Ti anôk bi kƀĭn, Khua êpul hgŭm mnuih khua thŭn Việt Nam Nguyễn Thanh Bình mñă klă, mơ̆ng knhuah gru "mpŭ kơ phung khua thŭn", klei bhiăn "mnăm êa hdơr kơ hnoh" truh kơ ai tiê "thŭn khua ƀiădah klei mĭn ƀrư̆ đĭ", mnuih khua thŭn Việt Nam mđĭ lar nanao klei mĭn cách mạng, klei khăp kơ lăn čar, ai tiê bruă klam leh anăn klei čang hmăng duh myơr; đru mguôp klei thâo, klei mĭn, kơhưm leh anăn ai tiê kơ bruă mkŏ mjing leh anăn răng mgang lăn čar.

Lŏ dlăng wĭt wưng păn bruă êgao, dŭm gưl Êpul hgŭm mnuih khua thŭn mlih mrâo leh mta phŭn, hdră ngă bruă, mđing ktang kơ nah gŭ leh anăn mâo lu boh tŭ dưn hlăm dŭm mta bruă. Bruă mkŏ mjing êpul hgŭm lŏ dơ̆ng mâo klei uêñ mĭn; bruă răng mgang, kriê dlăng leh anăn mđĭ lar bruă klam mnuih khua thŭn mâo lu klei bi mlih jăk.

Lu gru hmô klă sĭt dưi krơ̆ng kjăp, mđĭ lar msĕ si êpul hgŭm lu ênuk gưl čŏng bi đru; dŭm êpul hgŭm dhar kreh, kdŏ mmuñ, mjuăt ktang asei mlei, kriê dlăng klei suaih pral, răng mgang wăl hdĭp mda leh anăn đru kơ hdră duh ƀơ̆ng. Klei mtrŭt mjhar "Thŭn khua – klei bi hmô jăk" lŏ dơ̆ng lar bra, hŏng dŭm êklăk čô mnuih khua thŭn nao hgŭm mkŏ mjing Đảng, mkŏ mjing bruă kđi čar, msir mgaih ti gưl nah gŭ, mtrŭt mđĭ klei hriăm hră, klei thâo, rơ̆ng klei êđăp ênang, mkŏ mkra krĭng ƀuôn sang mrâo, ƀuôn prŏng kreh dhar.

Lu phung khua thŭn hur har mă bruă knuă, mkra mjing, mnia mblei; mâo dŭm gru mngač ngă bruă duh mkra mbruă, mđĭ kyar bruă lŏ hma doh, bruă duh mkra kluôm. Dŭm klei đru mguôp mơ̆ng phung khua thŭn hlăm gŏ sang leh anăn yang ƀuôn ƀrư̆ hruê ƀrư̆ dưi čih yap.

Hlăm boh klei lăn čar mŭt hlăm wưng đĭ kyar mrâo leh anăn klei đĭ khua mduôn mnuih ƀuôn sang mâo pral, Khua êpul hgŭm phung khua thŭn Việt Nam mñă klă, sa hlăm dŭm mta phŭn čiăng pŏk ngă jing mđĭ kyar "wăl anôk bruă duh mkra mnia mblei", mguôp hŏng klei čiăng ƀrư̆ lu mơ̆ng phung khua thŭn kơ bruă mdrao mgŭn, kriê dlăng sui thŭn, sang dôk, dhar kreh, hiu čhưn ênguê, mtô bi hriăm, kdrăp mrâo leh anăn dŭm bruă djŏ guôp; mlih ktang mơ̆ng klei mĭn "dlăng kriê" nao kơ bruă răng mgang, dlăng kriê, mđĭ lar bruă klam phung khua thŭn:

“Anăn yơh jing sa hdră êlan yuôm bhăn hlăm hdră êlan ala čar čiăng mdrơ̆ng hŏng klei mnuih khua thŭn đĭ; mjing klei găl leh anăn mjing djăp klei găl čiăng kơ mnuih khua thŭn lŏ dơ̆ng duh myơr leh anăn mđĭ lar. Mbĭt anăn, brei mkŏ mjing êpul knuă druh Êpul hgŭm brei klă sĭt jih ai tiê, hur har, jih ai tiê duh myơr, đua klam, mâo klei thâo mĭn, mâo klei thâo; mtrŭt mđĭ klei bi mlih mrô, bi mlih mtah; mđĭ hĭn klei bi hgŭm hŏng dŭm gưl, dŭm dhar bruă čiăng ngă jăk hĭn bruă răng mgang, kriê dlăng leh anăn mđĭ lar bruă klam mnuih khua thŭn hlăm boh klei mrâo.”

Ti anăp klei čiăng mdrơ̆ng hŏng hnơ̆ng đĭ prŏng pral mơ̆ng mnuih khua thŭn, Khua Dhar bruă Mặt trận čar kwar gưl dlông Việt Nam Bùi Thị Minh Hoài mñă klă brei mlih mrâo klei mĭn kơ bruă mnuih khua thŭn, mlih mơ̆ng dlăng mnuih khua thŭn jing phung dưi dưn hdră mtrŭn jing pô ngă bruă mđĭ kyar, mjing klei găl čiăng kơ mnuih khua thŭn lŏ hdĭp mơak, hdĭp suaih pral, hdĭp tŭ dưn leh anăn đru mguôp djŏ guôp hŏng klei suaih pral, klei thâo, klei hriăm, klei čiăng mơ̆ng pô.

Khua Dhar bruă gưl dlông mặt trận čar kwar Việt Nam Bùi Thị Minh Hoài mtă kơ dŭm gưl bruă Đảng, bruă sang čư̆ êa, mặt trận čar kwar, dŭm êpul êya leh anăn Êpul hgŭm phung khua thŭn lŏ dơ̆ng bi leh hdră mtrŭn, mlih mrâo mta phŭn, hdră ngă bruă; mđing dlăng kơ phung khua thŭn mâo klei hdĭp dleh dlan, phung dôk hjăn păn, phung dôk hlăm krĭng taih kbưi, krĭng mnuih djuê ƀiă; mbĭt anăn mjing klei găl čiăng kơ phung khua thŭn nao hgŭm đru mguôp klei blŭ mkŏ mjing Đảng, mkŏ mjing bruă sang čư̆ êa, mtô mjuăt knhuah gru, msir mghaih ti gưl nah gŭ, răng mgang klei êđăp ênang leh anăn mkŏ mjing klei hdĭp dhar kreh. Mbĭt anăn bi êdah klei đăo knang dŭm gưl mnuih khua thŭn Việt Nam lŏ dơ̆ng mđĭ lar ai tiê "Thŭn khua - Klei mngač", hrăm mbĭt hŏng kluôm Đảng, jih jang mnuih ƀuôn sang, lĭng kahan hluê ngă klei čang hmăng mđĭ kyar lăn čar mdrŏng sah, kreh dhar, yâo mơak. Khua kiă kriê dhar bruă gưl dlông mặt trận čar kwar Việt Nam Bùi Thị Minh Hoài mñă klă:

 “Hluê ngă jăk bruă răng mgang, kriê dlăng leh anăn mđĭ lar bruă klam mnuih khua thŭn; kriê dlăng, đru kơ mnuih khua thŭn mâo klei hdĭp dleh dlan, amâo lui mnuih khua thŭn kƀah klei găl kriê dlăng; mtrŭt mjhar mnuih khua thŭn mđĭ lar klei thâo, klei hriăm, đru mđĭ kyar bruă duh mkra ti alŭ wăl leh anăn lăn čar, mkŏ mjing klei bi mguôp jih jang djuê ana; ngă kdrông mkŏ kjăp plah wah Đảng, Knŭk kna hŏng mnuih khua thŭn. Gưl bruă Đảng, bruă sang čư̆ êa dŭm gưl brei mkŏ mjing klei găl čiăng kơ phung khua thŭn lŏ dơ̆ng nao hgŭm đru mguôp klei blŭ mkŏ mjing Đảng, mkŏ mjing bruă sang čư̆ êa, răng mgang klei êđăp ênang, mkŏ mjing klei hdĭp dhar kreh leh anăn bi kjăp klei bi mguôp jih jang djuê ana."./.