Mđing truh kơ klei bi hdơr 79 thŭn Hrue kahan êka êkeh–phung êngiă asei (27/7), aguah anei (23/7), ti Hà Nội, Phŭn bruă mnuih mă bruă kahan êka leh anăn ala buôn kiă kriê, bi mguôp hŏng dŭm anôk bruă djŏ tuôm yuôm bhăn mkŏ mjing klei bi kƀĭn mpŭ mni kơ mnuih mâo ai hŏng lăn čar kluôm ala thŭn 2026. Êbeh 300 čô bi ala mnuih mâo bruă tŭ dưn êdah êdi bi ala kơ dŭm êklăk čô kahan êka êkeh, kahan ruă duam, găp djuê phung djiê êngiă leh anăn mnuih mâo bruă tŭ yuôm hlăm djăp krĭng kwar hlăm ala čar nao ti anôk bi kƀĭn.

Anei jing dŭm gru mngač kơ klei gĭr ktưn kpưn đĭ, lŏ dơ̆ng đru mguôp jăk kơ hdră mkŏ mkra, mđĭ kyar ala čar leh anăn răng mgang ala čar hlăm wưng mrâo. Klei bi kƀĭn jing wưng čiăng kơ Đảng, knŭk kna leh anăn mnuih ƀuôn sang bi êdah klei hdơr knga prŏng prĭn hŏng dŭm klei duh myơr, săn asei lu snăk mơ̆ng phung jhŏng ktang djiê êngiă, kahan êka êkeh. Hluê anăn bi êdah klei gĭr ktưn lŏ dơ̆ng hluê ngă tŭ dưn dŭm hdră mtrŭn hdơr knga tla ai hŏng dŭm gŏ sang knŭk kna dlăng ba.