Klei rang mdah “Sang krum dlông” mâo pă kdrêč, mphŭn pŏk hŏng “Krĭng čang hmăng” leh anăn tlâo kdrêč phŭn “Dring gah”, “Gah” leh anăn “Ôk”. Phung nao dlăng dưi atăt găn lu wăl anôk, kdrêč hlăm klei hdĭp Êđê, mơ̆ng klei hdĭp mda hŏng lăn adiê, hiu duah ƀơ̆ng, ngă lŏ hma truh kơ klei hdĭp dhar kreh, ai tiê hŏng sang krum dlông.

Dŭm ênhiang mmuñ djuê ana, ênai čing, kdrăp tông ayŭ djuê ana, klei khan, klei bhiăn leh anăn klei hdĭp êpul êya dưi bi mguôp hŏng hdră rang mdah, pui mngač leh anăn kdrăp mrâo mdah. Klei mdê mơ̆ng hdră jing phung tuê amâo djŏ knŏng dlăng ƀiădah lŏ dưi đĭ găn hlăm grăp wăl anôk, hrăm mbĭt hlăm dŭm mta bruă dưi lŏ bi êdah, mơ̆ng anăn dưi truh giăm hĭn hŏng klei hdĭp dhar kreh djuê ana mơ̆ng đưm mnuih Êđê.

Dŭm čô mnuih nao hlăm klei rang mdah jing phung thâo mbruă leh anăn mnuih ƀuôn sang Êđê. Jih jang klei rang mdah yua klei Êđê, đru kriê kjăp knhuah phŭn mơ̆ng wăl anôk dhar kreh dưi lŏ bi êdah.

Ktuê dlăng hdră, aduôn Lê Thị Lý, ti ƀuôn hgŭm Ƀuôn Ama Thuôt, čar Dak Lak brei thâo, hdră ba lu klei mgei ai tiê hlăk lŏ bi êdah dŭm klei hdĭp, klei bi kuôl ung mô̆, klei bhiăn, kdrăp čŭt hơô leh anăn mnơ̆ng yua mơ̆ng phung mniê Êđê êlâo dih.

"Êjai kâo dlăng sĭt nik jing mgei ai tiê êdi. Kâo ƀuh klei hdĭp mda mnuih ƀuôn sang đưm êlâo sĭt nik jing lu jơr leh anăn ƀuh sĭt nik jing sa dhar kreh năng bi kriê pioh. Amâo mâo thâo ôh Dak Lak dưi lŏ mkŏ mjing sa hdră jăk êdi msĕ snăn".

Trần Hồng Tiến, Khua knơ̆ng bruă dhar kreh, mjuăt asei mlei leh anăn hiu čhưn ênguê Dak Lak brei thâo, bruă ba kdrăp mrâo hlăm hdră mdah dhar kreh jing hdră êlan djŏ guôp hŏng klei čiăng mđĭ kyar bruă duh mkra dhar kreh, mbĭt anăn pŏk klei găl mkŏ mjing dŭm mta mnơ̆ng hiu čhưn ênguê mrâo, mđing truh mkŏ mjing mnơ̆ng dhơ̆ng hiu čhưn ênguê dhar kreh mâo klei dưi iêo jak phung tuê hiu čhưn ênguê leh anăn mjing thiăm boh tŭ dưn bruă duh mkra mơ̆ng knhuah gru alŭ wăl.

“Hmei čang hmăng anei jing sa mta mnơ̆ng dhơ̆ng hiu čhưn ênguê čiăng đru kơ bruă hiu čhưn ênguê đĭ kyar. Tơdah phung tuê hriê ti Dak Lak, si srăng čiăng dưi dlăng, dưi ƀơ̆ng dŭm klei bi lông msĕ snei”.