Hdră mtrŭn mâo boh tŭ ba yua hruê 5/6/2026, hŏng lu klei găl đru mrâo, mđing truh kơ bruă răng mgang knhuah gru hŏng sa hdră klă sĭt lehanăn hơĭt kjăp hĭn. Hdră mtrŭn mđing hlăm 5 mta bruă phŭn, mâo: Mtô, lŏ krŭ wĭt wăl anôk dhar kreh čing čhar, đru krơ̆ng kjăp hdră ngă bruă mơ̆ng êpul, lŏ mkra mđĭ sang krum lehanăn wăl anôk êpul êya mguôp hŏng hdră hiu čhưn ênguê, mbĭt anăn mtrŭt mđĭ hdră bi mlih mrô čiăng krơ̆ng kjăp wăl anôk dhar kreh. Hluê hdră mtrŭn, Dak Lak srăng đru 80.000 prăk/čô/hruê prăk huă ƀơ̆ng lehanăn êrô êbat kơ mnuih nao hlăm adŭ mtô tông čing ti êpul êya; đru 300.000 prăk/hruê/čô tơdah nao hgŭm hlăm hdră krŭ wŭt; 200.000 prăk/hruê/čô hŏng mnuih nao ksiêm dlăng, đru mă rup, mă asăp.

Čar đru 5 êklăk prăk/êpul hgŭm bruă/thŭn, mbĭt anăn mkăp prăk kăk blei mprăp čing čhar, kdrăp čŭt hơô lehanăn kdrăp mă asăp. Dŭm êpul hgŭm bruă dưi dưn hdră mtrŭn anei brei mâo ƀiă êdi 10 čô hgŭm lehanăn mâo hdră mjĕ mjuk ƀiă êdi 1 mlan/blư̆. Mguôp bruă răng mgang dhar kreh čing čhar hŏng hdră mđĭ kyar bruă hiu čhưn ênguê êpul êya, čar Dak Lak tĭng ruah ƀiă êdi 1 ƀuôn êdah êdi ti dŭm să, ƀuôn hgŭm mâo leh klei čuăl mkă čiăng mkŏ mkra wăl anôk tui ksiêm čing čhar, đru mjing hdră duh ƀơ̆ng kơ mnuih ƀuôn sang djuê ƀiă tinei mtam./.