Bruă ngă kñăm pŏk dŭm hdră bi hgŭm klă sĭt, grăp knhuang bi mlih klei găl jing mnơ̆ng dhơ̆ng, anôk ba čhĭ, wăl mnia blei leh anăn phung tue  hiu čhưn klă klơ̆ng plah wah Lâm Đồng leh anăn India. Hlăm hdră mjĕ êrô mkŏ leh anăn bi hgŭm mđĭ kyar hiu čhưn ênguê plah wah čar Lâm Đồng hŏng dŭm ƀĭng hgŭm India, 15 anôk bruă duh mkra, êpul hgŭm ngă bruă hiu čhưn ênguê hriê mơ̆ng ala čar lu mnuih ƀuôn sang hĭn lač kơ Việt Nam jing anôk truh mrâo mâo klei iêô jak prŏng kyua wăl hiu čhưn siam, ênoh bi liê djŏ guôp.

Võ Thành Huy, K'iăng  Khua Knơ̆ng bruă dhar kreh, mjuăt ktang asei mlei leh anăn hiu čhưn ênguê čar Lâm Đồng, brei thâo, mơ̆ng bruă thâo săng êlam kơ klei čiăng mơ̆ng phung tue hiu čhưn India, Lâm Đồng srăng mkŏ mjing dŭm mta mnơ̆ng dhơ̆ng djŏ guôp, hnơ̆ng jăk leh anăn klei dưi bi ktưn čiăng iêô jak tue hiu čhưn.