Hruê 30/8, să Vân Hoà, čar Dak Lak, mkŏ mjing knăm tŭ mă anăn knăl ana kyâo Knhuah gru Việt Nam hŏng 1 ana Kam  (lŏ pia ana Kriăl) leh anăn 3 boh sač (lŏ pia jing boh sač Hrah), mrâo mâo Êpul hgŭm răng mgang lăn adiê leh anăn wăl hdĭp mda Việt Nam tŭ yap. 3 boh sač hrah mâo hnơ̆ng thŭn êbeh 200 thŭn leh anăn ana Kam  êbeh 350 thŭn leh. Ana boh sač hrah ba leh kơ mnuih ƀuôn sang dŭm êtuh yan boh mmih, bi ana Kam brei leh ktăk tram ƀrăm mơ̆ng dŭm hruê tal êlâo phung đưm pŏk lăn, lua mnah bi mtlaih klei hdĭp, bi kdơ̆ng hŏng roh plah ala.

Mơ̆ng sui leh, dŭm phŭn kyâo Knhuah gru anei jing leh gru kruăk hƀuê ênuk, jing dhar kreh, jing klei jăk siam mơ̆ng krĭng lăn leh anăn klei ktưn hưn mơ̆ng mnuih ƀuôn sang alŭ wăl. Ayŏng Lê Quốc Nam, să Vân Hoà, čar Dak Lak ktưn hưn.

"Ana Kam anei snăn ñu găn leh dŭm thŭn dôk kjăp găn leh dŭm gưl angĭn êbŭ, dŭm klei amâo mâo jăk mơ̆ng yan adiê, ñu ăt dôk kjăp, ñu ăt dôk dơ̆ng mơh. Snăn ana Kam  anei hŏng mnuih ƀuôn sang ăt jing anôk jưh knang hlăm ai tiê prŏng. Leh anăn ñu ăt bi êdah msĕ hŏng knhuah anak mnuih tinei mơh."

Mbĭt hŏng bruă tŭ mă anăn knăl ana kyâo kriê pioh, să Vân Hòa mkŏ mjing leh klei mdah wĭt anôk čhĭ mnia Đồn ti gŭ phŭn  Kam . Anei jing anôk čhĭ mnia mâo leh mơ̆ng dŭm êtuh thŭn êlâo ti ktuê êlan knhuah gru mkŏ mơ̆ng krĭng êa ksĭ truh kơ krĭng čư̆ čhiăng. Mbĭt anăn mtrŭt mđĭ dŭm hdră bruă hưn mthâo, mkŏ hgŭm phung duh mkra leh anăn êpul hgŭm bruă ti krĭng lăn Vân Hòa; mđĭ dŭm hdră bruă hiu čhưn ênguê lăn mnga êa mơak mguôp hŏng nao čhưn dlăng dŭm đang boh sač hrah - mta ana kyâo jăk êdi mơ̆ng krĭng lăn anei.

Phạm Quốc Hoàng, K’iăng khua Anôk bruă sang čư̆ êa să Vân Hòa brei thâo, thâo săng klă boh tŭ yuôm, bruă klam mơ̆ng ana kyâo kriê pioh, bruă sang čư̆ êa mbĭt hŏng mnuih ƀuôn sang ăt mđing êdi kơ bruă kriê pioh leh anăn mđĭ lar boh tŭ yuôm dŭm ana kyâo prŏng:

"Hmei dôk mâo hdră kčah jing srăng lŏ ktuê dlăng dŭm ana kyâo anei leh anăn srăng iêo jak phung thơ̆ng kơ bruă gưl dlông hlăm bruă dliê kmrơ̆ng hriê čiăng mkŏ mjing klei hriăm mjuăt, đru kčĕ hdră dlăng kriê, răng mgang ana boh sač hrah leh anăn ana Kam  anei čiăng kơ ñu đĭ jing jăk hĭn leh anăn mnuih ƀuôn sang dưi ba yua bruă hiu čhưn ênguê dưi jăk hĭn."

Ară anei ti nah Ngŏ čar Dak Lak mâo 25 ana kyâo Knhuah gru dưi tŭ yap. Êngao kơ ana  Kam leh anăn 3 ana boh sač Hrah mrâo lač, lŏ mâo wăl anôk 20 ana suai prŏng ti Wăl kriê pioh hƀuê ênuk dhar kreh ala čar sang yơng Từ Quang, să Tuy An Bắc leh anăn 1 ana kyâo Bồ Đề êbeh 200 thŭn ti wăl kriê pioh ala čar Sang bi hdơr kơ pô thâo mbruă Lương Văn Chánh.

Nguyễn Thành Sơn, K'iăng khua adŭ bruă dhar kreh - yang ƀuôn, ƀuôn hgŭm Phú Hoà 2, čar Dak Lak brei thâo, dŭm gŏ sang, êpul êya mâo ana kyâo kriê pioh jih jang bi mđĭ ai tiê bruă klam, hrăm mbĭt kriê pioh boh tŭ yuôm "dhar kreh mtah" anei:

"Grăp thŭn snăn hmei mđrăm mbĭt mtrŭt mjhar gŏ sang, găp djuê leh anăn mnuih ƀuôn sang, boh nik jing êlâo kơ yan hjan jing hmei khăt mkra, bi mdoh, huĭdah mâo klei truh jing ana kyâo êbuh hlăm adiê hjan angĭn êbŭ."

Grăp êtuh thŭn êgao, dŭm phŭn kyâo prŏng - kyâo Kriê pioh ăt kjăp agha, lŏ dơ̆ng đĭ jing, mâo ƀuh msĕ si mnơ̆ng bi klă mơ̆ng sa krĭng lăn, nao hlăm klei bi hdơr mơ̆ng lu gưl ênuk. Bruă kriê pioh kyâo Kriê pioh Việt Nam amâo djŏ knŏng mâo boh tŭ yuôm kơ wăl hdĭp mda, lu jơr mnơ̆ng dhơ̆ng hdĭp, ƀiădah lŏ jing klei mpŭ mni kơ hƀuê ênuk, klei hdơr knga kơ phung đưm mâo leh ai tiê pŏk phai, mkŏ mjing bruă duh mkra, kriê pioh kơ hruê anei leh anăn êdei anăp./.