Hră čih Hdră bhiăn mâo 13 kdrêč, bi hrŏ 03 kdrêč mkă hŏng hdră čih mơ̆ng Hdră bhiăn lăn ala thŭn 2024, dŭm mta klei kčah mtrŭn kơ klei bhiăn hlăm dŭm kdrêč anei dưi bi mguôp hlăm dŭm kdrêč adôk. Kơ ênoh mta klei, hdră bhiăn mâo 115 mta (Hdră bhiăn lăn ala thŭn 2024 jing 260 mta).

Ti anôk bi kƀĭn, dŭm phŭn, dhar bruă mđing bi trông kơ dŭm mta bruă dôk mâo klei blŭ mdê mdê msĕ si: klei dưi hluê ngă mta phŭn kriê dlăng knŭk kna kơ lăn ala; Kơ bruă ngă hră mơar, bi mklă klei kuôl kă, hră mơar hluê ngă dŭm klei dưi mơ̆ng pô yua lăn; Kơ bruă hrui mă lăn kyua mta kñăm mđĭ kyar bruă duh mkra ala ƀuôn kyua klei tŭ dưn kơ lăn čar. Klah čŭn klei bi kƀĭn, K'iăng khua knŭk kna Hồ Quốc Dũng mñă klă, anei jing hdră bhiăn mâo klei hmăi êlam, kluôm dhuôm truh kơ dŭm mta bruă hlăm klei hdĭp yang ƀuôn. K'iăng khua knŭk kna jao kơ phŭn bruă lŏ hma leh anăn wăl hdĭp mda gĭt gai bi hgŭm hŏng dŭm anôk bruă djŏ tuôm lŏ dơ̆ng ksiêm dlăng, ksiêm duah bi nik, bi tŭ ư hdră êlan hlăm klei čih mkra hdră bhiăn, rơ̆ng klei dưi ngă bruă, tŭ dưn, bi hrŏ jih hnơ̆ng klei gun kpăk hlăm klei mkra mlih leh ba mdah.