Mơ̆ng aguah ưm, kdrŭn ksĭ Phan Thiết mčhĭt mơuăt. Dŭm hô̆ mran, mran ngă yang bi msiam hla čhiăm gru êma mta êa, mnơ̆ng ngă yang, čing, hgơr; phung mduôn hlăm ao dai, čhiăm grua bi kƀĭn mprăp kơ knăm drông. Djŏ 7 mmông, êpul hô̆ mran kbiă mơ̆ng kdrŭn ksĭ, nao kơ Hòn Lao hluê ngă klei bhiăn djuê ana, leh kơnăn wĭt kơ ƀăng jang kdrŭn ksĭ Cồn Chà. Mơ̆ng anei, dŭm êtuh čô mnuih lŏ dơ̆ng drông kdrăp mnơ̆ng găn dŭm ktuê êlan ktuê hang krông Cà Ty, êlâo kơ wĭt kơ Dinh Vạn Thủy Tú bi leh klei bhiăn.

Knăm drông Klei mtă Ông Sanh mguôp hŏng klei đăo knang kơ yang Nam Hải, amâodah kan Ông, mơ̆ng mnuih ƀuôn sang ktuê hang ksĭ. Mơ̆ng klei bhiăn ngă yang, phung trah mă kan hmăng hmưi lăn čar êđăp ênang, êa ksĭ êđăp ênang, angĭn jăk, kŭm păn nao hlăm êa ksĭ êđăp ênang, mă bruă tŭ dưn. Phạm Triều, mnuih trah mă kan mâo êbeh 45 thŭn siă suôr hŏng êa ksĭ, kah mbha:

“Knăm anei mâo boh tŭ yuôm hŏng phung trah mă kan hmei, jing knhuah gru mơ̆ng đưm êlâo truh kơ ară anei. Truh hruê Knăm akâo klei êđăp ênang, mnuih ƀuôn sang akâo kơ lăn čar êđăp ênang, mă bruă knuă hơĭt kjăp, nao hlăm êa ksĭ êđăp ênang amâo mâo klei truh, mâo lu klei myun mdan, djŏ boh mnga”.

Mbĭt hŏng knăm drông, kdrêč knăm ngă yang ti wăl sang yang Vạn Thủy Tú lŏ mâo knăm tiên yết, giỗ sắc, tế âm linh, knăm bế hoàn leh anăn knăm phóng đăng ti êa krông Cà Ty. Kdrêč knăm mak mâo klei mmuñ bả trạo, mmuñ bội, mmuñ chòi, kdŏ anak rai - aseh - êman, klei hlăp lêñ djuê ana, klei kdŏ mmuñ ktuê êlan, knăm mnia mblei leh anăn wăl anôk mnơ̆ng ƀơ̆ng jăk yâo Phan Thiết. Hluê anăn, mnuih ƀuôn sang leh anăn phung tuê hiu čhưn ênguê lŏ mâo klei găl tui ksiêm kơ klei hdĭp, klei đăo leh anăn dhar kreh mơ̆ng mnuih ƀuôn sang krĭng êa ksĭ. Đào Quang Thanh, K'iăng khua anôk bruă sang čư̆ êa ƀuôn hgŭm Phan Thiết, lač bruă kriê pioh knăm mak brei mdưm êpul êya mnuih ƀuôn sang ngă bruă trah mă kan ti anôk phŭn, mbĭt anăn mguôp hŏng hdră hiu čhưn ênguê:

“Klei yuôm bhăn hĭn jing knăm mơak brei dưi mkŏ mjing hlăm klei mpŭ kơ knhuah bhiăn, klei bhiăn djuê ana leh anăn čiăng kơ êpul êya mnuih ƀuôn sang ngă phŭn. Bruă mguôp knăm mơak hŏng bruă hiu čhưn ênguê ăt dưi hluê ngă hŏng klei ruah, rơ̆ng dưi hưn mthâo knhuah dhar kreh êa ksĭ Phan Thiết, ƀiădah amâo ngă luič klei mpŭ leh anăn boh tŭ phŭn mơ̆ng knăm mơak".

Ti krah klei đĭ kyar ƀuôn prŏng, bruă duh mkra leh anăn hiu čhưn ênguê êa ksĭ mơ̆ng čar Lâm Đồng, dŭm êbâo pŏk mdhă, Dinh Vạn Thủy Tú, asăp mmuñ bả trạo leh anăn êpul hiu čhưn hlăm êa krông Cà Ty ăt bi hdơr kơ knhuah gru dhar kreh mơ̆ng Phan Thiết. Knăm mơak akâo kan hdang kyua anăn amâo djŏ knŏng kriê pioh klei đăo knang mơ̆ng mnuih ƀuôn sang êlâo kơ grăp gưl nao hlăm êa ksĭ, ƀiădah lŏ dơ̆ng čuê ai tiê sa krĭng êa ksĭ, čiăng kơ dŭm boh tŭ dưn anăn dưi lŏ čuê, lar bra leh anăn đru mguôp bi lu jơr knhuah dhar kreh mơ̆ng Lâm Đồng hlăm wăl anôk đĭ kyar mrâo./.