Djuê ana Êđê mâo lu klei bhiăn mă djuê tĭng kơ amĭ, kyua anăn anak mniê mâo bruă klam yuôm bhăn hlăm gŏ sang, hlăm anăn klei dưi bi dôk ung mô̆ jing sa hlăm dŭm klei dưi yuôm bhăn.

Tơdah čiăng dôk sa čô êkei pô khăp  jing ung, mniê êra Êđê brei yua pô bi kuôl. Anăn khăng jing adei êkei amĭ amâo dah mnuih khua thŭn hlăm găp djuê gŏ sang mniê, mâo kơhưm, suaih pral, thâo săng klei bhiăn, thâo blŭ tlao…

Khua mduôn Ama H’Loan ti ƀuôn Akŏ Dhông, ƀuôn hgŭm Ƀuôn Ama Thuôt, čar Dak Lak brei thâo: Dơ̆ng mơ̆ng đưm đă dih, mnuih Êđê mâo klei mĭn tơdah leh kkiêng anak, ai ƀă kkiêng rông ba ktrŏ, suăi jing ai mơ̆ng amĭ.

Phung anak kkiêng brei mă djuê amĭ, hlăm klei bi kuôl ung mô̆ brei nao êmuh ung. Kyuanăn, tơdah truh thŭn mkŏ mjing gŏ sang, phung mniê êra Êđê srăng jing pô čŏng duh bi liê djăp ênŭm čiăng êmuh ung mô̆ snăn kơh dưi ngă knăm iêu mtâo wĭt kơ sang. Leh anăn klei bhiăn iêô mtâo jing klei dhar kreh djuê ana bi êdah klei mă djuê tĭng kơ amĭ hlăm klei bi dôk ung mô̆ mnuih Êđê.

Mmông anei, sang mniê mprăp sa čeh kpiê leh anăn sa boh kông čiăng kơ pô kăp blŭ srăng ba ti sang êkei ngă klei bi êmuh ung. Leh anăn, pô bi ala dua tĭng gŏ sang bi tuôm, blŭ hrăm, êkei êdam tŭ ư klei mtă mơ̆ng sang mniê srăng mă kông mjing mnơ̆ng bi kuôl.

Leh anăn, sang mniê srăng atăt anak mniê pô kơ sang êkei bi tŭ ư kơ klei bhiăn đĭ dôk ti sang êkei. Wưng anei, sang êkei srăng lông dlăng ai tiê sĭt suôr, ênuah ênô, thâo pap, thâo gĭr mơ̆ng mniê hlăm wưng bi kčah. Bruă anei srăng tui hluê hŏng klei bi trông, bi tŭ dư mơ̆ng dua tĭng.

Ti knăm nao dôk ti sang êkei mâo klei dưi akâo dŭm mta mnơ̆ng, brei sang mniê mkăp djăp ênŭm. Bruă anei kñăm bi êdah klei hdơr knga kơ ai tiê rông ba, dlăng kriê mơ̆ng amĭ ama êkei kơ ung êdei anăp mơ̆ng mniê êra Êđê.

Leh wưng nao đĭ dôk sang êkei, tơdah sang êkei tŭ ư hŏng mniê snăn srăng tŭ ư kơ sang mniê hluê ngă klei bhiăn iêu mtâo. Tơdah êkei bi mlih klei mĭn, amâo čiăng dôk mniê anăn ôh snăn tĭng kơ sang êkei srăng iêô jak sang mniê nao blŭ hrăm čiăng hngah.

Hlue si Pô thâo mbruă êdah êdi Vũ Lân, pô ksiêm hriăm dhar kreh djuê ana Lăn Dap Kngư, hlăm hruê bi kuôl ung mô̆, sang êkei srăng mprăp sa čeh kpiê leh anăn sa drei ŭn čiăng atăt anak êkei wĭt kơ sang mô̆. Kơ kdrêč sang mniê, čiăng drông êkei bi kuôl wĭt snăn diñu srăng ba dŭm mta mnơ̆ng gŏ sang tĭng êkei lač leh.

Hlăm anăn, yuôm bhăn hĭn jing kông dưi dlăng msĕ si klei ƀuăn rơ̆ng sĭt suôr mơ̆ng êkei kơ mniê. Dua ung mô̆ srăng hơô kdrăp djuê ana čiăng bi êdah klei mpŭ hlăm hruê yuôm bhăn hlăm klei hdĭp.

Tơdah atăt êkei mrâo wĭt kơ sang, khua mduôn srăng bi ala kơ dua nah găp djuê hưn mdah hŏng amiêt awa, amĭ ama, phung amai adei hlăm sang êkei, sang mniê leh anăn djuê găp dua nah. Ti anăp klei ktuê dlăng mơ̆ng grăp čô mnuih, dua čô hđeh êdam êra srăng bi jao kông leh anăn mơ̆ng anei klă sĭt jing ung mô̆. Klei anei mñă kơ ung mô̆ brei hdĭp sĭt suôr. Tơdah hlei pô lŏ ba wĭt kông, bi mlih ai tiê amâodah ngă soh srăng tla hnô bi djăp ênŭm ngăn kuôl.

Leh dŭm klei bhiăn bi kuôl ung mô̆ bi leh, tông čing čhar kwang, dua ung mô̆ djă đĭng kpiê bi huă ƀơ̆ng mbĭt, huă sa klŏ êsei, sa klŏ tiê ŭn čiăng bi êdah kơ ai tiê hrăm mbĭt bi găn klei hdĭp jăk mơak, knap mñai. Gŏ sang, găp djuê, ƀĭng găp mđup brei mnơ̆ng myơr kơ dua ung mô̆.

Hluê si H’Yam Bkrông ti ƀuôn Tơ̆ng Jŭ, ƀuôn hgŭm Ea Kao, čar Dak Lak, mnuih Êđê mâo klei mĭn, tơdah hlâo ung mô̆ mrâo hrăm mbĭt mdih truh 4-5 mmông hruê êdei snăn klei bi dôk ung mô̆ diñu srăng jăk mơak truh kơ mduôn khua.