Anôk bruă mtô bi hriăm mdê hjăn Pandur, ti alŭ Xuân An 2, să Bắc Bình, čar Lâm Đồng (hlăm krĭng wăl Bắc Bình, čar Bình Thuận hđăp) – anôk dôk ba yua dŭm hdră mdrao mgŭn đru kơ phung hđeh amâo jăk hlăm kŏ dlô leh anăn dleh dlan hlăm klei hriăm hră kơrŭ wĭt leh anăn ñŭ hma hŏng ƀĭng găp mkăn. Nai Thanh Thị Hằng, pô siă suôr hŏng Anôk bruă mơ̆ng hruê mphŭn mkŏ mjing brei thâo, anei amâo djŏ knŏng jing anôk mă bruă ôh ƀiădah lŏ jing boh sang pô.

 “Hŏng phung hđeh amâo jăk hlăm kŏ dlô, amâo dưi ktuê dlăng bruă ngă snăn bruă mtô kơ phung hđeh jing dleh dlan snăk mkă hŏng hđeh mkăn. Anăn ăt jing klei mđĭ ai đru ñu ngă bruă ti Anôk bruă čiăng mđĭ thiăm klei thâo leh anăn klei thơ̆ng kơ bruă čiăng mtô kơ phung hđeh hŏng klei djŏ guôp hĭn, đru kơ phung hđeh hnưm nu’ kma hlăm êpul êya. Anăn jing klei kâo mơak prŏng hĭn.”

Bi  hŏng nai mtô mda asei Lư Thị Mỹ Viên, klei mơak prŏng hĭn jing tơdah ƀuh phung hđeh hriê kơ prŏng grăp hruê.

 “Boh kdrŭt čiăng kơ ñu găn klei dleh dlan jing tơdah mtô klei thâo mâo phung hđeh tui hriăm leh anăn hlue ngă. Sitôhmô, kâo lač hđeh mă êa kơ nai mnăm snăn hđeh săng leh anăn nao mă. Leh anăn mâo hđeh ăt thâo kral anei jing jep pô, amâodah đĭ êdeh snănj srăng đĭ ti tluôn. Yuôm bhăn hĭn jing đru kơ hđeh hrŏ klei ngă jhat huĭ hyưt leh anăn ƀrư̆ suaih pral hĭn.”

Nai mtô ti anôk bruă tuôm hŏng klei suăi êmăn leh anăn brei mâo klei gĭr ktưn lu snăk, hŏng hdră mtô bi hriăm mdê hjăn kơ hđeh amâo jăk kơ klei mĭn, kŏ dlô, ai tiê, amâo thâo blŭ leh anăn amâo jăk kơ asei mlei. Grăp čô nai wăt hlăm ti gưl thŭn, klei hdĭp mdê mdê ƀiădah tơdah ruah bruă mtô bi hriăm mdê hjăn, diñu mâo klei msĕ si klei khăp êbeh dlai kơ hđeh, jhŏng săn asei, tŭ djăp klei dleh dlan, lông dlăng leh anăn bi mklă kơ pô sa klei mĭn srăng mă bruă sui.

 Nai Nguyễn Thị Bích Thủy, pô mkŏ mjing Anôk bruă brei thâo, hlăk adôk djă bai nao sang hră ñu ƀuh lu klei hdĭp amâo myun msĕ si: hđeh amâo jăk hlăm klei mĭn dleh dlan hlăm klei hriăm hră; amâo dưi ktuê dlăng klei blŭ, bruă ngă... Hŏng klei mĭn đru kơ hđeh mơ̆ng hnưm čiăng dưi ñŭ kma hŏng êpul êya, ñu mkŏ mjing leh anôk bruă anei:

Kâo ƀuh klei čiăng ti ƀuôn sang pô kơ phung hđeh amâo jăk hlăm klei mĭn, ai tiê leh anăn êmưt hriê kơ prŏng jing ka mâo klei găl čiăng mdrao hnưm, djŏ hdră msĕ si hlăm ƀuôn prŏng Hồ Chí Ming. Mbĭt anăn lu phung amĭ ama adôk kƀah klei thâo leh anăn klei hâo hưn. Kâo pô jing nai, kâo ăt čang hmăng ba klei thâo leh anăn klei pô hriăm leh, tuôm ngă leh ti ƀuôn prŏng Hồ Chí Minh ba tinei đru kơ phung hđeh.”

 Hlăk mphuŭn mkŏ mjing, Anôk bruă knŏng mâo dŭm čô amĭ ama ba anak hriê tinei. Leh sa wưng, hŏng klei tŭ dưn mơ̆ng hdră mtô bi hriăm mơ̆ng Anôk bruă, lu gŏ sang mâo anak čô amâo thâo blŭ, amâo jăk hlăm ai tiê, klei mĭn... đăo knang ba leh anak pô hriê ti Anôk bruă čiăng dưi kčĕ mdrao mgŭn bi djŏ guôp. Amai Đào Thị Thanh Xuân, brei thâo, kyua mâo phung nai ti Anôk bruă đru kčĕ leh anăn mdrao mgŭn hnưm, ară anei anak ñu ñŭ kma leh hŏng phung hđeh suaih pral mkăn.

Mơ̆ng hdră mdrao mgŭn, mơ̆ng dôk tinăn truh kơ mdrao hjăn snăn anak kâo ară anei adŭ sa leh. Ară anei kâo ƀuh anak hriê kơ prŏng msĕ si sa čô hđeh mkăn. Sitôhmô, tơdah arăng bi tuôm hŏng ñu amâo mĭn ôh ñuu tuôm mâo klei ruă, tơdah pô amâo yăl dliê snăn arăng mĭn anak pô msĕ hŏng hđeh mkăn mơh. Phung nai đru kčĕ, mđĭ aim bi juh leh anăn hŏng klei gĭr, kyua anăn ară anei anak kâo hriê kơ prŏng kluôm dhuôm jăk leh.”

Truh ară anei Anôk bruă mtô bi hriăm mdê hjăn Pandur dôk mâo 43 čô hđeh hŏng 2 anôk bruă. Mâo phung hđeh mâo 2 thŭn leh anăn ăt mâo hđeh êbeh 5 thŭn, grăp čô hđeh mâo klei bi knăl mdê mdê, klei ktrŏ, hdjul mdê mdê. Kyua anăn, Anôk bruă mbha lu adŭ leh anăn ba yua hdră mdrao mgŭn mdê mdê. Leh anăn êdei kơ 6 mlan truh 1 thŭn, boh nik 2-3 thŭn, boh klei phung hđeh srăng dưi mkra mlih.

 Nao čhưn leh anăn mđup brei  mnơ̆ng kơ Anôk bruă, Trương Mai Mạnh,  Khua dlăng bruă Êpul bruă mặt trận čar kwar Việt Nam čar Lâm Đồng mpŭ snăk kơ phung mă bruă mtô bi hriăm mdê hjăn - phung nai mtô mdê hjăn kriê dlăng hđeh hŏng jih ai tiê leh anăn klei săn asei hgăm.

Bruă mtô phung hđeh jing sa bruă yuôm bhăn leh, ƀiădah hŏng phung nai tinei digơ̆ gĭr lu hĭn mkă hŏng bruă nai mtô hđeh. Kyua phung hđeh amâo jăk hlăm kŏ dlô jing phung hđeh amâo dưi ktuê dlăng bruă ngă, klei blŭ, phung hđeh amâo dưi ktuê dlăng ôh klei pô ngă snăn brei mâo klei gĭr lu snăk mơ̆ng phung nai mtô hđeh.”

Ară anei, hdră êlan đru kơ hdră bhiăn kơ klei mtô phung hđeh amâo jăk hlăm kŏ dlô, klei mĭn adôk lu klei dleh dlan, êdu kƀah. Klei dưi dưn kơ phung nai mtô hđeh mdê hjăn anăn adôk ƀiă. ƀiădah phung nai ti Anôk bruă ăt gĭr nanao, gĭr grăp hruê  kuč mngač hdră êlan mđup brei klei khăp, jao klei čang hmăng./.