Găn dŭm thŭn mlan, sang yang Pô Sah Inư ăt kjăp  msĕ si klei bi mklă kơ hƀuê ênuk, kriê pioh dŭm ênoh yuôm dhar kreh jăk siam mơ̆ng djuê ana Chăm truh ti lăn Bình Thuận hđăp, ară anei jing čar Lâm Đồng. Hlăm wưng êgaô, mbĭt hŏng bruă răng mgang mnơ̆ng kriê pioh, dŭm bruă lông dlăng dhar kreh dưi mkŏ mjing nanao, boh nik jing gưl knăm mơak, Tết, wưng yan mdei prŏng, đru mguôp ba ai êwa mrâo kơ dŭm anôk truh  hiu čhưn ênguê sang yang Pô Sah Inư. Tue hiu čhưn Nguyễn Anh Tuân, hriê mơ̆ng čar An Giang brei thâo:

“Kâo ƀuh dŭm wăl anôk kriê pioh Chăm siam snăk, brei răng mgang dŭm mta mnơ̆ng kriê pioh dhar kreh kơ dŭm gŏ sang djuê ana Việt Nam êdei anei đĭ kyar jăk siam.”

Anôk kriê pioh sang yang Pô Sah Inư, jing sa anôk rŭ mdơ̆ng, mkra mjing, klei đăo êdah kdlưn mnuih Chăm adôk dưi kriê pioh kluôm ênŭm. Hŏng klei thâo mkra mjing mbruă, sang yang Pô Sah Inư dưi dăp hlăm Anăn Anôk kriê pioh ala čar leh anăn ara anei dôk jing sa hlăm dŭm anôk hiu čhưn ênguê  mâo lu tue hiu čhưn hlăm ala čar leh anăn ala tač êngao.

 Hriê tinei, phung tue lŏ dưi dlăng klei kdŏ Apsara mơ̆ng mnuih Chăm. Klei kdŏ hŏng asăp mmuñ, hlai mbĭt hlăm ênhiang dŭm mta kdrăp tông ayŭ djuê ana mnuih Chăm msĕ si : Hgơr ghinăng, hgơr paranưng, brô̆ saranai… mgei ai tiê mnuih. Êngao anăn, phung tue lŏ dưi lông ngă bruă mkra mnơ̆ng hŏng lăn čuh, bruă pơ̆k mñam mnuih Chăm. Bá Sinh Tý, Êpul kdŏ mmuñ ênhiang djuê ana Chăm ti Pô Sah Inư  brei thâo:

 “Êpul kdŏ muñ ênhiang djuê ana Chăm tinei sui leh. Pô ngă bruă kdŏ mmuñ leh anăn yua kdrăp tông ayŭ djuê ana Chăm, tue hiu čhưn khăp snăk. Tơdah đĭ dlăng hlăm sang Yang, phung tue mơak snăk dlăng klei kdŏ mmuñ djuê ana Chăm.”

Mbĭt hŏng bruă răng mgang mnơ̆ng kriê pioh, hlăm dŭm thŭn giăm anei Anôk bruă kriê dlăng wăl kriê pioh Pô Sah Inư mđing mđĭ hnơ̆ng jăk ngă bruă leh anăn bi lu dŭm mta bruă ngă lông dlăng kơ tue hiu hưn. Amai Châu Thị Cẩm Tú, tue hiu čhưn mơ̆ng čar Vĩnh Long brei thâo:

“Kâo ƀuh êđăp ênang snăk, kriêp ñăt leh anăn mâo ai êwa klei đăo. Kâo ƀuh ai êwa ăt msĕ si anak mnuih tinei khăp snăk kơ tue,  jĕ giăm. Kâo pô leh anăn jih gŏ sang mpŭ snăk leh anăn ƀuh, dưn kơ klei anăn.

 Bruă bi mguôp plah wah hiu čhưn dlăng, ksiêm hriăm klei hƀuê ênuk hŏng klei dlăng kdŏ mmuñ ênhiang djuê ana đru mjing mnơ̆ng dhơ̆ng hiu čhưn ênguê mâo knhuah mdê hjăn. Wăl mnơ̆ng kriê pioh sang yang Pô Sah Inư kdrưh kơăm dôk jing anôk truh jiă kma knhuah gru hƀuê ênuk, dhar kreh leh anăn klei đăo êpul êya mnuih Chăm hlăm krĭng wăl Ngŏ Lâm Đồng, ƀrư̆ hruê ƀrư̆ iêô jak lu tue hiu čhưn dlăng./.