Ti knăm anei, čar Gia Lai hưn mthâo kdrăp mnơ̆ng lu jơr, mơ̆ng hiu čhưn ênguê êa ksĭ Quy Nhơn, čư̆ čhiăng Pleiku, dhar kreh čing čhar, hiu čhưn ênguê wăl mnơ̆ng hdĭp, mnơ̆ng ƀơ̆ng huă alŭ wăl, mdei msăn leh anăn dŭm mta mnơ̆ng bi hgŭm krĭng. Mta kñăm jing bi mklă Gia Lai jing anôk truh lu jơr. Boh nik, bruă bi hgŭm hŏng dŭm anôk bruă duh mkra hriê mơ̆ng Dhŭng Korea, Japon, China, India, Russia, Australia… dưi čang hmăng pŏk thiăm anôk mnia mblei leh anăn phung tuê mrâo kơ Gia Lai leh anăn dŭm anôk truh mơ̆ng Việt Nam.

Hà Văn Siêu, K'iăng khua knơ̆ng bruă hiu čhưn ênguê Việt Nam mñă klă, hlăm boh klei klei čiăng leh anăn bruă ngă phung tuê bi mlih pral, klei găl mnơ̆ng dhơ̆ng jing ka djăp ôh. Bruă hiu čhưn ênguê čiăng mlih mơ̆ng klei ba yua mnơ̆ng dhơ̆ng jing mkŏ mjing boh tŭ yuôm; mơ̆ng bruă ngă mă hjăn jing bruă ngă lu mta; mơ̆ng klei bi ktưn hŏng ênoh jing klei bi ktưn hŏng hnơ̆ng tŭ jăk leh anăn knhuah gru.

“Hmei bi mklă Gia Lai mâo klei găl yuôm bhăn, mơ̆ng thŭn hiu čhưn ênguê ala čar 2026 dưi mkŏ hŏng dŭm anôk bruă duh mkra čiăng bi hgŭm krĭng lehanăn mđĭ lar knhuah gru Gia Lai. Hmei iêo mthưr dŭm anôk bruă duh mkra, alŭ wăl, ƀĭng hgŭm ƀuăn ngă bruă: grăp alŭ wăl 1 mta mnơ̆ng jăk siam, ba knhuah leh anăn klei găl mdê hjăn mơ̆ng krĭng, mơ̆ng alŭ wăl. Grăp anôk bruă duh mkra 1 klei mĭn mrâo mlih mrâo mjing boh tŭ yuôm mdê hjăn, mđĭ klei dưi bi ktưn, grăp anôk truh jing sa klei yăl dliê dhar kreh jăk siam mđĭ ai, mkŏ klei khăp hŏng phung tuê hiu čhưn ênguê”.

Phạm Anh Tuấn, Khua anôk bruă sang čư̆ êa čar Gia Lai mñă klă, leh Thŭn hiu čhưn ênguê ala čar 2026, dŭm klei bi mguôp bruă hiu čhưn ênguê srăng dưi mkŏ mjing, mnơ̆ng dhơ̆ng srăng lŏ dơ̆ng mkŏ mjing leh anăn dŭm êpul tuê mrâo srăng lŏ dơ̆ng đĭ kyar. Ñu čang hmăng êpul êya anôk bruă duh mkra amâo djŏ knŏng dlăng Gia Lai jing sa anôk truh mrâo, ƀiădah mbĭt hŏng alŭ wăl mkŏ mjing dŭm hdră êlan mrâo:

“Kâo čang hmăng hruê hiu čhưn ênguê Việt Nam tal 2 ti Gia Lai mâo thiăm lu hdră bi hgŭm, mnơ̆ng dhơ̆ng mrâo, lu hdră hiu čhưn ênguê leh anăn phung tuê mrâo truh ti Gia Lai ăt msĕ mơh dŭm anôk hiu čhưn ênguê mkăn mơ̆ng Việt Nam. Hmei čang hmăng êpul êya hiu čhưn ênguê bi mlih "Lăn dap kngư truh kơ êa ksĭ mtah" mơ̆ng sa klei hưn mdah jing sa hdră hiu čhưn ênguê klă sĭt, mơ̆ng sa hdră bruă mơ̆ng thŭn 2026 jing sa boh tŭ yuôm đĭ kyar sui"./.