Akŏ mlan 7 mrâo êgao, Klei bi lông čĭk čăm đưm Bình Định mă čup pah mni Mtao Quang Trung tal VIII thŭn 2026 ăt dưi mkŏ mjing, hŏng klei nao hgŭm mơ̆ng êbeh 700 čô mtô bi lông bi čăm, phung bi lông bi čĭk čăm hriê mơ̆ng 75 anôk hriăm čĭk čăm leh anăn êpul bi lông hlăm, êngao čar. Bùi Trung Hiếu, Kiăng Khua Knơ̆ng bruă Dhar kreh, Mjuăt ktang asei mlei leh anăn Hiu čhưn ênguê čar Gia Lai ktưn hưn, klei bi lông bi čăm Bình Định jing mnơ̆ng kriê pioh dưi krŭ wĭt mơ̆ng hƀuê ênuk mkŏ mjing ala čar, răng mgang ala čar mơ̆ng djuê ana.

"Hruê 31/3/2025, Khua knŭk kna tŭ ư leh mơĭt hră mơar ba mdah kơ UNESCO ksiêm dlăng čih anăn klei čăm đưm Bình Định hlăm Anăn Knhuah gru dhar kreh amâo êdah klă bi ala kơ anak mnuih. Anei jing klei bi knăl năng mơak êdi hŏng klei čĭk čăm đưm Bình Định, amâo djŏ knŏng jing klei ktưn hưn ba mnơ̆ng kriê pioh ala čar truh hnơ̆ng tar rŏng lăn ƀiădah lŏ đru mđĭ klei thâo săng, bruă klam mơ̆ng êpul êya hlăm bruă kriê pioh, răng mgang dŭm boh tŭ dhar kreh mơ̆ng djuê ana.”

Mơ̆ng hruê 26/7 truh kơ 2/8 kơ anăp, Klei bi lông Võ djuê ana mơ̆ng đưm dŭm êpul hgŭm lu ala čar srăng mkŏ mjing ti Quy Nhơn – Gia Lai, hŏng hlăm brô 650 čô bi lông, phung bi lông čăm hlăm dŭm mta leh anăn bi kdơ̆ng. Mbĭt hŏng klei bi lông, Anôk bruă mkŏ mjing lŏ mkŏ dăp dŭm êpul ala tač êngao nao čhưn dlăng An Khê Trường, sang yơng Long Phước lehanăn sang čuôr Bánh Ít čiăng tui ksiêm kơ knhuah dhar kreh, hƀuê ênuk leh anăn knhuah gru krĭng lăn Gia Lai.

Leh anăn, mơ̆ng hruê 2–5/8, Klei bi lông Võ knhuah gru Việt Nam tal IX – Gia Lai 2026 srăng mkŏ mjing ti ƀuôn hgŭm Quy Nhơn leh anăn dŭm alŭ wăl riêng gah hŏng anăn "Klei bi čăm đưm Việt Nam– Klei jăk siam guh mngač". Hdră bruă mâo 16 êpul mơ̆ng ala tač êngao hriê mơ̆ng 9 ala čar, hŏng 43 êpul hlăm ala čar leh anăn 11 êpul bi lông čĭk čăm hlăm alŭ wăl.

Klei êdah êdi mơ̆ng klei bi lông jing klei mdah mơ̆ng êbeh 1 êbâo čô mtô čăm, phung hriăm čăm hŏng dŭm klei čăm phŭn leh anăn Hùng kê quyền-klei čăm mâo klei dưi prŏng siă suôr hŏng krĭng lăn Tây Sơn, bi êdah ai tiê jhŏng ktang leh anăn knhuah gru dhar kreh mơ̆ng klei bi čăm đưm Bình Định. Klei mrâo mơ̆ng gưl bi lông thŭn anei jing hdră rang mdah hnơ̆ng prŏng, đru bi leh hră mơar akâo mdưm klei bi čĭk čăm đưm Bình Định ba mdah kơ UNESCO čih anăn jing Knhuah gru dhar kreh amâo êdah klă bi ala kơ anak mnuih tar rŏng lăn.

Hluê si Nguyễn Thị Thanh Lịch, K’iăng khua anôk bruă sang čư̆ êa čar Gia Lai, alŭ wăl dôk ƀrư̆ ƀrư̆ mđĭ kyar gru hmô "bruă duh mkra mnơ̆ng kriê pioh", hlăm anăn klei bi čăm mơ̆ng djuê ana dưi bi mklă jing sa hlăm dŭm boh tŭ yuôm phŭn čiăng mđĭ bruă hiu čhưn ênguê, har kreh leh anăn mđĭ hĭn klei bi mjĕ hŏng ala tač êngao. Mơ̆ng grăp gưl bi lông, dŭm djuê ana hlăm leh anăn êngao ala čar mâo thiăm klei găl bi tuôm, hriăm, hgao klei kpăk klei blŭ hŏng klei blŭ mbĭt mơ̆ng klei kdŏ mmuñ, mơ̆ng anăn hyuă kjăp klei bi hgŭm leh anăn bi lar ai tiê hriăm čăm Việt Nam.

“Mta kñăm mơ̆ng hmei mơ̆ng klei bi lông, dŭm êpul bi lông čĭk čăm hlăm ala čar dưi kah mbah hdơ̆ng pô leh anăn boh nik dưi bi kah mbha hŏng êpul ala tač êngao, mbĭt anăn hưn mthâo klei jăk siam klei bi čĭk čăm mơ̆ng čar. Năng ai srăng mâo klei kăm ghă kơ dhar kreh, kăm ghă klei blŭ ƀiădah mơ̆ng dŭm klei bi blŭ hrăm kơ klei bi čăm snăn mđĭ klei bi hgŭm mguôp. Leh anăn lu thŭn êgao, klei bi čăm kdruêh đưm mơ̆ng čar mâo leh klei mđing dlăng prŏng êdi mơ̆ng dŭm êpul bi čăm hlăm tar rŏng lăn. Mơ̆ng 9 gưl mkŏ mjing, mjing leh sa klei khăp, klei uêñ mĭn prŏng snăk hŏng tuê ala tač êngao".

Mơ̆ng dŭm bi lông truh kơ dŭm klei rang mdah dŭm êbâo čô mnuih, mơ̆ng klei hiu čhưn ênguê dhar kreh truh kơ klei čang hmăng ba mnơ̆ng kriê pioh Việt Nam truh hŏng tar rŏng lăn, dŭm klei bi lông mơ̆ng knhuah gru ti Gia Lai hlăk brei ƀuh ai hdĭp kjăp mơ̆ng sa mnơ̆ng kriê pioh amâo djŏ knŏng dưi djă pioh hlăm klei dưi, ƀiădah dưi lŏ čuê hŏng klei khăp, klei ktưn hưn leh anăn bruă klam mơ̆ng lu ênuk ară anei.