Hŏng êkei êdam Jarai thâo lu bruă Rơ Châm Blinh, ti să Ia Phí, čar Gia Lai, klei mĭn mrâo jing leh sa kdrêč hlăm klei hdĭp. Ruĕ hriăm bruă čih kač rup, ƀiădah ñu tŭ jing hlăm bruă kưt mmuiñ hŏng dŭm klei muiñ dua klei blŭ Jarai-Việt mâo ênhiang Lăn Dap Kngư, lar bra ktang hlăm hla pŏk yang ƀuôn. Mâo klei mmuiñ êdu êun, ktang mgei mbĭt hŏng hdră muiñ jiă knhuah krĭng čư̆ dliê, dŭm video "êklăk View" mơ̆ng Rơ Châm Blinh ba kơ mnuih hmư̆ lu klei mrâo. Mơ̆ng ênhiang mmuiñ, ñu čang hmăng kriê pioh, mđĭ lar knhuah dhar kreh djuê ana pô. Sa ai hŏng thŭn hiu čhưn ênguê ala čar Gia Lai 2026, ayŏng mâo mă klei pah mni mrô sa klei bi lông video hiu čhưn ênguê Gia Lai 2026 hŏng akŏ "Grăp čô mnuih ƀuôn sang Gia Lai jing sa čô bi ala hiu čhưn ênguê". Ti anôk bi kƀĭn phung KOL čar Gia Lai 2026, mkŏ mjing hruê 11/9, Rơ Châm Blinh lač:

Kâo hơ̆k mơak êdi hlăk mâo kahan ksiêm čar Gia Lai jak iêo nao ti anôk bi kƀĭn KOL Gia Lai 2026. Ti anôk anei, kâo mâo klei găl bi tuôm leh anăn mjĕ mjuk hŏng lu ayŏng amai adei mkra mjing klei mrâo hriê mơ̆ng Quy Nhơn ăt msĕ mơh dŭm alŭ wăl mkăn. Anei jing wưng jăk êdi čiăng kơ êpul êya mkra mjing hrăm mbĭt bi hriăm êmuh, bi mguôp leh anăn hưn mdah rup ƀuôn sang pô. Kâo pô mâo nanao klei čang hmăng phung mkra mjing klei mrâo srăng hur har hưn mdah lu hĭn kơ klei jăk siam dhar kreh, klei bhiăn hdĭp mda leh anăn dŭm knăm mơak jăk siam mơ̆ng krĭng lăn anei."

Ăt hŏng dŭm video aguah tlam, amai Rah Lan H’Wĩ, ti ƀuôn Kte Lớn A, să Phú Thiện, čar Gia Lai, dôk đru mguôp bi lar klei jăk siam dhar kreh Jarai hlăm hla pŏk yang ƀuôn. Jih hriăm Sang hră gưl prŏng Mjuăt ktang asei mlei Đà Nẵng, H’Wĩ mâo klei khăp bruă mnia mblei online hlăm TikTok leh anăn Facebook. Dŭm video kơ dhar kreh djuê ana mâo amai ngă mtam ti ƀuôn sang leh anăn hlăm gŏ sang dưi jak iêu dŭm êklăk čô dlăng. Mơ̆ng knăm ngă yang, knăm ƀhur knga, knăm iêô mngăt truh kơ dŭm mta mnơ̆ng ƀơ̆ng mưng juăt msĕ si hla hbei ƀlang tŭk, kan ăm hla mtei, tlê trŏng phĭ…, H’Wĩ ba dhar kreh Jarai truh hŏng phung dlăng hŏng dŭm pŏk rup jĕ giăm. Mrâo anei, video čih pioh klei amĭ ngă kpiê čeh Jarai mơ̆ng đưm lŏ mâo klei mđing dlăng mơ̆ng êpul êya yang ƀuôn. Hŏng H’Wĩ, klei mkra mjing mnơ̆ng dhơ̆ng mrâo jing hdră duh ƀơ̆ng, lŏ jing hdră bi lar dhar kreh ƀuôn sang.

“Kâo ngă klei čih hlăm TikTok, lu jing kah mbha kơ hdră duah prăk čiăng rŭ mdơ̆ng sa boh sang kơ amĭ ama. Dŭm klei čih anăn mâo klei mđing dlăng, tui ksiêm leh anăn đru mguôp mơ̆ng lu mnuih. Dưi nao hlăm Klei bi kƀĭn KOL čar Gia Lai jing sa klei mơak leh anăn ăt jing boh kdrŭt prŏng êdi hŏng kâo. Hlăm hdră ngă klei čih, kâo mâo nanao klei lač jăk kơ phung khăp čiăng, đru leh anăn hrăm mbĭt hŏng pô. Kyua klei mđing dlăng mơ̆ng grăp čô mnuih kâo dưi mâo hruê anei. Mơ̆ng klei bi kƀĭn tal anei, kâo ăt hmăng hmưi đru mguôp sa kdrêč ai tiê pô čiăng hưn mthâo, bi lar dŭm pŏk rup mơ̆ng alŭ wăl”.

Amâo djŏ knŏng phung mda asei ngă klei čih kơ dhar kreh, klei hdĭp, êpul kahan ksiêm ăt dôk dưn yua hla pŏk yang ƀuôn čiăng ba rup jĕ giăm, klă sĭt truh hŏng mnuih ƀuôn sang. Thiếu tá Lại Văn Đạt, knuă druh Êpul răng mgang klei êđăp ênang, kahan ksiêm să Phú Thiện, jing sa hlăm dŭm čô KOL mơ̆ng čar Gia Lai mâo êpul êya yang ƀuôn thâo hŏng gru hmô "Kahan ksiêm truh kơ ƀuôn sang". Hlăm hdră mă bruă, bi tuôm hŏng mnuih ƀuôn sang, ñu čŏng hriăm klei Jarai čiăng hâo hưn hdră bhiăn hŏng klei blŭ djuê ana; mbĭt anăn mtrŭt mjhar mđup brei 500 blah čhiăm guôm ƀô̆ kơ phung hđeh dleh dlan hlăk mŭt thŭn hriăm mrâo. Dŭm pŏk rup mơ̆ng anôk bruă mâo Thiếu tá Lại Văn Đạt čih pioh, kah mbha hlăm hla pŏk yang ƀuôn hŏng mta phŭn klă klơ̆ng, iêo jak dŭm êbâo gưl dlăng. Hluê si ñu, bruă čŏng hriăm klei Jarai, thâo săng kơ dhar kreh mơ̆ng mnuih ƀuôn sang đru kơ hdră mtô mblang, mtrŭt mjhar giăm mnuih ƀuôn sang leh anăn tŭ dưn hĭn.

“Êjai kâo čŏng pô hriăm leh anăn thâo blŭ klei mnuih djuê ƀiă jing mnuih Jarai snăn hlăm bruă ƀuh jing ênưih, jĕ giăm hĭn snăn thâo săng klei mĭn mnuih ƀuôn sang. Mơ̆ng anăn hmei mâo hdră mă bruă, hâo hưn mtrŭt mjhar êlam hŏng boh sĭt, snăn mâo mnuih ƀuôn sang hơ̆k mơak tŭ ư sa ai hlăm klei hmei hâo hưn hŏng klei Jarai ăt msĕ mơh đru kơ mnuih ƀuôn sang".

Klei bi kƀĭn KOL čar Gia Lai thŭn 2026, hŏng akŏ "Čư̆ dliê truh kơ êa ksĭ mtah - Bi lar klei đăo knang mrô", dưi mkŏ mjing hlăm hdră Thŭn hiu čhưn ênguê ala čar 2026, kñăm bi mguôp êpul êya, kah mbha klei hriăm leh anăn hrăm mbĭt hưn mthâo dhar kreh, hiu čhưn ênguê, anak mnuih Gia Lai. Anăn jing klei bi tuôm mơ̆ng dŭm anôk dlăng, dŭm klei yăl dliê leh anăn dŭm anak mnuih dôk grăp hruê yua klei hmăi mơ̆ng pô čiăng bi lar klei hâo hưn klă sĭt. Mơ̆ng anăn, mkŏ mjing sa wăl mrô êđăp ênang, kreh dhar leh anăn năng đăo knang./.