Tlam mmă ti ƀuôn Kon H’Ring, să Čư̆ M’gar, čar Dak Lak, aduôn Nŏ Đi, 68 thŭn, dôk ti djiêu kpur pui hrah dôk prăp êmiêt mnơ̆ng ƀơ̆ng huă kơ gŏ sang, hruê anei ñu mkra mjing mta djam mơ̆ng êngai mtei dliê. Nŏ Đi brei thâo, hŏng mnuih Sêdang, grăp mta mơ̆ng ana mtei mâo boh tŭ yuôm sơăi. Êngai mda mơ̆ng mtei dliê jing mta mnơ̆ng čiăng mkra mjing dŭm mta djam mmih jăk leh anăn jiă kma mnâo mnañ čư̆ dliê.

Djam êngai ƀơ̆ng jăk hĭn hlăm yan bhang. Mnuih ƀuôn sang nao hlăm dliê duah dŭm phŭn mtei jăk, koh leh anăn alôk mă hĕ pak khua čiăng mă êngai mda kô̆ bhung ba wĭt mkra mjing mnơ̆ng ƀơ̆ng. Nŏ Đi lac̆ snei c̆iăng kơ djam mtei dliê ƀâo mngưi snăn bi lŭk mta mnơ̆ng mkra mjing mơ̆ng kpŭng mơ̆ng tôk ana sồi, c̆iăng bi dlik snăn bi mâo thiăm kpŭng braih:

“Leh mâo djăp êngai mtei dliê, pô khăt bi điêt leh anăn mă kpŭng mơ̆ng ana sồi mâo leh êlâo leh anăn lŭk mbĭt hŏng êngai mtei leh khăt điêt tlê mbĭt”. Leh anăn pô tuh êa leh anăn ba nao ƀhu sa aguah. Êlâo duh phung aduôn êa kreh dưm hlăm đĭng đrao čiăng ƀhu sa aguah.

Leh ƀhru pô mă êngai mtei djiêt hĕ jih êa leh anăn lŏ ba lŭk hŏng kpŭng brai leh anăn lŏ tlê mbĭt. Êa pô djiêt mơ̆ng êngai mtei dưm hlăm gŏ leh anăn knă ksă, leh êa ktơ̆ng pô dưm dŭm mta mnơ̆ng. Tơdah mâo hdang, kan …mă mơ̆ng hnoh êa amâodah kđeh čĭm hlô dliê pô dưm tŭk mbĭt. Dưm dŭm mta mnơ̆ng bi mƀăt msĕ si amrêč, êč, djam ƀâo leh anăn kwă čiăng kơ djam amâo mâo bi klŏ leh anăn khiêt hĕ. Leh ƀuh kpŭng braih ksă, djăm êngai mtei dliê dưi ƀơ̆ng yơh”.

Hŏng mnuih Xơ Đăng, djam êngai mtei dliê amâo djŏ knŏng jing sa mta djam hlăm mmông huă ƀơ̆ng gŏ sang ôh, kyua hdră ngă lu kdrêč, mơ̆ng bruă mprăp mnơ̆ng dhơ̆ng, truh kơ bruă mkra mjing čiăng mâo hruê mmông, djam anei lŏ bi êdah klei khăp bi mguôp mơ̆ng gŏ sang, êpul êya.

A Hvâng 71 thŭn, ti ƀuôn Kon Hring brei thâo, mpŭ kơ dŭm mta mnơ̆ng dliê brei, mnuih ƀuôn sang mnuih Sêdang thâo hdră ba yua djŏ guôp ana mtei dliê, knŏng mă man dưn čiăng kơ lăn adiê lŏ dơ̆ng čăt jing. Hlăm dŭm knăm mơak mnuih Sêdang amâo dưi kƀah ôh djam êngai mtei dliê.

“Grăp blư̆ hlăm ƀuôn mkŏ mjing knăm huă mdiê mrâo, mta mnơ̆ng ƀơ̆ng mơ̆ng êngai mtei dliê amâodưi kƀah ôh, jing mnơ̆ng ƀơ̆ng jăk, boh nik êjai tŭk hŏng hdang, kan mă mơ̆ng hnoh êa, grăp čô bi čiăng ƀơ̆ng sơăi. Mnuih ƀuôn sang bi mnăm kpiê čeh mbĭt hŏng ƀơ̆ng djam êngai mtei dliê ƀuh klei jăk êdi. Gŏ sang kâo kreh tŭk djam anei, grăp djuê riêng gah ƀuh mnâo ƀâo mngưi hriê bi akâo sa čhiên ba wĭt huă hŏng êsei.”

Ăt kreh mkra mjing nanao mnơ̆ng ƀơ̆ng anei, H’chel, 68 thŭn ti ƀuôn Kon H’Ring, să Čư̆ Mgar, čar Dak Lak, brei thâo, grăp čô tŭk djam êngai mtei dliê srăng thiăm dŭm mta mnâo čŏng mâo čiăng kơ mnâo ƀâo mngưi jăk jĭn.

“Hlăm dŭm hruê wiă mdiê, bi kuôl ung mô̆ hmei kreh tŭk djam êngai mtei dliê. Anei jing dŭm mta mnơ̆ng ƀơ̆ng jăk êdi, brei kơ djam ƀâo mgưi srăng mâo amrêč, djam ƀâo, êč Yuăn”…

Djam êngai mtei dliê mơ̆ng mnuih Sêdang jăk êdi hŏng klei mmih leh anăn klei yăl dliê kơ klei hdĭp êpul êya hŏng dliê kmrơ̆ng, kơ klei kreh kriăng mă bruă. Hlăm klei hdĭp ară anei, dŭm mta mnơ̆ng ƀơ̆ng anei ăt mâo nanao hlăm klei huă ƀơ̆ng gŏ sang, hlăm dŭm knăm mơak êpul êya, msĕ si klei hdĭp ênuah ênô ƀiădah bŏ hŏng klei khăp mơ̆ng mnuih ƀuôn sang Sêdang ti krah čư̆ čhiăng Lăn Dap Kngư.