Mlam truh, ti anăp tač sang rông knhuah gru mơ̆ng ƀuôn Kte, să Phú Thiện, čar Gia Lai, lu mnuih ƀuôn sang mơ̆ng dŭm ƀuôn bi kƀĭn nao hgŭm hlăm hdră tông čing hŏng akŏ "Kriê pioh knhuah gru - bi lar boh tŭ yuôm dhar kreh". Hlăm ênai čing kwang, mđrăm mbĭt hŏng ênai kdŏ čhuang êdu êun, mjing sa wăl dhar kreh Lăn Dap Kngư jiă knhuah gru, anôk dŭm boh tŭ yuôm knhuah gru mơ̆ng mnuih Jarai dưi kriê pioh leh anăn lŏ čuê. Ti krah klei kdŏ čhuang mčhĭt mơuăt, awa Siu Yar, mnuih ƀuôn Kte, wăt tơdah khua thŭn leh, kngan ăt kjăp, ênưih tông grăp ênai čing, mtrŭt jih jang mnuih hrăm mbĭt djă kngan mjing klei kdŏ čhuang Jarai.

“Să mkŏ mjing lŏ bi hdơr kơ knhuah gru djuê ana drei, dhar kreh čing čhar, hmei ƀuh hơ̆k mơak êdi. Kyuadah hmei khăp êdi kơ čing đưm, čing mơ̆ng phung mduôn hđăp jăk êdi, hmư̆ ênai čing ai tiê mgei ai tiê. Lač jăk kơ Êpul mkŏ mjing, knuă druh ti să mkŏ mjing kơ hmei dưi tông čing leh anăn srăng gĭr lŏ hriăm hlăm gưl bi hriăm anei klă sĭt tŭ dưn”.

Boh nik, ti knăm anei, 40 čô hriăm mnuih Jarai ti să Phú Thiện mrâo bi leh adŭ mjuăt bi hriăm tông čing, mơ̆ng Pô mbruă êdah kdlưn Nay Phai hriê mơ̆ng să Phú Túc klă klơ̆ng mtô bi hriăm; dưi čŏng pô mdah 3 klei tông čing knhuah gru: "Khăp kơ klei pơ̆k mñam", "Sang dleh wơr" leh anăn "Hơêč hmưi kơ ayŏng Thoach". Ayŏng K'Sor Triệu - êkei êdam ti alŭ Phú Thiện hơ̆k kdơ̆k kah mbha klei mĭn "hriăm mbĭt hŏng ngă bruă", čiăng jing gru mngač mơ̆ng hdră dhar kreh - kdŏ mmuñ.

“Kâo hriê tinei lŏ hriăm tông čing mbĭt hŏng jih jang mnuih mơak snăk, kyuadah dưi ksiêm duah, lŏ djă pioh knhuah gru dhar kreh djuê ana pô. Êgao hĭn kơ anăn drei jing phung êdam êra, phung knơ̆ng čiăng mđĭ lar, ba êlan êlâo hlăm hdră mkŏ mjing kriê pioh, hưn mdah dhar kreh čing čhar kơ ênuk gưl êdei ti să Phú Thiện”.

Êbeh leh 70 thŭn, ƀiădah hŏng ai tiê kriê pioh dhar kreh čing čhar Lăn Dap Kngư, Pô mbruă êdah kdlưn Nay Phai găn êbeh 80km mơ̆ng să Phú Túc truh kơ ƀuôn Kte,  să Phú Thiện čiăng mtô bi hriăm klei tông čing čhar kơ mnuih ƀuôn sang. Ñu hơ̆k mơak kyua phung hđeh hriăm jih ai tiê leh anăn dưi tông leh dŭm ênhiang čing knhuah gru mơ̆ng mnuih Jarai.

 "Grăp blư̆ nao mtô, nao mgăl čing, kâo ƀuh klă êdi klei bi mguôp, klei khăp leh anăn jĕ giăm mơ̆ng mnuih ƀuôn sang hlăm ƀuôn sang. Dŭm bruă ngă hlăm êpul êya mâo ênai čing čhar mjing nanao klei bi mguôp, bi hgŭm plah wah grăp čô mnuih, amâo brei mâo klei bi kah mbha. Boh nik, grăp blư̆ mtô kơ phung hđeh, kâo ƀuh phung hđeh khăp snăk hŏng čing čhar. Dlăng phung hđeh hơ̆k kdơ̆k msĕ snăn, kâo ƀuh mơak snăk leh anăn anăn ăt jing klei ngă kơ kâo lŏ mâo klei mđĭ ai čiăng lŏ mtô bi hriăm."

Pă mlam knhal jih hruê kăm ti să Phú Thiện, čar Gia Lai mkŏ mjing leh hdră Čing čhar leh anăn hưn mthâo mnơ̆ng ƀơ̆ng huă djuê ana mơ̆ng đưm mơ̆ng mnuih ƀuôn sang Lăn Dap Kngư ti dŭm ƀuôn Kte, Rbai, Amil leh anăn Phú Thiện. Nguyễn Văn Hưng - Kiăng khua Anôk bruă ngă hră mơar knŭk kna să Phú Thiện brei thâo, bruă anei amâo djŏ knŏng čiăng ruah phung mbruă êdah êdi čiăng nao hgŭm hlăm Festival čing čhar Gia Lai kơ anăp, ƀiădah lŏ đru kriê pioh, mđĭ lar wăl anôk dhar kreh čing čhar Lăn Dap Kngư.

“Hŏng klei čang hmăng kriê pioh knhuah gru dhar kreh mâo leh UNESCO tŭ yap, anăn amâo djŏ knŏng jing dhar kreh mơ̆ng mnuih ƀuôn sang Lăn Dap Kngư ƀiădah jing mnơ̆ng kriê pioh mơ̆ng anak mnuih. Hmei čang hmăng dŭm thŭn kơ anăp, Knŭk kna đru prăk bi liê čiăng kơ hmei pŏk lu adŭ mtô bi hriăm, đru kơ phung thâo mbruă mâo klei thâo jăk hĭn, iêo jak phung mda asei nao hgŭm hlăm hdră kriê pioh dhar kreh djuê ana pô”.

Ênai čing čhar ăt kwang nanao, klei kdŏ čhuang Jarai ăt lŏ čuê nanao ti djiêu pui sang roong ti să Phú Thiện, čar Gia Lai. Phung mduôn mtô, phung mda asei lŏ čuê, dŭm ênhiang čing amâo djŏ knŏng kriê pioh mngăt êwa dhar kreh djuê ana ƀiădah lŏ bi mguôp êpul êya, mjing klei jăk siam klei hdĭp Lăn Dap Kngư jiă knhuah gru leh anăn bŏ hŏng klei hdĭp mda./.