Ti krah klei hdĭp mjhĭt m’uăt krah ɃP.HCM, grăp tlam mmăt knhal jih hrue kăm giăm anei, mâo lu phung tue mơ̆ng ala tač êngao, lehanăn mnuih ƀuôn sang hlăm ƀuôn prŏng lŏ tui duah sa klei jăk mrâo. Amâo mâo djŏ ti krah wăl klei bi mnia mblei, amâodah hlăm êlan êbat jơ̆ng ôh, diñu ruah dôk gŭ hlăm sa anôk čiăng mđing hmư̆ dŭm ênhiang klei kưt muiñ jiă knhuah gru dhar kreh djuê ana Việt Nam, dưi bi êdah hŏng boh blŭ ênuk ară anei.

Ti anei, ênai đàn tranh, đàn bầu, đàn nhị, đàn T’rưng, čing boh tâo amâodah dŭm ênhiang čing čhar lăn dap kngư kwang krah êñai kdrăp kưt muiñ ênuk ară anei hŏng 3D ênuk mrâo, atăt phung hmư̆, phung dlăng kma hlăm klei ksiêm duah kơ knhuah gru dhar kreh  Việt Nam, mơ̆ng dưr hlŏng kơ dhŭng. Êbeh 30 kdrăp pĕ tông djuê ana, mbĭt hŏng  12 klei čih mrâo mrang lŏ bi hmô kơ knhuah siam hlăm lu krĭng kwar, mjing sa anôk pioh mdah hlue knjhuah đưm mâo mơh lehanăn nao mđrĭn hong knhuah ênuk ară anei msĕ mơh.

Anăn jing hdră mdah "Chào Show," mkŏ mjing ti sang mrô 6 Nguyễn Siêu, ƀuôn hgŭm Sài Gòn, ɃP.HCM. Truh kơ ară anei, klei ksiêm duah anei amâo mâo djŏ knŏng hmư̆ kơ klei kưt muiñ, ƀiădah lŏ dơ̆ng thâo ƀuh dŭm mta klei mdah jăk êdi mơ̆ng 3 krĭng kwar Dưr -  Krah lehanăn dhŭng. Klei bi klin dŭm ênhiang kưt muiñ, mâo rup tinăn lehanăn mâo mnơ̆ng ƀơ̆ng huă mbĭt, đru leh kơ grăp mlam anôk anăn jing leh anôk tui duah jăk êdi kơ dhar kreh Việt Nam dưi thâo ƀuh hlăm lu mta.

Asei mlei êyuh nanao hlue hŏng ênai kdrăp pĕ tông, Edgar, jing tue hriê mơ̆ng Canada lač, ñu đuĕ hiu leh hlăm lu anôk ti Việt Nam anei, ƀiădah ară anei yơh gưl tal êlâo hmư̆ lehanăn ƀuh lu kdrăp pĕ tông nao mđrăm mbĭt. Ñu pia anei jing sa mta klei dưi thâo ƀuh mrâo jăk êdi. “Boh sĭt dưi lač tinei, kâo ƀuh jăk êdi, kâo amâo mâo mĭn ôh hdră mdah anei dưi ba yua hŏng djăp kdrăp pĕ tông msĕ snei. Klei kâo bi kngăr êdi jing mâo lu kdrăp jing gưl tal êlâo kâo tuôm ƀuh, lehanăn hmư̆. Klei dưi hmư̆ mâo lu ênai mdê mdê, nao mbĭt mbla hlăm sa klei mdah, jing sa klei mâo hmư̆ yuôm bhăn êdi. Klei huă ƀơ̆ng hrue anei ăt jăk mơh, mâo êsei, mâo kpŭng, lehanăn mnơ̆ng ƀơ̆ng mkăn mơ̆ng Việt Nam.

Êjai anăn, amai Zamanie, tue mơ̆ng Mi, brei thâo hdră mdah anei jing kdlưn hĭn êdi hŏng klei ñu čang hmăng,ngă leh kơ ñu dưi thâo săng kơ dhar kreh lehanăn anak mnuih   Việt Nam kbiă hriê mơ̆ng klei kưt muiñ. Klei dôk djă pioh êdi hlăm ñu jing klei mđĭ ai mơ̆ng phung mdah ti knưng mdah anăn: “Kâo thâo klei anei, kyua kâo pŏk dlăng hlăm hla pŏk, kâo ƀuh hdră mdah dưi yap jing jăk êdi, snăn kâo kut kat hriê čiăng bi mâo dlăng lehanăn hmư̆. Lehanăn klă sĭt hdră anei jing jăk êdi, jing kdlưn hĭn kơ klei kâo hmăng hmưi. Leh mâo dlăng hdră mdah anei, dưi lač hĕ jing jăk êdi. Boh nik hlăm kdrăp pĕ tông, ñu jing sa klei bi mđĭ ai kâo prŏng êdi mơ̆ng klei knhăk phung ba yua ñu. Kâo hdră mdah anei msĕ si sa klei yăl dliê jăk siam kơ dŭm krĭng kwar, lehanăn dhar kreh mdê mdê ti Việt Nam dưi yăl dliê hlue hŏng kdrăp pĕ tông ti knưng mdah.”

Tui si Trần Minh Hoàng, Khua hdră mkŏ mjing Chào Show, mâo klei mĭn mkŏ mjing hdră mdah anei, kbiă hriê mơ̆ng klei čiăng hưn mdah dŭm mta mnơ̆ng pioh kơ bruă hiu čhưn ênguê hlăm mlam mrâo hŏng ɃP.HCM. Amâo mâo djŏ knŏng mdah dŭm klei kưt muiñ djuê ana msĕ si yăng đar, ƀiădah ê-kíp ngă klei anei ruah sa hdră êlan hlăm ênuk ară anei hin, dưi thâo ƀuh knhuah gru dhar kreh Việt Nam dưi jĕ hŏng mnuih ƀuôn sang hĭn, boh nik tue mơ̆ng ala tač êngao khăp êdi.

 “Klei hmei čang hmăng prŏng êdi anăn jing lŏ bi lar hdră kưt muiñ lehanăn dhar kreh Việt Nam truh hŏng mah jiăng ala tač êngao, lehanăn phung khăp dlăng lehanăn hmư̆ hlăm ala čar pô. Mâo mkŏ mjing nanao hlăm grăp mlam, hmei čang hmăng hdră  Chào Show srăng jing sa anôk truh hŏng dhar kreh jăk siam, lehanăn ƀiắnăn mâo ti ɃP.HCM pioh mdah kơ phung khăp dlăng. Kyuanăn, hmei yap show mdah anei msĕ si pô bi ala brei kơ dhar kreh, đru bi mtruh dŭm klei kưt muiñ, kdrăp pĕ tông jiă knhuah gru dhar kreh Việt Nam truh hŏng mah jiăng ala tač êngao.”

Dơ̆ng mơ̆ng phŭn ngă klei anei hlăk mlan 3/2025, hdră anei mâo leh klei lŏ wĭt lač jăk mơ̆ng phung hmư̆ lehanăn dlăng. Ară anei, Chào Show mâo drông leh êbeh 30.000 gưl čô tue nao dlăng, hlăm anăn mâo giăm mkrah jing tue mơ̆ng ala tač êngao./.