Klei mñă nmơ̆ng hdră jing klei bhiăn kuč mngač pui mtrang ti knưl mbĭt hŏng hdră kdŏ mmuñ "Klei hriăm čăm hlue knhuah djuê ana Việt Nam - Klei jăk siam yuôm bhăn", bi mni kơ ênoh yuôm klei hriăm čăm hlue knhuah djuê ana leh anăn hưn mthâo pŏk rup Gia Lai leh bi mŭt mbĭt. Blŭ hrăm mphŭn pŏk klei bi kƀĭn, Khua Knơ̆ng bruă sang čư̆ êa čar Gia Lai Phạm Anh Tuấn bi mklă, klei bi lông jing wưng čiăng kơ phung thâo mbruă, phung bi lông hlăm leh anăn êngao ala čar bi mjĕ mjuk, lar bra klei jăk siam mơ̆ng dhar kreh hriăm čăm Việt Nam.

Čar Gia Lai srăng lŏ dơ̆ng kriê pioh, mđĭ lar klei hriăm čăm djuê ana hŏng dhar kreh, mjuăt bi hriăm, mjuăt ktang asei mlei leh anăn hiu čhưn ênguê, đru hưn mdah pŏk rup krĭng lăn "krĭng čư̆ čhiăng truh êa ksĭ mtah" leh anăn mơĭt klei hưn kơ sa Việt Nam khăp kơ klei êđăp ênang, mpŭ kơ dhar kreh, pŏk mlar klei bi hgŭm hŏng ƀĭng găp tar rŏng lăn.