Hlăm êbeh sa mlan, 6 adŭ mtô bi hriăm tông čing, kdŏ čhuang lehanăn mjuăt bi hriăm hdră hiu čhưn ênguê êpul êya dưi mkŏ mjing ti dŭm ƀuôn mnuih djuê ana Êđê ti alŭ wăl ƀuôn hgŭm Ƀuôn Ama Thuôt, čar Dak Lak jak iêu êbeh 130 čô hriăm nao hgŭm. Hlăm anăn, dŭm adŭ tông čing mâo 60 čô hriăm, điêt hĭn 8 thŭn, prŏng hĭn 35 thŭn. Êngao kơ dŭm klei tông čing phŭn, phung hriăm lŏ mâo phung thâo mbruă mtô dŭm klei tông čing kdlưn hĭn čiăng mkăp kơ klei mdah hlăm knăm mơak leh anăn bruă hiu čhưn ênguê. Dŭm adŭ kdŏ čhuang ăt bi mguôp boh phŭn leh anăn kdlưn hĭn, đru kơ phung hriăm mjuăt klei mdah leh anăn thâo săng hĭn ênoh yuôm mơ̆ng hdră kdŏ djuê ana. Jing sa hlăm phung hriăm nao hgŭm hlăm adŭ kdŏ čhuang, H'Na Si Mlô, ti ƀuôn Đung, ƀuôn hgŭm Ƀuôn Ama Thuôt, brei thâo, amâo djŏ knŏng hriăm dŭm ênhiang kdŏ, ñu lŏ thâo săng hĭn klei yuôm bhăn mơ̆ng grăp ênhiang kdŏ, mơ̆ng anăn lŏ khăp lehanăn čang hmăng kriê pioh klei jăk siam dhar kreh mơ̆ng djuê ana pô.

“Kâo čang hmăng jing mâo lu mmông hriăm msĕ snei kơ phung hđeh hlăm ênuk gưl êdei, ăt dưi thâo kơ klei kdŏ čhuang, čiăng kơ klei kdŏ anei amâo mâo luč ram ôh.”

Nao mbĭt hŏng anăn, tlâo adŭ mjuăt bi hriăm klei thâo ngă bruă hiu čhưn ênguê êpul êya mâo nai mtô Sang hră Cao đẳng hiu čhưn ênguê Sài Gòn klă anăp mtô mjuăt kơ phung hriăm ti ƀuôn Akŏ Dhông klei thâo kơ bruă đru kơ tuê, đru kơ mnơ̆ng ƀơ̆ng huă leh anăn mkŏ mjing gru hmô klei hiu čhưn ênguê êpul êya.

Aduôn Phạm Thị Hải Bình, Kiăng khua Anôk bruă mkăp brei hdră bruă knŭk kna ƀuôn hgŭm Ƀuôn Ama Thuôt brei thâo, bruă bi mguôp mtô bi hriăm čing čhar hŏng mjuăt bi hriăm hdră hiu čhưn ênguê êpul êya jing hdră êlan nao mrâo kñăm mjing êpul čô̆ kơ bruă dưi kriê pioh dhar kreh djuê ana mơ̆ng đưm, lŏ mđĭ lar boh tŭ yuôm mnơ̆ng dhơ̆ng alŭ wăl mkăp kơ hdră mđĭ kyar bruă hiu čhưn ênguê.

“Thŭn anei, êngao kơ dŭm adŭ mtô bi hriăm tông čing, kdŏ čhuang, ƀuôn hgŭm bi hgŭm hŏng Sang hră Cao đẳng hiu čhưn ênguê Sài Gòn pŏk tlâo adŭ mđĭ klei thâo đru kơ phung tuê hiu čhưn ênguê, mđĭ klei thâo đru kơ mnơ̆ng ƀơ̆ng huă hŏng dŭm gŏ sang mâo mnơ̆ng ƀơ̆ng huă leh anăn mkŏ mjing gru hmô hiu čhưn ênguê êpul êya. Mơ̆ng dŭm adŭ hriăm, phung hriăm dưi mprăp thiăm klei thâo čiăng ƀrư̆ ƀrư̆ mkŏ mjing dŭm gru hmô hiu čhưn ênguê ti alŭ wăl".

Mjưh ruê̆ dŭm gưl hriăm, lu phung hriăm dưi lông tông čing, kdŏ čhuang leh anăn thâo kơ dŭm klei thâo hlăm bruă tŭ drông, đru kơ phung tuê hiu čhưn ênguê. Klei bi hmô anei dưi čang hmăng đru mguôp kriê pioh Wăl dhar kreh čing čhar Lăn Dap Kngư mguôp hŏng mđĭ kyar bruă hiu čhưn ênguê êpul êya, mjing hdră duh ƀơ̆ng ti dŭm ƀuôn sang./.