Ti Bàu Trắng, sa hlăm dŭm anôk truh hing ang mơ̆ng krĭng êa ksĭ Bình Thuận êlâo dih, anôk bruă duh mkra amâo lŏ knŏng mĭn kơ bruă krơ̆ng phung tuê dôk sa anôk. Ƀuh klei găl mâo êdi leh hluê ngă klei bi mŭt mbĭt 3 čar Dak Nông, Bình Thuận leh anăn Lâm Đồng, lu anôk bruă hiu čhưn ênguê duah leh hdră bi mguôp čiăng bi leh dŭm "kdruêh" adôk ka bi knar. Diñu duah hdră ba phung tuê nao ti Đà Lạt. Leh mơ̆ng Đà Lạt lŏ nao ti ênao Tà Đùng. Grăp anôk truh jing sa kdrêč hlăm hdră tui ksiêm. Nguyễn Văn Hùng, Khua kiă kriê anôk bruă hiu čhưn ênguê Bàu Trắng U&M brei thâo, anôk bruă pral mâo klei mĭn leh anăn mâo dŭm knhuang ngă bruă klă klơ̆ng:

 Băng: “Mâo sa klei sĭt êdi mâo Knơ̆ng bruă mđing truh jing klei bi mguôp plah wah dŭm anôk bruă hiu čhưn ênguê, boh nik jing anôk bruă atăt tuê hiu čhưn. Mkŏ mjing dŭm hdră mtrŭn jăk găl êjai truh ti Đà Lạt, trŭn truh kơ êa ksĭ lehanăn mơ̆ng êa ksĭ đĭ hlăm ƀuôn prŏng êbâo mnga. Wăl hiu čhưn ênguê dôk mkŏ mjing hdră mtrŭn jih jang amâo mâo mă prăk ôh. Êngao anăn mâo dŭm hdră mtrŭn bi hrŏ ênoh kơ phung tuê hiu čhưn ênguê”.

Mbĭt hŏng dŭm klei bi êdah năng mơak, bruă hiu čhưn ênguê Lâm Đồng čiăng klă sĭt kpưn đĭ ăt čiăng klei hrăm mbĭt mơ̆ng bruă sang čư̆ êa leh anăn dŭm hdră êlan djăp hnơ̆ng. Kyua boh sĭt, lu "kdruêh" yuôm bhăn ăt dôk kƀah. Lâm Đồng ăt kƀah dŭm mta mnơ̆ng djăp ai dưi krơ̆ng phung tuê lu hruê. Bruă duh mkra mlam adôk êdu kƀah, bruă hiu čhưn ênguê mjuăt ktang asei mlei ka năng hŏng klei găl. Bruă hiu čhưn ênguê lŏ hma, bruă mâo klei čang hmăng mjing klei mdê, ăt dôk rŭng răng ti krah dŭm klei gun kpăk kơ hdră bhiăn.

 Ti krĭng lăn prŏng êbeh 22 ha ti krĭng Dak Nông hđăp, dŭm kdrăn đang boh teinan hruĕ, boh kruĕ mmih, boh kruĕ dŭng, boh durian lehanăn lu mta djam mtam doh dưi kriê dlăng kjăp. Pô anôk bruă lŏ hma anăn amâo djŏ knŏng čiăng čhĭ mnơ̆ng dhơ̆ng. Klei ñu hmăng hmưi hĭn jing čiăng kơ phung tuê dưi hrui pĕ hŏng kngan pô, tui ksiêm, mdei msăn ti krah wăl anôk mtah lehanăn thâo săng hĭn kơ bruă lŏ hma ba yua kdrăp mrâo. Klei mĭn anăn mâo rŭ mjing lu thŭn. Ƀiădah truh kơ ară anei ăt ka dưi jing ôh. Aduôn Bùi Thị Khánh Hòa, Khua Knơ̆ng bruă Cổ phần Lŏ hma doh Dak Nông, lač:

"Brei ngă čiăng ba yua jih klei găl mơ̆ng lăn, ênoh yuôm mơ̆ng bruă lŏ hma ƀiădah mbĭt hŏng anăn tơdah amâo čhĭ mnia bruă nah tluôn snăn amâo thâo ya ngă. Hŏng anôk bruă, sa gưl mdei knăm mơak dưi drông dŭm êbâo čô tuê nao dlăng kơ bruă lŏ hma doh ƀiădah amâo dưi ba čhĭ hră tŭ yap ôh. Kyua hlăm hră tŭ yap duh bi liê mâo leh klei kčah mtrŭn amâo dưi čhĭ mnia bruă nah tluôn ôh ƀiădah knŏng jing klei lar bra dlăng kơ bruă lŏ hma doh đuič."

Dŭm klei blŭ anăn brei ƀuh, klei phung tuê čiăng amâo djŏ jing thiăm lu anôk hiu čhưn. Klei diñu čiăng jing sa hdră êlan găl ênưih hĭn, lu klei tui ksiêm hĭn, lu bruă ngă hĭn. Leh anăn klei čiăng dôk sui hĭn. Hluê si nai prĭn Phan Bảo Giang, Sang hră gưl prŏng bruă duh mkra - ngăn prăk ƀuôn prŏng Hồ Chí Minh, klei Lâm Đồng čiăng ară anei amâo djŏ knŏng duh bi liê thiăm anôk bruă nah gŭ. Yuôm bhăn hĭn jing sa hdră êlan mđĭ kyar sa hnơ̆ng, sa anăn knăl mbĭt, sa hdră yăl dliê mbĭt kơ krĭng lăn mrâo.

“Drei mâo dŭm anôk bruă hiu čhưn ênguê hing ang êdi, brei mĭn lu hĭn kơ bruă mkŏ mjing sa hdră êlan kluôm ênŭm jing hlăm boh klei ară anei dôk mâo lu êdi dŭm klei lu jơr kơ mnơ̆ng dhơ̆ng. Kâo mĭn snei klei bi mguôp, bi sa ai ară anei dôk yuôm bhăn êdi. Grăp alŭ wăl mơ̆ng Đăk Nông, Lâm Đồng truh kơ Bình Thuận hđăp snăn grăp tĭng mâo dŭm knhuah (style) mdê mdê snăn tơdah ară anei hlăm sa bruă prŏng êdi msĕ snei mâo klei sa ai, bi mguôp kâo đăo knang jih jang klei dleh dlan srăng dưi găn jih”.

Sa hdră čuăl mkă mrâo hlăk dôk bi leh. Dŭm ktuê êlan mkŏ plah wah krĭng čư̆ čhiăng hŏng êa ksĭ hlăk ƀrư̆ ƀrư̆ dưi duh bi liê. Dŭm anôk bruă duh mkra ăt mphŭn lŏ bi kƀĭn čiăng mkŏ mjing dŭm mta mnơ̆ng dhơ̆ng bi hgŭm krĭng. Anăn jing dŭm klei bi knăl brei ƀuh dŭm "kdruêh" hlăk ƀrư̆ ƀrư̆ dưi duah anôk pô. Ƀiădah čiăng bi mlih klei găl jing klei bi ktưn, Lâm Đồng ăt čiăng lu hĭn. Čiăng sa klei thâo ƀuh djăp hnơ̆ng. Sa klei bhiăn djăp ênŭm. Lehanăn tal êlâo hĭn jing klei hrăm mbĭt plah wah bruă sang čư̆ êa, anôk bruă duh mkra lehanăn yang ƀuôn./.