Sang hră hđeh điêt Gia Bắc, să Sơn Điền, čar Lâm Đồng mâo 7 adŭ hŏng 230 čô hđeh mơ̆ng 25 mlan truh kơ 6 thŭn leh anăn 98% jing anak aneh mnuih djuê ƀiă K'Ho Nộp. Leh 2 hruê kăm pŏk thŭn hriăm bruă dlăng kriê klei huă ƀơ̆ng kơ hđeh dưi mâo leh sang hră hluê ngă djŏ klei kčah mtrŭn. Êpul khua kiă kriê sang hră hđeh điêt Gia Bắc ăt dưi mkŏ mjing leh lu klei bi mguôp čiăng dŭ mdiăng mnơ̆ng ƀơ̆ng grăp hruê mơ̆ng wăl krah Di Linh truh kơ sang hră rơ̆ng mtah jăk wăt tơdah kbưi truh 35km. Nai mtô Nguyễn Thị Tuyết Lan, Khua sang hră gưl hđeh điêt Gia Bắc, brei thâo, mbĭt hŏng anôk bruă nah gŭ jăk siam, mnơ̆ng yua mtô bi hriăm dưi blei mprăp djăp ênŭm, dŭm klei huă ƀơ̆ng yang hruê dơ̆ng rơ̆ng hnơ̆ng tŭ jăk jing klei ƀuăn rơ̆ng mơ̆ng sang hră čiăng kơ jih jang amĭ ama hđeh hơĭt ai tiê ba anak kơ sang hră:

"Kriê dlăng jăk hĭn dŭm mmông huă ƀơ̆ng kơ phung hđeh hmei mkŏ mjing mmông huă ƀơ̆ng gŏ sang amâodah jing dŭm mmông buffet. Phung amĭ ama ƀuh anak pô dưi huă ƀơ̆ng êsei djam hlơr, mâo phung nai kriê dlăng jăk leh anăn phung hđeh dưi ngă bruă, đĭ kyar 5 mta hlăm dŭm klei hriăm snăn phung amĭ ama đăo knang êdi."

Ti sang hră gưl sa-gưl dua Gia Bắc, 656 čô hđeh leh dŭm mmông hriăm hlăm adŭ lŏ dưi nao hgŭm hlăm lu hdră bruă êngao adŭ, pŏk mlar klei thâo săng hluê hŏng sang dlăng hră sang hră hŏng dŭm êtuh pŏk hdruôm hră tŭ yuôm. Kyua anăn khă gơ̆ mrâo êgao 2 hruê kăm mơ̆ng thŭn hriăm mrâo, klei hriăm mơ̆ng phung hđeh nao hlăm klei bhiăn hŏng hnơ̆ng nao hriăm lu. Adei Ka Mộng Diệu, hđeh hriăm adŭ 5C, Sang hră gưl sa-gưl dua Gia Bắc, să Sơn Điền, brei thâo:

“Kâo ƀuh nao sang hră mơak snăk kyua dưi hriăm mbĭt hŏng phung ƀĭng găp. Mnơ̆ng yua hriăm hră kâo mâo djăp ênŭm. Hlăm adŭ nai mtô kâo đru lu êdi hlăm klei hriăm hră. Kâo khăp hriăm hĭn klei hriăm Toán leh anăn klei hriăm mmuñ. Asei kâo pô ƀuh kâo gĭr hlăm thŭn hriăm anei kâo srăng jing hđeh hriăm thâo êdi.”

Thŭn hriăm 2026- 2027 să Sơn Điền mâo 2 sang hră gưl hđeh điêt, 1 sang hră gưl sa leh anăn 2 sang hră gưl dua hŏng ênoh jih jang 1.722 čô hđeh hriăm hră, ênoh hđeh hriăm hră mnuih djuê ƀiă truh êbeh 94%. Mbĭt hŏng dŭm hdră êlan mơ̆ng Đảng, Knŭk kna amâo liê prăk hriăm hră, đru prăk bi liê hriăm hră, phung hđeh ti să Sơn Điền lŏ dưi mâo klei uêñ mĭn mơ̆ng bruă sang čư̆ êa, dŭm êpul êya alŭ wăl leh anăn lu phung mâo ai tiê kmah hlăm leh anăn êngao čar Lâm Đồng. Wăt tơdah jing krĭng dleh dlan ƀiădah jih jang anôk bruă mtô bi hriăm ti Sơn Điền jing jăk siam. Phung hđeh nao sang hră hŏng kdrăp čŭt hơô bi msiam, doh siam ai tiê êđăp ênang, hơ̆k mơak. Vũ Đức Nhuần, Khua anôk bruă sang čư̆ êa să Sơn Điền, bi mklă:

“Să Sơn Điền jing să dleh dlan ƀiădah bruă mtô mjuăt bi hriăm jing brei dôk hlăm êpul jăk mơ̆ng čar. Wăt tơdah klei dleh dlan ƀiădah ăt bi đua klam mtô jăk, hriăm jăk msĕ si klei mtă mơ̆ng Khua gĭt gai Hồ Chí Minh. Thŭn hriăm mrâo dŭm sang hră mâo leh klei mprăp jăk leh anăn boh nik hŏng phung nai mtô ăt mâo ai êwa mrâo. Hmei jao leh kơ Adŭ bruă duh mkra mnia mblei mđing dŭm ai dưi đru hmao kơ dŭm sang hră hlăm boh klei mrâo bluh mâo.”

Mbĭt hŏng pral bi hơĭt bruă mtô bi hriăm leh 2 hruê kăm pŏk thŭn hriăm mrâo, Êpul khua kiă kriê 5 sang hră mơ̆ng gưl hđeh điêt truh kơ gưl 2 ti să dleh dlan Sơn Điền, čar Lâm Đồng ăt dôk gĭr hluê ngă hdră mlih mrô mđing kơ bruă ba yua, ba yua tŭ dưn phần mềm kriê dlăng bruă mtô bi hriăm, anôk bruă klei mrâo leh anăn dŭm kdrăp yua kriê dlăng, mtô bi hriăm.

Bi hŏng klei kƀah hdruôm hră hriăm, boh nik hŏng gưl 9, nai mtô Nguyễn Đình Tú, Khua sang hră gưl sa-gưl dua Gia Bắc, să Sơn Điền, brei thâo, êjai dôk guôn hdruôm hră mơ̆ng anôk bruă kuôl kă mkăp brei, sang hră čŏng ngă dŭm hdră msir čiăng rơ̆ng kơ klei hriăm mơ̆ng phung hđeh:

"Tơdah hdruôm hră hriăm gưl 1 dưi ba wĭt mơ̆ng sang mnia, sang hră mâo mkŏ mjing mbha tui si ênoh hđeh hlăm adŭ. Msĕ si sa boh adŭ mâo 100 hdruôm hră snăn mbha bi knar hŏng hđeh. Tal dua jing mkŏ mjing hđeh hriăm mbĭt ƀiă êdi mâo sa hdruôm hră hriăm čiăng kơ diñu yua. Sang hră mkŏ mjing dŭm mmông hriăm êpul čiăng dưi dưn yua hdruôm hră hriăm."

Mơ̆ng dŭm mmông huă ƀơ̆ng ti sang hră dưi kriê dlăng djăp ênŭm, dŭm adŭ hriăm ƀrư̆ hruê ƀrư̆ prŏng siam, truh kơ klei jih ai tiê mơ̆ng nai mtô leh anăn klei hrăm mbĭt mơ̆ng bruă sang čư̆ êa, phung amĭ ama, êpul êya, jih jang dôk đru mguôp mjing sa thŭn hriăm mrâo lu klei mơak ti să dleh dlan Sơn Điền, čar Lâm Đồng. Hŏng klei gĭr ktưn "să dleh dlan ƀiădah mtô bi hriăm brei jăk", Sơn Điền dôk ƀrư̆ ƀrư̆ bi mlih klei mđing dlăng, duh bi liê jing boh tŭ dưn klă klơ̆ng hlăm grăp boh adŭ hriăm, grăp blư̆ huă ƀơ̆ng leh anăn grăp hruê nao sang hră mơ̆ng phung hđeh.