Čiăng hmao ba mdah hlăm gưl Festival Êa ksĭ, Knơ̆ng bruă dhar kreh, mjuăt ktang asei mlei leh anăn hiu čhưn ênguê čar Khánh Hòa bi hgŭm hŏng Hră klei mrâo leh anăn mđung asăp, mđung rup Khánh Hòa hŏng phung thơ̆ng kơ bruă, mă bruă hŏng hnơ̆ng ktang čiăng mlih mrô êbeh 20 anôk mdei msăn jăk siam, anôk kriê pioh leh anăn anôk hiu čhưn ênguê êdah êdi msĕ si Sang yang Bà Pô Nagar, Trầm Hương, Hòn Chồng, Anôk bruă ksiêm hriăm kơ êa ksĭ, Sang kdŏ mmuñ Đó, hang êa ksĭ Nha Trang... Hră mơar dưi čih 3D, mă rup flycam, mă rup 360 độ lehanăn msir mghaih ti wăl anôk anei mtam čiăng rơ̆ng hnơ̆ng djŏ klă êlâo kơ bi mŭt hlăm tur knơ̆ng.

Nguyễn Xuân Duy, K’iăng khua kiă kriê bruă klei mrâo leh anăn mđung asăp, mđung rup Khánh Hoà brei thâo, klei bi mguôp plah wah bruă klei mâo leh anăn kdrăp mrâo srăng mjing hdră hưn mthâo mrâo mrang, đru kơ phung tuê hmư̆ klei hâo hưn leh anăn tui ksiêm anôk truh êlâo kơ gưl nao čhưn mtam:

“Klei găl kơ bruă klei mrâo lu kdrăp snăn hmei amâo djŏ knŏng hluê ngă bruă klam hâo hưn ƀiădah hrăm mbĭt hlăm hdră mrô dŭm anôk truh hŏng hdră bi mguôp rup, kdrăp mrâo leh anăn klei čih pioh. Hlăm grăp klei yăl dliê, hmei đru kơ phung tuê ênưih thâo ƀuh klei hâo hưn, ktuê dlăng leh anăn tui ksiêm dŭm anôk truh. Kdrăp mrô jing kdrăp yua, bi hră klei mrâo jing pô yăl dliê tơdah dua mta anei bi mguôp jăk, grăp anôk truh amâo djŏ knŏng hưn mthâo ôh ƀiădah lŏ mâo klei bi đru, mjing klei lar bra ktang”.

Tur knơ̆ng mrô kơ bruă hiu čhưn ênguê Khánh Hoà amâo djŏ knŏng hưn mthâo pŏk rup dŭm anôk truh ƀiădah lŏ bi mguôp tuôr nao čuă dlăng 3D, hră kak mrô, anôk mkŏ, klei mlih prăk jia, mkra tour online, ktrâo lač sang jưh, sang huă ƀơ̆ng, êdeh êdâo, dŭm mta bruă Festival Êa ksĭ mbĭt hŏng lu mta bruă jăk găl msĕ si tač êdeh, đru dŏng, bruă mdrao mgŭn, bi mdoh wăl hdĭp mda...Mơ̆ng anăn, phung tuê dưi čŏng ksiêm dlăng klei hâo hưn, mkŏ mjing hdră hiu čhưn ênguê leh anăn mkŏ klă anăp hŏng dŭm hdră bruă hlăm kdrăp mrô đĭng blŭ. Anei dưi dlăng jing knhuang bi mlih mơ̆ng klei hưn mdah knhuah gru jing mjing wăl hiu čhưn ênguê thâo mĭn, mă klei ƀuh tue hiu čhưn jing phŭn. Amai Bùi Thị Ngọc Trâm, să Khánh Vĩnh, čar Khánh Hòa čang hmăng:

“Êlâo dih snăn kâo ăt dlăng dŭm tur knơ̆ng mrô dhar kreh Chăm leh anăn klă sĭt jing klei jăk êdi kyua rup siam, klei hâo hưn jăk leh anăn ênưih tui ksiêm mơh. Tur knơ̆ng ênuk mrâo ăt msĕ snăn mơh, knŏng čiăng sa êlan link jing dưi tui ksiêm wăt Khánh Hoà găl ênưih snăk čiăng hưn mthâo kơ ƀĭng găp taih kbưi”.

Hlue si  Hoàng Thị Bích Hạnh, Anôk bruă đru mlih mrô bruă klei mrâo, Anôk bruă klei mrâo (Phŭn bruă dhar kreh, mjuăt asei mlei leh anăn hiu čhưn ênguê), phung thơ̆ng kơ bruă kƀĭn msir mgaih, ksiêm dlăng ênoh mrô čiăng rơ̆ng tur knơ̆ng mrô kơ hiu čhưn ênguê Khánh Hòa ba yua djŏ hnơ̆ng.

“Ară anei mâo êbeh 20 anôk êdah kdlưn mâo Khánh Hòa ruah čiăng ba hlăm tur hnơ̆ng hiu čhưn ênguê mrô. Jih êpul kƀĭn jih hnơ̆ng kơ bruă mblang, msir mgaih ênoh mrô. Ktuê dlăng dŭm boh phŭn ba hlăm tur knơ̆ng hiu čhưn ênguê mrô”.

Hưn mdah hlăm gưl Festival Êa ksĭ Khánh Hòa 2026, Tur knơ̆ng hiu čhưn ênguê mrô – klei thâo hiu čhưn ênguê mrô Khánh Hòa amâo djŏ knŏng duh kơ tue hiu čhưn hlăm yan knăm mơak ôh ƀiădah lŏ mjing tur knơ̆ng rmô yua kơ bruă hiu čhưn ênguê, đru mkŏ mjing Khánh Hòa jing anôk truh thâo mĭn, mrâo mrang leh anăn bŏ hŏng klei bi ktưn.