Ti krah klei mtah mda mơ̆ng dliê Nâm Nung, ênai êa mơ̆ng drai Leng Ôm Rveh kwang ti krah čư̆ dliê msĕ si klei iêô jak phung tuê hiu čhưn ênguê hriê dlăng krĭng lăn jiă knhuah gru mơ̆ng mnuih M’nông, Y Krêu, Khua êpul hiu dlăng lăn mnga êa mak mơ̆ng Êpul hiu chưn ênguê êpul êya Yôk Nâm Nung, să Nâm Nung, čar Lâm Đồng brei thâo:

“Hluê si klei phung khua mduôn yăl dliê, hlăk đưm ti krĭng anei mâo sa drei êman arăng kdâo hlăm drai leh anăn djiê ti anei, sa wưng êdei asei êman ƀâo mnâo snăn kơh mnuih ƀuôn sang thâo. Mnuih ƀuôn sang alŭ wăl mă klei yăl dliê anăn čiăng pia anăn drai êa jing ‘Ôm Rveh’. Tơdah hưn mthâo hŏng phung tuê hiu čhưn ênguê, hmei kreh mblang klei mak jing ‘ Drai Êman Thúi’ čiăng kơ phung tuê ênưih hdơr hĭn. Yan anei nao jăk êdi, adiê êđăp, êa êngeh, dliê mtah, kyuanăn mâo lu phung tuê khăp êdi”.

Klei yăl dliê anăn dưi lŏ čuê mơ̆ng ênuk anei truh kơ ênuk mkăn amâo djŏ knŏng ngă kơ gưl nao čhưn mâo klei jăk hĭn, ƀiădah lŏ jing hdră čiăng kơ mnuih M’nông djă pioh klei bi hdơr mơ̆ng ƀuôn sang. Mơ̆ng dŭm boh tŭ yuôm dhar kreh anăn, thŭn 2022, mnuih ƀuôn sang dŭm ƀuôn Ja Răh, Yôk Ju lehanăn R’Cập hrăm mbĭt mkŏ mjing Êpul hiu čhưn ênguê yang ƀuôn Yôk Nâm Nung hŏng klei čang hmăng ba dhar kreh djuê ana truh giăm hĭn hŏng phung tuê hiu čhưn ênguê. Ară anei êpul mâo êbeh 40 čô, mbha jing dŭm êpul dhar kreh djuê ana, homestay, tui ksiêm kơ lăn adiê leh anăn mnơ̆ng ƀơ̆ng huă, grăp čô ngă sa kdrêč bruă, hrăm mbĭt mkŏ mjing dŭm mta bruă hiu čhưn ênguê jiă kma ai êwa mơ̆ng klei hdĭp mnuih M’nông.

          Hriê ti Yôk Nâm Nung, phung tuê amâo djŏ knŏng dưi nao dlăng dŭm kdrăn dliê hrông, dŭm drai êa kdrưh kơăm ƀiădah lŏ dưi ktuê dlăng klei hdĭp êđăp ênang mơ̆ng ƀuôn sang, leh anăn ksiêm hriăm kơ knhuah gru cách mạng ti Wăl knhuah gru hƀuê ênuk ala čar anôk krŭ dơ̆ng B4 - mlir čar Nâm Nung. Boh nik, hlăm dŭm knăm mơak msĕ si Tăm Blang M’Prang amâodah knăm akâo hjan, phung tuê dưi hrăm mbĭt hŏng wăl anôk dhar kreh M’nông hŏng ênai čing čhar, dŭm ênhiang mmuñ djuê ana, bruă pơ̆k mñam, hrĭ mñam...

Mbĭt hŏng anăn, phung tuê hiu čhưn ênguê dưi ƀơ̆ng dŭm mta mnơ̆ng knhuah gru msĕ si djam trŏng phĭ, djam brông tŭk mơ̆ng knăt hwiê leh anăn hla hbei ƀlang, mnŭ ăm hŏng hdăm sao, êsei brông mơô, hla ƀlang đeh, kpiê čeh... H Thương, K’iăng khua Anôk bruă dhar kreh–yang ƀuôn Êpul gơ̆ng bruă ƀuôn sang să Nâm Nung, Khua anôk bruă kriê dlăng Êpul hiu čhưn ênguê yang ƀuôn Yôk Nâm Nung brei thâo:

“ Êpul hiu čhưn ênguê êpul êya hmei mrâo anei drông lu êpul tuê mơ̆ng Italia, ƀuôn prŏng Hồ Chí Minh, Hà Nội. Boh nik hlăm wưng knăm mơak, phung tuê hiu čhưn ênguê lu êdi. Lu phung tuê ala tač êngao khăp hdĭp mbĭt hŏng mnuih ƀuôn sang čiăng ksiêm hriăm kơ klei bhiăn, klei mưng leh anăn klei hdĭp mda mnuih ƀuôn sang. Hmei ngă bruă hiu čhưn ênguê êpul êya bi mguôp hŏng Ƀuôn Čuah, să Nam Đà mơh, tinăn mâo lu anôk siam, bi hmei mâo êpul dhar kreh djuê ana truăn kơ bruă mdah klei kưt muiñ ênhiang djuê ana, tông čing čhar mkăp kơ tuê hriê čhưn. Êngao drông tuê ti alŭ wăl, hmei lŏ mâo dŭm anôk hiu čhưn ênguê msĕ si Drai Sap jak iêu hriê mdah kơ dŭm êpul tuê hiu dlăng".

Trần Kim Tuyền, Kiăng Khua adŭ bruă dhar kreh- ala ƀuôn să Nâm Nung brei thâo, alŭ wăl dôk gĭr mđĭ lar klei găl mâo kơ lăn mnga êa mak, knhuah gru cách mạng leh anăn dhar kreh jăk siam čiăng mđĭ kyar bruă hiu čhưn ênguê yang ƀuôn. Klă klơ̆ng, bruă Đảng, bruă knŭk kna alŭ wăl dôk lŏ dơ̆ng tă hdră êlan mđĭ kyar bruă hiu čhưn ênguê nao mbĭt hŏng Wăl anôk B4 - mlir čar IV Nâm Nung, mbĭt anăn mkŏ hŏng dŭm anôk hiu chưn ênguê leh anăn dŭm êpul êya mnuih ƀuôn sang jĕ giăm iăng mjing thiăm dŭm mta mnơ̆ng tui ksiêm jăk siam.

“Ară anei Êpul hiu čhưn ênguê êpul êya Yôk Nâm Nung mâo 42 čô hgŭm. Să tă hdră mđĭ kyar bruă hiu čhư̆n ênguê êpul êya mguôp hŏng Wăl anôk B4 - mlir čar IV Nâm Nung jing knhuah gru hƀuê ênuk ala čar. Lu phung mda asei alŭ wăl ăt nao hgŭm đru, klă anăp atăt tuê hiu čhưn hlăm dliê, tui ksiêm kơ lăn adiê, êa jua lehanăn dŭm hdră bruă tui ksiêm. Êngao kơ Êpul hiu čhưn ênguê yang ƀuôn Yôk Nâm Nung, să ăt tă hdră êlan mđĭ kyar bruă hiu chưn ênguê ti ƀuôn Quảng Hà mơ̆ng mnuih Dao leh anăn mkŏ mjing dŭm anôk mnia mblei mnơ̆ng ƀơ̆ng huă čiăng bi mguôp hŏng bruă ngă hiu čhưn ênguê hlăm yang ƀuôn mơ̆ng ƀuôn Ja răh.”

Ti krah klei hdĭp ênuk mrâo mrang, mnuih Mnông ti Yôk Nâm Nung, să Nâm Nŭng, čar Lâm Đồng ăt krơ̆ng kjăp ênai čing čhar, djă pioh dŭm ênhiang mmuñ djuê ana, bruă mă đưm leh anăn knhuah hdĭp ƀuôn sang. Bruă hiu čhưn ênguê êpul êya amâo djŏ knŏng pŏk klei găl mđĭ kyar bruă duh mkra ƀiădah lŏ jing kdrông mkŏ čiăng kơ dŭm boh tŭ dhar kreh mơ̆ng mnuih M’nông dưi kriê pioh, bi lar.