Tlam trŭn ti ƀuôn Đăk Trăm 1, să Kon Đào, čar Quảng Ngãi. Leh sa hruê mă bruă pưk hma, wăl sang Pô mbruă êdah êdi A Thu lŏ kwang ênai čing, t'rưng, klông put, đĭng boh tâo. Mnuih prŏng, phung êdam êra, mâo wăt phung hđeh điêt duah nao hriăm. Mnuih hriăm čing, mnuih lông tông, mnuih mđing hmư̆ A Thu mkra grăp ênai.

Hlăm hdră kriê pioh lehanăn mđĭ lar boh tŭ yuôm ênhiang mmuñ djuê ana, A Thu amâo djŏ knŏng jing mnuih thâo tông čing, ƀiădah ñu lŏ čŏng tui ksiêm, mkra lehanăn krŭ wĭt lu kdrăp tông ayŭ djuê ana. Boh nik, mơ̆ng thŭn 2017, ñu mphŭn tui ksiêm kơ đĭng boh tâo. Mơ̆ng 5 ƀĕ đĭng boh tâo tal êlâo, A Thu gĭr lông lông, bi mklă hnơ̆ng čiăng mđĭ kyar jing kdrăp đĭng boh tâo 15 ƀĕ. Mbĭt hŏng čing, t'rưng, klông pút, đĭng pah, hgơr…, dŭm kdrăp tông ayŭ anăn jing leh sa kdrêč hlăm dŭm hdră mdah mơ̆ng êpul phung thâo mbruă mâo ñu gĭt gai. A Thu lač:

"Mơ̆ng leh kâo mâo jih jang mnuih thâo, diñu iêo kâo hriê mtô tông čing. Ya să mâo čing diñu iêo kâo hriê mtô. Mơ̆ng anăn truh kơ ară anei kâo mtô leh êbeh sa êtuh gưl leh. Kâo nao mtô ti dŭm boh sang hră, sang hră gưl 2 leh anăn sang hră knŭk kna čiêm rông. Ya alŭ ƀuôn mâo klei čiăng čiăng hriăm tông čing kâo nao mtô. Kâo mtô tông čing mbĭt anăn lŏ ngă bruă mkra čing; êngao anăn lŏ mtô brô̆ klông pút, t'rưng, brô̆ boh tâo tui si klei čiăng mơ̆ng phung hriăm."

Klei yuôm bhăn ti pô thâo mbruă A Thu amâo djŏ knŏng dôk ti klei ñu thâo tông amâodah mkra kdrăp tông ayŭ. Ñu dôk gĭr čiăng kơ phung mda asei hlăm ƀuôn ăt thâo tông, thâo hmư̆ leh anăn thâo săng klei yuôm bhăn mơ̆ng dŭm ênai anăn. Êpul tông čing, kdŏ čhuang leh anăn kdrăp tông ayŭ djuê ana mơ̆ng A Thu mkŏ mjing mâo dŭm pluh čô, mâo wăt mnuih khua thŭn leh anăn phung mda asei. Mơ̆ng thŭn 2019 truh kơ ară anei, êpul lu blư̆ nao hgŭm hlăm dŭm klei bi lông, klei kdŏ mmuñ, bi lông hlăm leh anăn êngao čar. Thŭn 2025, phung thâo mbruă lŏ ba dŭm ênai čing Xơ Đăng truh ti Ƀuôn dhar kreh - hiu čhưn ênguê dŭm djuê ana Việt Nam ti Đồng Mô, Hà Nội. Pô thâo mbruă A Hương, 47 thŭn, ti alŭ Đăk Trăm 1, jing sa hlăm phung siă suôr lu thŭn hŏng êpul mơ̆ng A Thu ƀuh:

“Êlâo dih kâo knŏng thâo krah rup, leh kơ anăn kâo nao hgŭm hlăm êpul tông čing leh anăn kdrăp tông ayŭ djuê ana mơ̆ng pô thâo mbruă A Thu. Ñu atăt leh anăn mtô bi hriăm čing leh anăn kdrăp tông ayŭ djuê ana kơ hmei. Ñu atăt hmei hiu mdah lu anôk, msĕ si Ƀuôn Dhar kreh - Hiu čhưn ênguê Đồng Mô ti Hà Nội, Lâm Đồng, Dak Lak. Mơ̆ng anăn hmei mâo thiăm klei găl tui hriăm leh anăn hưn mdah dhar kreh mơ̆ng djuê ana pô.”

A Don, kiăng khua adŭ bruă dhar kreh să Kon Đào, čar Quảng Ngãi lač, dŭm bruă ngă mơ̆ng pô mbruă êdah êdi A Thu amâo mdei ti bruă kriê pioh dŭm kdrăp tông ayŭ amâo dah krơ̆ng kjăp sa êpul kdŏ mmuñ. Anăn jing hdră mjing phung lŏ čuê. Ñu mtô bi hriăm leh čing čhar leh anăn kdrăp tông ayŭ djuê ana kơ dŭm êtuh čô hriăm ti dŭm sang hră leh anăn êpul êya; mbĭt anăn mtô kơ lu phung mbruă hdră mkra leh anăn bi msiam ênai čing čhar. Mâo phung hriăm leh thâo mbruă lŏ nao hgŭm hlăm êpul phung mbruă, mbĭt hŏng ñu mtô kơ ênuk hđeh điêt hĭn. A Don, kiăng khua adŭ bruă dhar kreh să Kon Đào tĭng dlăng.

“Kâo ƀuh pô thâo mbruă A Thu đru mguôp leh lu snăk hlăm bruă kriê pioh lehanăn mđĭ lar čing čhar, kdrăp pĕ tông djuê ana Xơ Đăng. Pô thâo mbruă gĭr mtô bi hriăm leh čing čhar leh anăn kdrăp pĕ tông djuê ana kơ mnuih ƀuôn sang hlăm ƀuôn lehanăn jih jang dŭm ƀuôn mkăn hlăm să. Êngao kơ mtô bi hriăm hlăm să, pô thâo mbruă A Thu lŏ nao truh kơ dŭm să mkăn hlăm čar čiăng mtô bi hriăm kơ dŭm sang hră lehanăn dŭm ƀuôn mâo čing čhar, kdrăp pĕ tông lehanăn mâo klei čiăng čiăng hriăm. Kâo ƀuh pô thâo mbruă A Thu jing sa čô gĭr êdi hlăm bruă mđĭ lar lehanăn kriê pioh dhar kreh čing čhar lehanăn kdrăp pĕ tông mơ̆ng djuê ana Xơ Đăng, anăn jing sa klei yuôm bhăn lehanăn mpŭ êdi.”

Klei mdê ti Pô mbruă êdah êdi A Thu jing ñu amâo djŏ knŏng djă pioh dŭm ênai Xơ Đăng hŏng kngan pô jing sa čô mbruă, ƀiădah lŏ bi lar klei khăp hŏng dŭm ênai anăn hlăm ai tiê phung mda asei. Anăn yơh jing boh tŭ dưn prŏng hĭn hlăm bruă mơ̆ng Pô mbruă êdah êdi A Thu: amâo lui ôh dŭm ênai mơ̆ng aê aduôn pô knŏng dôk kwang hlăm klei bi hdơr, ƀiădah ngă kơ dŭm ênai anăn lŏ kwang hlăm klei hdĭp hruê anei.