Ti êpul mnuih ƀuôn sang Bon Đưng 1, ƀuôn hgŭm Lang Biang – Đà Lạt, Păng Ting Sin, mnuih K’Ho Lạch, lu thŭn hŏng anei ăt hur har mtô bi hriăm čing čhar, ênhiang mmuñ, ênhiang kdŏ leh anăn dŭm kdrăp tông ayŭ djuê ana mơ̆ng đưm. Jing khua bruă Đảng, leh anăn jing khua êpul tông čing Bon Đưng hŏng 15 čô mnuih, ñu yap bruă răng kriê dhar kreh jing bruă klam mơ̆ng pô hŏng yang ƀuôn:

“Tơdah drei amâo djă pioh leh anăn mđĭ lar knhuah gru anei snăn srăng luič ram jih boh tŭ yuôm knhuah dhar kreh. Hŏng mnuih ƀuôn sang djuê ana ƀiă ti jơ̆ng čư̆ Lang Biang čiăng lŏ čuê kơ anak čô boh nik dhar kreh čing čhar, leh anăn kơ ênhiang mmuñ, ênhiang kdŏ. Răng kriê leh anăn mđĭ bi lar knhuah gru dhar kreh mơ̆ng mnuih ƀuôn sang djuê ana ƀiă pô, lŏ čuê kơ ênuk gưl êdei".

Mơ̆ng phung thâo mbruă khua thŭn ti dŭm alŭ, ƀuôn mơ̆ng čar Lâm Đồng, klei khăp kơ knhuah dhar kreh dôk lŏ čuê kơ ênuk gưl lŏ čuê, tŭ mă klei čuê mơ̆ng phung mduôn khua, phung mda asei hruê anei ăt dôk lŏ dơ̆ng čuê bruă kriê pioh knhuah gru. Ayŏng Kră Jăn Jun Guy, mnuih K’Ho Lạch ti alŭ Dang Ja, ƀuôn hgŭm Lang Biang – Đà Lạt jing mnuih mơ̆ng êpul phung mbruă mâo 22 čô Hŏng ñu, grăp blư̆ mdah čing čhar amâo djŏ knŏng hưn mthâo dhar kreh ƀiădah lŏ jing hdră čiăng kơ phung mda asei hĭn ktưn hưn kơ phŭn agha. Ayŏng Kră Jăn Jun Guy, brei thâo:

“Dŭm mta klei aduôn aê drei lui leh msĕ si klei mmuñ ênhiang djuê ana, ayŭ đĭng buôt, ăt msĕ mơh klei kdŏ čhuang... brei lŏ dơ̆ng kriê pioh lehanăn lŏ čuê kơ dŭm gưl êdei. Drei amâo dưi luič ôh dŭm knhuah jăk siam anei mơ̆ng djuê ana pô".

Ti krah krĭng čư̆ čhiăng Lang Biang, ênai čing čhar ăt kwang nanao grăp blư̆ ƀuôn sang mâo knăm mơak. Ti dŭm kdrăp pơ̆k mñam djuê ana mơ̆ng đưm, grăp aruăt mrai ăt dôk jiă gru đêč ba mbĭt hŏng klei bi hdơr mơ̆ng dŭm ênuk gưl. Bon Jô Liên,  K’iăng Khua bruă mặt trận, Khua Êpul hgŭm phung mniê ƀuôn hgŭm Lang Biang – Đà Lạt, bi mklă:

"Phung mâo kơhưm ti ƀuôn hgŭm Lang Biang – Đà Lạt mâo bruă klam yuôm bhăn snăk. Diñu jing kdrông mkŏ plah wah Đảng hŏng mnuih ƀuôn sang kơ dŭm hdră êlan mtrŭn mơ̆ng Đảng, hdră bhiăn mơ̆ng knŭk kna čiăng mơ̆ng anăn mnuih buôn sang jĕ giăm hŏng Đảng hĭn, giăm hŏng knŭk kna hĭn.  Êlâo hĭn diñu jing mnuih bi hmô, leh kơ anăn diñu hâo hưn kơ gŏ sang leh anăn yang ƀuôn hluê ngă dŭm hdră êlan mơ̆ng Đảng, hdră bhiăn knŭk kna hŏng klei jăk hĭn".

Ti să Đơn Dương, anôk mnuih djuê ƀiă mâo giăm 40% ênoh mnuih, lu ƀuôn bruă djuê ana mơ̆ng đưm leh anăn dŭm êpul hgŭm tông čing ăt ngă bruă tŭ dưn kyua klei hrăm mbĭt mơ̆ng êpul anei. Lê Thị Hồng Nhung, K’iăng khua adŭ bruă dhar kreh–yang ƀuôn să Đơn Dương, brei thâo:

“Să Đơn Dương mâo dŭm boh ƀuôn bruă msĕ si ƀuôn bruă krah prăk ti alŭ Ha Wai, leh anăn mñam bŭng ti alŭ Đa Hoa, lŏ mâo đa đa Êpul hgŭm tông čing čhar. Phung mâo kơhưm bi mguôp hâo hưn kơ hdră êlan mtrŭn mơ̆ng Đảng ăt msĕ mơh mtô mblang, mđĭ lar dŭm klei yuôm bhăn mơ̆ng bruă djuê ana ti alŭ wăl. Diñu bi mguôp mbĭt hŏng Khua ƀuôn, Khua bruă Đảng ăt msĕ mơh dŭm knơ̆ng, dhar bruă, êpul êya, dŭm anôk bruă klei đăo hrăm mbĭt leh hŏng alŭ wăl hlăm bruă kriê pioh knhuah gru dhar kreh".

Mơ̆ng dŭm anôk pơ̆k mñam ti Dă Huai, Cát Tiên truh kơ ênai čing kwang ti krah čư̆ dliê Lang Biang, dưi ƀuh dhar kreh dôk bi râo hŏng kiê kngan êpul êya.

Knhuah gru dưi kriê pioh, lŏ čuê leh anăn mguôp hŏng hdră mđĭ kyar bruă hiu čhưn ênguê ăt jing hdră čiăng bi mlih boh tŭ yuôm dhar kreh jing boh kdrŭt đĭ kyar hdră duh mkra, mkŏ mkra Lâm Đồng đĭ kyar pral, hơĭt kjăp./.