Phung bi ala pioh jih hruê čiăng bi trông hlăm êpul kơ dŭm hdră bhiăn, hdră mtrŭn yuôm bhăn leh anăn mjêč. Aguah, phung bi ala bi trông hlăm êpul kơ 3 hdră bhiăn jing: Hdră bhiăn gang mkhư̆ klei ba yua phao ktuang bi mdjiê lu mnuih; Hdră bhiăn mkra mlih, thiăm mbŏ dŭm mta mơ̆ng 9 hdră bhiăn kơ bruă lĭng kahan, răng mgang klei êđăp ênang; Hdră bhiăn mtô mblang, mjuăt bi hriăm hdră bhiăn (mkra mlih).

Tlam, phung bi ala bi trông hlăm êpul kơ Hdră bhiăn êa pui êwa čuh (mkra mlih) leh anăn Hdră bhiăn mkra mlih, thiăm mbŏ dŭm mta mơ̆ng Hdră bhiăn klei đua klam tla hnô mơ̆ng Knŭk kna. Ăt hlăm tlam mbruê, phung bi ala mđing bi trông, đru mguôp klei blŭ kơ Hdră mtrŭn mơ̆ng Anôk bruă kƀĭn ala kơ hdră êlan, hdră mtrŭn mdê hjăn čiăng msir mgaih klei ngă soh hŏng hdră bhiăn djŏ tuôm kơ bruă duh mkra knŭk kna, bruă duh mkra êngao knŭk kna leh anăn ba yua klei kreh knhâo, kdrăp mrâo, mlih mrâo mbruă, bi mlih mrô.