Ai êwa hiu čhưn ênguê hơ̆k mơak ti dŭm anôk truh nah Yŭ čar Khánh Hòa, krĭng lăn Ninh Thuận hđăp. Dŭm kdrăn êa ksĭ Ninh Chữ, Vĩnh Hy, wăl mdei msăn ktuê hang ksĭ, anôk hiu dlăng dhar kreh, ƀuôn bruă djuê ana mơ̆ng đưm msĕ si Bàu Trúc, Mỹ Nghiệp mčhĭt m’uăt phung tuê hiu čhưn. Tơdah Nha Trang êdah kdlưn hŏng bruă hiu čhưn ênguê êa ksĭ, mdei msăn, snăn Phan Rang - Ninh Thuận hđăp mâo klei găl kơ lăn mnga êa mak, knhuah gru dhar kreh, boh mnga bruă lŏ hma jăk siam Ayŏng Huỳnh Trọng Lượng, tuê hiu mơ̆ng Nha Trang truh ti Phan Rang ƀuh snei:

“Dhar kreh, anôk kriê pioh ti Nha Trang đĭ kyar kơ bruă hiu čhưn ênguê hĭn. Êjai anăn, Phan Rang ăt dôk lu klei bhiăn đưm, dưi kriê pioh dŭm boh tŭ yuôm dhar kreh djuê ana mơ̆ng đưm, boh nik jing knhuah dhar kreh mơ̆ng mnuih djuê ana Chăm. Dŭm mta mnơ̆ng dhơ̆ng hiu čhưn ênguê tinei ăt lu jơr mơh, mơ̆ng kdrăp čŭt hơô, kdrăp pioh bi hdơr, čhiăm băk truh kơ dŭm mta mnơ̆ng mkra hŏng kiê kngan, đru kơ phung tuê mâo thiăm lu klei hrŏng ruah čiăng lông ngă lehanăn blei yua, jing jăk êdi".

Leh sa thŭn bi mŭt mbĭt, wăl anôk mđĭ kyar bruă hiu čhưn ênguê Khánh Hòa dưi pŏk mlar, dŭm anôk truh ti nah Dhŭng čar ƀrư̆ ƀrư̆ dưi mkŏ hlăm hdră mnơ̆ng dhơ̆ng mbĭt. Hlăm 6 mlan akŏ thŭn 2026, Khánh Hòa drông hlăm brô 12 êklăk gưl čô tuê, đĭ êbeh 40% mkă hŏng wưng êlâo; ênoh hrui wĭt hiu čhưn ênguê hlăm brô 42.500 êklai prăk.

Krĭng nah Dhŭng čar mâo thiăm lu klei găl êjai giăm tač êdeh phiơr Cam Ranh, êlan klông găn êrô jăk găl, mbĭt anăn knăl bruă hiu čhưn ênguê Khánh Hòa. Alain Nguyễn, Khua kiă kriê anôk mdei msăn Hoàn Mỹ, ƀuôn hgŭm Ninh Chữ, brei thâo, anôk bruă duh mkra mâo klei tŭ dưn êjai bi mŭt mbĭt 2 čar:

“Leh sa thŭn leh bi mŭt mbĭt, hmei mâo leh dŭm boh tŭ dưn jăk. Mnuih mă bruă, ai dưi mđĭ kyar dôk mâo klei bi mlih ktang tĭng kơ nah Dhŭng Khánh Hòa. Boh nik, hnơ̆ng tuê hiu čhưn ênguê mơ̆ng Nha Trang hriê ti krĭng Dhŭng Khánh Hoà dôk jưh đĭ ktang, mjing boh kdrŭt mrâo kơ hdră mđĭ kyar bruă hiu čhưn ênguê alŭ wăl”.

Mơ̆ng leh bi mŭt mbĭt hŏng Ninh Thuận, čar Khánh Hoà mtrŭt mđĭ hdră hưn mthâo, hiu čhưn ênguê, hlăm anăn mta phŭn jing Festival Êa ksĭ Khánh Hoà 2026 hŏng akŏ “Klei jăk siam mơ̆ng êa ksĭ -ênuk kpưn đĭ tar rŏng lăn” mkŏ mjing mơ̆ng hruê 17/7/19/7. Êngao kơ Nha Trang, lu hdră dưi mkŏ mjing ti nah Yŭ čar msĕ si Rang mdah lehanăn hluê ngă knhuah gru dhar kreh mnơ̆ng hŏng lăn čuh Bàu Trúc, bruă pơ̆k mñam Mỹ Nghiệp ti să Ninh Phước; mdah kdrăp tông ayŭ djuê ana, kdŏ čhuang Čam ti Sang gơ̆ng Po Klong Garai; hdră kdŏ mmuñ ktuê êlan, klei mmuñ êdeh mnga ti ƀuôn hgŭm Đông Hải Boh nik ti să knông lăn Lâm Sơn mkŏ mjing Knăm mơak boh kroh leh anăn mnah phao briêng.

Bruă pŏk mlar wăl anôk Festival Êa ksĭ truh ti lu alŭ wăl đru mđĭ lar boh tŭ yuôm dhar kreh djuê ana tinei mtam, mjing thiăm mnơ̆ng dhơ̆ng hiu čhưn ênguê leh anăn hdră duh ƀơ̆ng kơ mnuih ƀuôn sang.