K’iăng khua bruă kƀĭn ala Đỗ Văn Chiến nao čuă, mđup brei mnơ̆ng Knăm mơak mlan pur ti Nghệ An
Thứ tư, 09:18, 23/09/2026
VOV Tây Nguyên
VOV Tây Nguyên
VOV.Êđê- Hruê mbruê 22/9, nao čuă, mđup brei mnơ̆ng leh anăn hơêč hmưi knăm mơak mlan pŭr kơ phung hđeh ti Anôk bruă kriê dlăng phung hđeh Nghệ An, K'iăng khua anôk bruă kƀĭn ala Đỗ Văn Chiến mtă kơ dŭm gưl bruă Đảng, bruă sang čư̆ êa, dŭm knơ̆ng, dhar bruă čar Nghệ An lŏ dơ̆ng uêñ mĭn, kriê dlăng jăk hĭn kơ phung hđeh; amâo brei klei dleh dlan ngă luč klei găl dưi hriăm hră, rông ba klei čang hmăng.
K'iăng khua anôk bruă kƀĭn ala Đỗ Văn Chiến bi myuôm klei uêñ mĭn mơ̆ng čar Nghệ An hŏng bruă kriê dlăng, răng mgang leh anăn mtô mjuăt phung hđeh, boh nik phung hđeh mâo klei hdĭp dleh dlan. Kluôm čar ară anei mâo giăm 8.000 čô hđeh mâo klei hdĭp dleh dlan dưi mđing dlăng, đru hŏng lu hdră.
Dŭm gru hmô kriê dlăng, rông ba leh anăn đru kơ phung hđeh ƀrư̆ hruê ƀrư̆ lu jơr, djŏ guôp hŏng grăp boh klei mdê mdê. K’iăng khua anôk bruă kƀĭn ala Đỗ Văn Chiến čang hmăng phung hđeh mâo nanao klei gĭr hriăm hră, thâo gưt, thâo bi mguôp, hluê ngă jăk 5 mta klei Awa Hồ mtă; amâo uêñ kơ klei hdĭp dleh dlan ƀiădah brei mâo klei đăo knang, klei gĭr leh anăn klei čang hmăng kơ êdei anăp.
Viết bình luận