Hluê ngă hdră mtrŭn mrô 72 mơ̆ng Phŭn bruă kđi čar, Knơ̆ng bruă sang čư̆ êa čar Dak Lak mkăp leh 400 êklai prăk čiăng mkŏ mjing bruă ksiêm mkă dlăng klei suaih pral grăp gưl, ksiêm mkă dlăng amâo mă prăk kơ jih jang mnuih ƀuôn sang. Ară anei mâo leh 2,08 êklăk čô mnuih nao ti dŭm anôk bruă mdrao mgŭn ksiêm mkă dlăng, mâo ênoh êbeh 67%. Dŭm alŭ wăl mâo ênoh mnuih ƀuôn sang nao ksiêm mkă dlăng lu hĭn hnơ̆ng kah knar jing dŭm să Krông Hinh, Tây Hòa, Ea Rốk…

Čiăng dưi mâo boh tŭ anei, čar Dak Lak mkŏ mjing leh hdră ngă bruă klă klơ̆ng, djăp ênŭm mơ̆ng čar truh kơ alŭ ƀuôn; bruă mdrao mgŭn leh anăn bruă sang čư̆ êa dŭm gưl hrăm mbĭt gĭr ktưn. Ară anei Dak Lak dôk mkŏ mjing lu êpul nao ksiêm mkă dlăng ti dŭm alŭ wăl krĭng taih kbưi, krĭng dleh dlan, krĭng knông lăn, gĭr bi leh bruă ksiêm mkă dlăng klei suaih pral kơ jih jang mnuih ƀuôn sang hlăm thŭn anei.