Knăm mơak kpiê čeh mơ̆ng mnuih M'nông ti ênao Lăk mkŏ mjing hlăm dua hruê 29 leh anăn 30/8. Klei mkŏ mjing mơ̆ng să Liên Sơn Lắk, mâo 10 hdră bruă hŏng akŏ "Klei jăk jĭn krĭng čư̆ dliê - Ai tiê mnuih M'nông ti ênao Lăk". Êdah êdi jing Klei bi lông Khua kpiê čeh; hưn mdah hdră mkra mnơ̆ng hŏng lăn čuh mơ̆ng mnuih M'nông; hdră mkra mjing kpei leh anăn mđam kpiê čeh; dŭm klei hlăp lêñ djuê ana; klei hiu dlăng êman, mran điêt leh anăn anôk rang mdah, hưn mthâo mnơ̆ng dhơ̆ng, dhar kreh alŭ wăl…

 Hdră bruă kñăm bi mni, kriê pioh leh anăn mđĭ lar dŭm boh tŭ yuôm dhar kreh djuê ana mơ̆ng đưm mơ̆ng mnuih djuê ana M'nông, mbĭt anăn hưn mthâo pŏk rup, anak mnuih, dhar kreh, mnơ̆ng dhơ̆ng phŭn leh anăn klei găl hiu čhưn ênguê mơ̆ng alŭ wăl. Nguyễn Anh Tú, Khua anôk bruă sang čư̆ êa să Liên Sơn Lăk, brei thâo, să čang hmăng knăm mơak srăng đru ba pŏk rup krĭng lăn, anak mnuih M'nông ti djiêu ênao Lăk truh giăm hĭn hŏng phung tuê hlăm ala čar leh anăn ala tač êngao.

 "Bi lar klei hâo hưn kơ knăm mơak truh hŏng mnuih ƀuôn sang hlăm čar, kluôm ala leh anăn tar rŏng lăn. Mơ̆ng anăn, đru bi lar rup să Liên Sơn Lắk - alŭ wăl dôk hlăm hdră êlan mđĭ kyar bruă hiu čhưn ênguê mơ̆ng čar Dak Lak leh anăn ala čar; mbĭt anăn iêo mthưr anôk bruă duh mkra mđing dlăng, hrăm mbĭt, duh bi liê, đru mtrŭt mđĭ bruă hiu čhưn ênguê alŭ wăl đĭ kyar."

Bi ti wăl krah să Êa Knuêč, ênai čing čhar, ênai blŭ tlao hlăm dŭm anôk čhĭ durian, mnơ̆ng dhơ̆ng OCOP leh anăn dŭm hdră kdŏ mmuñ, mnơ̆ng ƀơ̆ng huă. Hruê knăm ba leh mnơ̆ng dhơ̆ng truh giăm hĭn hŏng phung tuê hiu čhưn ênguê, pŏk klei găl čiăng kơ êpul êya yăl dliê kơ krĭng pla mjing, kơ hdră duh ƀơ̆ng leh anăn dhar kreh pô.

Klei êdah kdlưn mơ̆ng hdră jing klei bhiăn drông " boh durian" mơ̆ng ana kyâo prŏng wĭt kơ krĭng knăm mơak. Hlăm ênai čing, phung mniê ba bŭng mbĭt hŏng dua drei êman mjing êpul drông jiă knhuah Lăn Dap Kngư. Klei bhiăn akâo klei myun mơ̆ng mnuih ƀuôn sang Ê Đê ăt dưi lŏ mkŏ mjing, mơĭt klei čang hmăng yan ngă bruă djŏ boh mnga, boh durian djŏ yan, djŏ ênoh, ƀuôn sang trei mđao. Y Feel Knul, mnuih ƀuôn sang ƀuôn Tara, să Ea Knuếc brei thâo, knăm mơak ba klei mơak leh anăn čang hmăng kơ mnuih pla boh durian.

"Anei ăt jing wưng hưn mdah dhar kreh dŭm djuê ana krĭng lăn anei truh hŏng ƀĭng găp, phung tuê hiu čhưn ênguê. Jing sa čô mnuih ngă lŏ hma pla boh durian, kâo čang hmăng boh mnga ƀrư̆ hruê ƀrư̆ mâo ênoh hĭn čiăng kơ mnuih ƀuôn sang ênưih hĭn".

Hlăm hdră bruă "Êa Knuêč hlăm yan" lŏ mâo klei rang mdah mnơ̆ng dhơ̆ng, rang mdah OCOP, mnơ̆ng dhơ̆ng lŏ hma, mnơ̆ng ƀơ̆ng huă, nao čuă dlăng đang war leh anăn livestream hưn mthâo boh durian hlăm dŭm mta mrô. Mơ̆ng anăn, ai êwa Knăm mơak boh durian Dak Lak dưi lar bra truh kơ krĭng pla mjing, ba phung tuê leh anăn anôk mnia mblei truh giăm hĭn hŏng phung pla mjing. Ti knăm mphŭn pŏk, să Êa Knuêč ăt hưn mthâo anăn knăl êpul êya "Boh durian Êa Knuêč". Aduôn Trần Thị Vân, Kiăng khua anôk bruă sang čư̆ êa să brei thâo, anei jing klei ktưn hưn mơ̆ng alŭ wăl, mbĭt anăn mjing tur knơ̆ng bi mklă anăn knăl, mđĭ ênoh mnơ̆ng dhơ̆ng, pŏk mlar wăl anôk mnia mblei leh anăn mđing truh kơ klei đĭ kyar hơĭt kjăp.

 "Leh knăm anei, alŭ wăl srăng lŏ dơ̆ng mtrŭt mđĭ hdră bi mlih mrô, hưn mthâo mnơ̆ng dhơ̆ng durian hlăm dŭm anôk mnia mblei điện tử. Mơ̆ng anei anăn knăl mnơ̆ng dhơ̆ng mơ̆ng să dưi bi mklă leh anăn ƀĭng ngă lŏ hma hơ̆k mơak mkra mjing rơ̆ng hnơ̆ng tŭ jăk, mđĭ kyar durian hŏng klei kjăp".

Să Êa Knuếc ară anei jing sa hlăm dŭm krĭng pla boh durian prŏng hĭn ti čar Dak Lak hŏng giăm 6.000 ha; hlăm anăn êbeh 2.800 ha hlăk mboh, hnơ̆ng mâo đăo tĭng êbeh 70.000 ton, ênoh yuôm hlăm brô 4.000 êklai prăk. Bi mklă boh durian jing mnơ̆ng pla phŭn, alŭ wăl mđing mkŏ mjing mrô krĭng pla, anôk đŭng hruh, tui duah phŭn agha, mđĭ kyar êpul hgŭm bruă leh anăn bi hgŭm mkra mjing, ba čhĭ./.