Aguah knhal jih hruê kăm, hlăm sang bi kƀĭn êpul êya ƀuôn Puăn, să Ea Phê, čar Dak Lak, ênai čing kwang mbĭt hŏng ênai mtô mơ̆ng pô thâo mbruă. Ti djiêo sang kƀĭn ƀuôn jig phung hđeh điêt gưl tal êlâo djă mnoh tông čing. Nah dih jing phung thâo mbruă hlăm ƀuôn dôk hriăm tông dŭm ênhiang čing đưm čiăng tông bi djŏ hĭn, kluôm ênŭm hĭn.

Sa nah jing ênai čing mơ̆ng dŭm bĕ kngan ka thâo tông, đa đa kpleh ênhiang mơh. Bi sa nah mkăn, phung thâo mbruă lu thŭn bi mguôp hŏng čing čar ăt lŏ kčưm mơ̆ng dŭm ênhiang čing thâo raih. Y- Čư̆ Ayŭn, êbeh leh 50 thŭn, ti ƀuôn Puăn, brei thâo:

“Êlâo dih kâo ăt thâo, ăt tông čing ƀiădah ka klă ôh, hriăm tông mă hŏng phung ƀĭng găp. Hruê anei hmei lŏ hriăm, ayŏng adei lŏ wĭt hriăm brei bi djŏ, brei thâo săng lu hĭn mâo dŭm tĭng hlăm să pô nao rang mdah klei kdŏ mmuñ, tông čing čhar, kdŏ čhuang. Anăn jing hdră bhiăn djuê ana Êđê pô, pô čiăng djă pioh brei êdei dih amâo mâo luč ram.”

Pô nao mtô jing pô thâo mbruă Y Phôn Ksơr. Sang  ti ƀuôn hgŭm Ƀuôn Ama Thuô̆t, ƀiădah leh mâo dhar bruă dhar kreh iêo jak, ñu amâo mâo uêñ ôh găn êlan êbeh 40km nao ti sang bi kƀĭn ƀuôn Puăn, să Ea Phê hlăm hră knhal jih hruê kăm, mtô klei pô thâo čiăng djă pioh klei yuôm mơ̆ng aduôn aê. Pô thâo mbruă Y Phôn Ksơr brei thâo, klei ñu uêñ mĭn hĭn jing klei soh hlăm bruă kriê pioh êjai ênai čing amâo dưi mtô djŏ.

“Anei jing sa klei găl brei pô mtô jih êjai dôk mâo klei găl, kyua grăp krĭng kwar mâo sa hdră tông mdê mdê ƀiădah kâo dôk hmăng hmưi jing mta phŭn djăp pô thâo sơăi. Êjai leh mtô, mtô klei tông čing kơ phung hđeh brei bi mâo djăp ring čing, wăt kơ čing knah, wăt kơ hgơr, wăt čing čhar čiăng kơ jing jang phung amuôn, phung adei, phung thâo mbruă thâo jih.”

Adŭ hriăm ti ƀuôn Puăn mâo hlăm brô 30 čô hriăm jing phung êdam êra nghiêk leh anăn phung thâo mbruă mnuih Êđê. Hlăm 25 mmông hriăm, êngao kơ hriăm tông čing, phung hriăm lŏ čih pioh, mdar video, bi mlih mrô dŭm ênhiang čing knhuah gru. Anei jing sa hlăm 3 adŭ mtô tông čing mâo knơ̆ng bruă dhar kreh, mjuăt ktang asei mlei leh anăn hiu čhưn ênguê čar Dak Lak mkŏ mjing hlăm wưng yan mdei prŏng thŭn anei čiăng ba klei kriê pioh wĭt hŏng êpul êya, ăt jing hdră dhar bruă dhar kreh alŭ wăl hluê ngă čiăng bi klă dŭm bruă klam mơ̆ng hdră mtrŭn mrô 80 hŏng dŭm mta bruă kriê pioh mtam mơ̆ng nah gŭ.

Hluê si Trần Hồng Tiến, Khua knơ̆ng bruă dhar kreh, mjuăt ktang asei mlei leh anăn hiu čhưn ênguê čar Dak Lak, leh čar ba mdah hdră mtrŭn mrô 03 kơ hdră êlan đru răng mgang leh anăn bi lar wăl anôk dhar kreh čing čhar, dhar bruă dhar kreh dôk mtô kơ dŭm alŭ wăl čŏng pô mkŏ mjing hdră êlan, dăp ai dưi čiăng ba dŭm hdră êlan klăm boh sĭt.

“Knơ̆ng bruă ăt đru kčĕ hŏng Bruă sang čư̆ êa čar kơ hdră êlan hluê ngă mta phŭn hdră mtrŭn, mâo hră mơar mtô kơ dŭm alŭ wăl djŏ tuôm hŏng dŭm mta phŭn, dŭm hdră êlan dưi lač hlăm hdră mtrŭn čiăng bi klă hnưm čiăng mâo hdră tă leh anăn đru kčĕ ba hlăm klei tĭng mkă ngăn prăk hlăm thŭn 2027. Nao mbĭt hŏng anăn ăt bi klă čiăng hluê ngă hdră mtrŭn răng mgang leh anăn bi lar dhar kreh klei Chòi. Anei jing 2 mnơ̆ng kriê pioh ala čar hluê ngă hdră ngă bruă mrô 14 mơ̆ng čar”.

Mơ̆ng bruă đru mtô čing, hluê ngă bruă kriê pioh klei mmuñ Chòi truh kơ ngă hră mơar dŭm mnơ̆ng kriê pioh mrâo, Dak Lak dôk ƀrư̆ ƀrư̆ ba dŭm mta bruă kriê pioh dhar kreh knhuah gru lŏ wĭt hŏng êpul êya. Mta kñăm amâo mâo mdei hŏng bruă kriê pioh, ƀiădah lŏ mkŏ mjing klei găl čiăng kơ dŭm boh tŭ dhar kreh lŏ dơ̆ng dưi hluê ngă leh anăn ba jao hlăm klei hdĭp.

Ƀiădah, kriê pioh knhuah gru amâodưi čang guôn hlăm dŭm adŭ hriăm amâodah dŭm hdră bhiâo. Anei jing hdră sui, čiăng mâo klei hrăm mbĭt mơ̆ng bruă kđi čar, mơ̆ng bi kluôm hdră êlan truh kơ dăp mnuih mă bruă leh anăn mkŏ mjing hluê ngă. Y Nhuân Ƀuôn yă, k’iăng khua Bruă sang čư̆ êa čar Dak Lak lač, Hdră mtrŭn mrô 80 mơ̆ng gưl dlông jing tur knơ̆ng yuôm bhăn brei dŭm alŭ wăl mkŏ mjing hdră êlan leh anăn mđing tal êlâo kơ bruă kriê pioh dhar kreh mơ̆ng nah gŭ.

“Hdră mtrŭn mrô 80 jing hdră mtrŭn kmeh gơ̆ng, klă klơ̆ng čiăng hluê ngă bruă kriê poih dhar kreh djuê ana hlăm dŭm mnơ̆ng kriê pioh amâo mâo êdah klă msĕ si čing čhar leh anăn đa đa mta phŭn mkăn. Mta phŭn anei ăt čiăng tĭng mkă, mâo hdră êlan hluê ngă klă klơ̆ng, mbha kơ dŭm anôk bruă”.

Hdră mtrŭn mrô 80 mkŏ mjing leh tur knơ̆ng brei dŭm alŭ wăl mkŏ mjing dŭm hdră êlan bi mguôp hlăm boh sĭt. Hŏng Dak Lak, bi klă hdră mtrŭn mrô 80 amâo djŏ knŏng hluê ngă dŭm bruă klam kriê pioh, ƀiădah lŏ mkŏ mjing klei găl čiăng kơ grăp ƀuôn sang, grăp čô thâo mbruă leh anăn phung mda asei hrăm mbĭt jing pô mơ̆ng bruă kriê pioh dhar kreh, mkŏ mjing thiăm klei găl čiăng dưi kriê pioh mơ̆ng êpul êya.