 2026 mkŏ mjing ti ƀuôn prŏng êa ksĭ Quy Nhơn bi kƀĭn lu phung kdŏ mmuñ hing ang, iêo jak hlăm brô 70.000 phung tuê mơ̆ng lu čar, ƀuôn prŏng. Mâo lu mnuih gưl tal êlâo hriê ti Gia Lai knŏng hlăm sa mlam kdŏ mmuñ, ƀiădah leh anăn lŏ mâo thiăm mmông tui ksiêm êa ksĭ, dliê leh anăn dhar kreh alŭ wăl. Pô mda asei Lê Thanh Phương Hạ, brei thâo:

“Kâo hriê mơ̆ng Nha Trang. Gưl tal êlâo alŭ wăl Dhŭng kwar krah pô mâo sa concert prŏng sơnăn, kyuanăn kâo nao yơh”.

Dŭm klei yăl dliê mơ̆ng klei mdung rup leh anăn klei mmuñ dôk ba wĭt boh tŭ dưn klă sĭt kơ klei đĭ kyar bruă hiu čhưn ênguê čar Gia Lai. Knŏng hlăm mlan 7/2026, čar drông hlăm brô 1,8 êklăk gưl čô tuê, đĭ 40% mkă hŏng wưng anei thŭn duh. Tĭng kluôm 7 mlan mâo êbeh 10,55 êklăk gưl čô tuê. Hlăm anăn, phung tuê ala tač êngao đĭ hlăm brô 77%. Hnư hrui wĭt mơ̆ng bruă hiu čhưn ênguê mâo giăm 23.000 êklai prăk, đĭ 22%.

Nah tluôn dŭm ênoh mrô anăn jing klei mlih mơ̆ng hdră ngă bruă hiu čhưn ênguê: mơ̆ng hưn mdah anôk truh kơ klei mbruă tui ksiêm, mơ̆ng hưn mdah wăl anôk siam jing klei yăl dliê ngă kơ phung tuê hiu čưn ênguê čŏng pô nao ksiêm dlăng. Hà Văn Siêu,  k’iăng khua kiă kriê anôk bruă hiu čhưn ênguê ala čar Việt Nam lač, čar Gia Lai čiăng bi lar hdră ngă bruă mrâo anei:

“Gia Lai si srăng ngă čiăng krơ̆ng kơ phung tuê hiu čhưn ênguê sui hĭn hŏng dŭm klei ksiêm êlam hin, hmư̆ dŭm klei yăl dliê jăk kơ sa anôk truh. Gia Lai ăt srăng ba yua klei mrâo mrang čiăng bi mlih klei čih hưn bruă hiu čhưn ênguê. Drei ba yua kdrăp mrâo yăl dliê kơ dŭm klei yăl dliê kơ Gia Lai jing klei srăng ngă, klei čuăn leh anăn bruă klam mâo kơ bruă hiu čhưn ênguê Gia Lai hlăm wưng kơ anăp.”

Gia Lai dôk ruah hdră mŭt hlăm klei ngă bruă kdŏ mmuñ amâo djŏ knŏng čiăng mkŏ mjing dŭm hdră êjai, ƀiădah čiăng kơ grăp hdră mđung rup, grăp hlâo film, grăp mlam kdŏ mmuñ jing sa klei iêo jak tui ksiêm kơ krĭng lăn. Leh anăn êjai grăp čô mnuih ƀuôn sang alŭ wăl jing sa kdrêč mơ̆ng klei yăl dliê anăn, hiu čhưn ênguê amâo djŏ knŏng hưn mdah, ƀiădah lŏ dưi ksul mbŭ hŏng knhuah gru leh anăn klei hdơr hlăm yang ƀuôn.