Anei jing anei dôk kreh mkra mnơ̆ng hŏng mta prăk mơ̆ng gŏ sang Đinh Văn Cần lehanăn Đàng Thị Mỹ Trâm ti alŭ Bàu Trúc, să Ninh Phước, čar  Khánh Hoà. Ti anăp dring sang, amai Kinh Thị Mộng Ngưng – anak Cần lehanăn Trâm dôk lŏ čuê bruă aê ama pô mơ̆ng đưm. Amâo mâo maĭ mŏk, knŏng mâo mnơ̆ng ktir lehanăn kmŭt, bhiâo riâo rit dưi mjing leh mnơ̆ng siam. Amai Ngưng brei thâo, dŭm hruê tal êlâo mrâo hriăm bruă, ñu ngă amâo jing ya mta mnơ̆ng ôh, ƀiădah leh mưng kngan, ară anei ñu thâo mkra lu leh. Ênai krah mkra mnơ̆ng hŏng mta prăk ară anei juăt mưng leh hlăm klei hdĭp grăp hruê hruê mơ̆ng gŏ sang amai.

Tal êlâo mrâo hriăm, mkra lah nanao ƀiădah amâo jing ya mta mnơ̆ng ôh. Ƀiădah grăp hruê gĭr hriăm mkra ƀ’ƀiă, kyua bruă anei gơ̆ čiăng kơ klei gĭr lehanăn kriăng kơh dưi ngă. Dleh êdi jing hdră kreh mkra ti mbah. Amĭ kâo djăp hdră mkra thâo ngă jih, bi ama kâo lu jing ñu mkra bi mjing rup siam. Ăt čang hmăng phung čô anak êdei adih srăng mâo mnuih hriăm, tơdah amâo hriăm huĭdah bruă anei srăng luič ram.

Kinh Văn Cần lehanăn Đàng Thị Mỹ Trâm thŭn anei êbeh 70 thŭn leh, dua ung mô̆ ñu găn leh dŭm thŭn êngŭn mlan hŏng bruă krah mkra mnơ̆ng hŏng mta prăk anei. Ară anei thŭn leh khua, grăp hruê diñu ăt gĭr krah mkra mnơ̆ng, bruă hŏng mnuih mda asei dleh mơh dưi tui tiŏ diñu. Dŭm mta mnơ̆ng mâo mkra msĕ si: Mtĭl dưm êhăng, huôm dưm êhăng, tŏ dưm djah êhăng, hlao dưm mnơ̆ng… Anei jing dŭm mta mnơ̆ng mâo mnuih djuê ana Čam yua lu hlăm knăm mơak Katê, Ramưwan, dŭm klei bhiăn hlăm akŏ thŭn amâo dah knăm bi kuôl, bi êmuh…

Đàng Thị Mỹ Trâm brei thâo, mnơ̆ng điêt dưm êhăng, boh mnang, mnơ̆ng prŏng dưm boh kroh, jih jang čiăng myơr ngă yang. Mnga ti mnơ̆ng anei ba mơĭt klei mĭn yuôm bhăn êdi mơ̆ng mnuih Čam.

Tal êlâo jing aê aduôn mkra, êdei anei lŏ čuê kơ hmei. Kâo dôk ung lŏ čuê, lŏ mtô kơ ung. Leh aduôn aê luič, ung mô̆ hmei lŏ čuê bruă anei truh kơ ară anei. Pô knŏng thâo mkra, mâo mnuih hriê truh ti sang blei lŏ ba čhĭ ti lu anôk mkăn, êngao čar mâo mơh. Kyua mâo bruă anei, kâo dưi rông leh 9 čô anak nao hriăm hră, ară anei, diñu mâo bruă mă leh sơaĭ.

Hŏng klei kreh kriăng, klei siam mơ̆ng grăp mta mnơ̆ng mbĭt hŏng kơhưm hlăm bruă kyua anăn phung tuê blei mơ̆ng diñu amâo djŏ knŏng ti Khánh Hòa ƀiădah mâo wăt ti dŭm čar mkăn, msĕ si Lâm Đồng, Đồng Nai, Tây Ninh, Ƀuôn prŏng Hồ Chí Minh. Bá Minh Truyền, pô mă bruă tui ksiêm kơ knhuah gru Sang kriê pioh mnơ̆ng Khánh Hòa brei thâo, bruă kreh mkra mnơ̆ng hŏng mta prăk mơ̆ng mnuih Čam hing ang êlâo adih, ară anei hlăk dôk luič ram, myun mơh mâo sa gŏ sang mnuih djuê ana Čam ti Bàu Trúc ăt dôk krơ̆ng kjăp bruă anei.

Hŏng mnuih Čam, dŭm mta mnơ̆ng kreh mkra hŏng mta prăk yuôm êdi. Si tô hmô, hlao dưm êhăng, boh mnang… anei jing mnơ̆ng mnuih Čam mpŭ êdi, djŏ hlăm wưng ngă yang kơh ba yua, ngă yang kơ aê aduôn atâo atiêt, bi êdah klei mpŭ kơ yang kơ aduôn aê atâo atiêt pô.

Êbeh 40 thŭn siă suôr hŏng bruă kreh mkra mnơ̆ng hŏng mta prăk, ung mô̆ Kinh Văn Cần đru krơ̆ng kjăp leh bruă djuê ana đưm mơ̆ng gŏ sang lehanăn mkăp kơ klei hdĭp dhar kreh, ai tiê klei mĭn mơ̆ng mnuih Čam.

Đàng Chí Quyết, Khua bruă Đảng alŭ Bàu Trúc, să Ninh Phước, čar Khánh Hoà brei thâo, alŭ wăl ară anei mâo dua ƀuôn bruă hing ang jing ƀuôn mkra mnơ̆ng hŏng lăn čuh Bàu Trúc lehanăn bruă pơ̆k mñam mnơ̆ng Mỹ Nghiệp. Knŏng ti alŭ Baù Trúc lŏ mâo lu ƀuôn mkra mnơ̆ng hŏng mta prăk hing ang. Bruă anei ăt mâo alŭ wăl tă hdră hlăm hdră ngă bruă čiăng mdĭ kyar bruă hiu čhưn ênguê hŏng bruă mkra mnơ̆ng hŏng lăn čuh.

Čang hmăng bruă knŭk kna dŭm gưl, dhar bruă djŏ tuôm mđing kơ hdră mtrŭn mjuăt bi hriăm bruă, mjing klei găl ngă hră mơar čiăng bi mklă ung mô̆ Cần, Trâm jing Pô mbruă êdah kdlưn. Čiăng mđĭ ai diñu, đru lŏ mtô kơ ênuk gưl êdei.

Tơdah dưi mđing duh bi liê, bruă mkra mnơ̆ng hŏng mta prăk mơ̆ng mnuih Čam srăng dưi krŭ wĭt hŏng bruă mkra mnơ̆ng hŏng lăn čuh Bàu Trúc mjing leh dŭm hdră hiu čhưn jăk siam, anăn jing klei hriăm mbĭt mơ̆ng knhuah gru Chăm Pa hŏng klei mĭn đăo tinei lehanăn ƀuôn bruă djuê ana đưm, mjing kơhưm hiu čhưn dhar kreh mơ̆ng čar Khánh Hòa.