Hŏng mnuih ƀuôn sang Bahnar, pin êa jing klei bi knăl kơ klei hdĭp. Dŭm pin êa khăng dôk ti gŭ jơ̆ng čư̆ nah tluôn ƀuôn, djiêu dliê kmrơ̆ng. Anei dưi dlăng jing anôk yuôm bhăn, mâo yang êa dôk. Kyua anăn, êlâo kơ yua phŭn êa, mnuih ƀuôn sang mkŏ mjing klei ngă yang čiăng lač jăk leh anăn akâo kơ yang đru. Knăm ngă yang pŏk pin êa kreh mkŏ mjing leh yan hrui êmiêt, êjai ƀuôn sang mâo wưng mdei leh anăn mprăp kơ yan ngă bruă mrâo.

          Mprăp kơ knăm ngă yang, mnuih ƀuôn sang hrăm mbĭt bi mdoh pin êa, jah waih rơ̆k rung, mkra mbông mđoh êa. Phung mniê mprăp kpiê čeh, êsei brông, dŭm mta mnơ̆ng ƀơ̆ng knhuah gru; phung êkei snăn rŭ mdơ̆ng gơ̆ng ngă yang, mprăp mnơ̆ng ngă yang msĕ si mnŭ, ŭn. Khua mduôn - mnuih mâo kơhưm leh anăn thâo săng êlam kơ klei bhiăn - srăng hluê ngă dŭm klei bhiăn. Nao hlăm knăm ngă yang pin êa ti ƀuôn Plei Tơngia, ƀuôn hgŭm Đak Cấm, čar Quảng Ngãi, êkei êdam A Sinh, lač:

"Mơ̆ng điêt kâo tui hluê aduôn aê nao ngă yang pin êa. Grăp blư̆ nao hgŭm, kâo ƀuh klă hĭn bruă klam răng kriê phŭn êa leh anăn knhuah gru djuê ana pô."

          Hlăm knăm anei, ênai čing kwang kdrăm kơah, mđrăm mbĭt hŏng ênai čhuang mơ̆ng mnuih ƀuôn sang mjing sa wăl anôk jăk siam, mčhĭt muăt. Khua mduôn dôk ti anăp pin êa, iêo jak yang adiê wĭt dlăng.

Leh klei bhiăn yuôm bhăn, mnuih ƀuôn sang hrăm mbĭt hŏng ai êwa mčhĭt muăt hlăm knăm mơak hŏng dŭm ênhiang kdŏ čhuang jŭm dar gơ̆ng ngă yang. Grăp čô mnuih hrăm mbĭt mnăm kpiê čeh, ƀơ̆ng dŭm mta mnơ̆ng ƀơ̆ng leh anăn bi kah mbha klei mơak. Anei ăt jing wưng čiăng bi mguôp êpul êya, lăm lui klei amâo thâo bi djŏ, bi kjăp klei bi mguôp hlăm ƀuôn sang.

Sa klei jăk siam mơ̆ng knăm ngă yang pin êa jing ai tiê mpŭ kơ lăn adiê. Mnuih Bahnar amâo mă yua êa hŏng klei čŏng čiăng ƀiădah djă pioh nanao, răng mgang phŭn êa doh. Mnuih ƀuôn sang đăo knang tơdah ngă čhŏ pin êa, yang srăng ngêñ leh anăn ba klei amâo jăk. Aduôn Y Linh, sa čô mniê khua thŭn ti alŭ Plei Tơngia, ƀuôn hgŭm  Đak Cấm, lač:

“Hmei mtô anak čô amâo dưi hwiê djah hlăm pin êa, amâo bi rai kyâo dliê djiêu gah pin êa. Anăn amâo djŏ knŏng jing klei bhiăn, jing dhar kreh ƀiădah lŏ jing hdră čiăng kriê pioh klei hdĭp kơ jih ƀuôn sang.”

          Hlăm klei hdĭp hruê anei, knăm ngă yang pin êa ăt mâo mnuih ƀuôn sang Bahnar ti krĭng Yŭ čar Quảng Ngãi kriê pioh. Dŭm mta bruă knăm mơak ăt đru lar bra klei jăk siam dhar kreh mơ̆ng djuê ana truh hŏng phung tuê hiu čhưn ênguê. A Ngoát, khua ƀuôn Plei Tơngia, să Đăk Cấm, čar Quảng Ngãi lač:

“Knăm mơak pin êa amâodah lŏ pia jing ngă yang pin êa hluê si klei bhiăn. Dŭm hruê mkŏ mjing knăm mơak pin êa jing dŭm hruê mnuih ƀuôn sang hdĭp hlăm ai êwa mơak mñai, hơuh mđao leh anăn tơdah phung tuê hriê čhưn ti ƀuôn sang hlăm wưng anei ăt dưi drông msĕ si phung găp sui hruê wĭt kơ ƀuôn sang .

Klei ngă yang pin êa mơ̆ng mnuih ƀuôn sang djuê ana Bahnar amâo djŏ knŏng jing sa knhuah dhar kreh ai tiê klei mĭn ƀiădah lŏ bi êdah klei bi mguôp plah wah anak mnuih hŏng lăn adiê, plah wah pô hŏng êpul êya. Hlăm klei hdĭp mrâo mrang, êjai lu knhuah bhiăn hdĭp mda mơ̆ng ƀuôn sang bi mlih, dŭm knhuah jăk siam mơ̆ng klei ngă yang pin êa ƀrư̆ čiăng kriê pioh leh anăn mđĭ lar.