Sang mrâo prŏng êbeh 50 m2 mơ̆ng gŏ sang Dương Thị Thành, să Ia Phí, čar Gia Lai dôk mŭt hlăm wưng bi leh. Ama ñu jing mnuih ngă bruă bi kdơ̆ng hŏng êa drao ruă, bi ñu pô mâo klei ruă djŏ drao ruă điosin hŏng klei amâo mâo jăk kơ klang rŏng.

Dăl hlăm dua pluh thŭn êgao, tlâo čô amĭ anak hdĭp hlăm sa boh sang jhat rai. Truh kơ ară anei, kyua mâo klei đru mơ̆ng knŭk kna leh anăn dŭm hruê mă bruă mơ̆ng phung knuă druh, lĭng kahan Đại đội 17, Trung đoàn 48, Sư đoàn 320, Êpul kahan 34, klei hmăng hmưi kơ sa boh sang kjăp dôk jing sĭt. Amai Dương Thị Thành mgei ai tiê brei thâo:

"Lĭng kahan hriê mdơ̆ng sang kơ mnuih ƀuôn sang dleh dlan msĕ hŏng gŏ sang kâo hŏng klei hmăng hmưi mâo sa boh sang huh mđao mgi dih. Gŏ sang mơak snăk, lač jăk kơ bruă Đảng leh anăn bruă sang čư̆ êa đru leh sang kơ amĭ anak kâo čiăng kơ kâo leh anăn anak êkei mâo klei hdĭp jăk êdei anăp.”

Ti să Ia Ly, gŏ sang Nguyễn Văn Tân ăt dôk mjêč ruăt dôk guôn hruê mdơ̆ng sang mrâo. Jing mnuih ngă bruă krŭ kdơ̆ng djŏ êa drao ruă, phung anak ñu ăt mâo klei truh amâo jăk kyua anăn amâo dưi mă bruă ktrŏ ôh. Sang hđăp mdơ̆ng mơ̆ng 30 thŭn êlâo jhat rai kjham leh ƀiădah lu thŭn êgao gŏ sang amâo djăp klei găl mkra mđĭ. Ară anei, hŏng klei hgŭm kngan mơ̆ng Knŭk kna, lĭng kahan, găp djuê leh anăn mnuih ƀuôn sang, sang mrâo dôk mjêč bi leh êlâo kơ yan hjan. Nguyễn Văn Tân mgei ai tiê brei thâo:

"Sang hđăp kâo mdơ̆ng mơ̆ng hlăk thŭn 1996 snăn jhat rai leh. Ƀri mơh mâo Đảng, knŭk kna leh anăn lĭng kahan đru mkra brei leh kơ gŏ sang sang sa boh sang prŏng siam hĭn. Lač jăk kơ Đảng, bruă sang čư̆ êa, leh anăn phung kahan mâo đru leh gŏ sang dưi mdrơ̆ng hŏng adiê hjan angĭn êbŭ, čiăng thâo amâo  mâo ôh hlei pô lui ti tluôn.”

Ti tluôn klei hơ̆k mơak mơ̆ng dŭm gŏ sang jing dŭm hruê mă bruă amâo uêñ kơ adiê mđiă hjan mơ̆ng phung knuă druh, lĭng kahan. Mơ̆ng klei sang hđăp, klei ƀăng, čuk hli, mdiăng mnơ̆ng truh kơ mdơ̆ng mtih, tuh ƀêtông...jih jang mâo phung lĭng kahan ngă sơăi, đru bi hrŏ ênoh prăk mưn mnuih mă bruă kơ dŭm gŏ êsei. Thiếu tá Phạm Văn Tạo, Khua Đại đội 17, brei thâo:

"Hluê ngă hdră msir lăm sang dôk êjai, sang tĭ ƀrôč kơ mnuih nao hlăm klei bi blah mâo anak djŏ êa drao ruă, Trung đoàn 48 mbha grăp boh sang mâo 7 čô knuă druh, lĭng kahan klă anăp rŭ mdơ̆ng. Hmei gĭr bi leh hnưm hĭn wưng kčah, msir mghaih jih klei dleh dlan čiăng bi leh jăk bruă klam.”

Hluê ngă hdră êlan mơ̆ng knŭk kna kơ klei đru lăm lui sang dôk êjai, sang tĭ ƀrôč kơ anak čô mơ̆ng mnuih ngă bruă krŭ kdơ̆ng djŏ êa drao ruă, kluôm čar Gia Lai mâo 79 gŏ sang dưi mâo klei đru rŭ mdơ̆ng mrâo leh anăn mkra mđĭ sang dôk. Grăp boh sang dôk ƀrư̆ bi leh jing mâo thiăm sang hơuh mđao dưi mdơ̆ng hŏng klei khăp lĭng kahan- mnuih ƀuôn sang.

 Võ Lê Xuân Thiện, Khua Knơ̆ng bruă sang čư̆ êa să Mang Yang, brei thâo, mơ̆ng bruă đru rŭ mdơ̆ng sang dôk, dŭm alŭ wăl ăt bi mklă anei jing knhuang tal êlâo čiăng kơ dŭm gŏ sang knŭk kna dlăng ba hơĭt klei hdĭp mda, ƀrư̆ ƀrư̆ mđĭ kyar bruă duh mkra leh mâo anôk dôk kjăp.

"Hlăm alŭ wăl să Mang Yang leh bi mŭt mbĭt ară anei mâo 169 gŏ sang knŭk kna dlăng ba, mnuih mâo bruă tŭ dưn, truh kơ ară anei dŭm gŏ sang phŭn mâo leh sang dôk hơĭt kjăp. Thŭn 2026, ƀuôn hgŭm dôk bi mguôp rŭ mdơ̆ng 2 boh sang hluê si hdră mơ̆ng Anôk bruă gĭt gai lĭng kahan. Leh mnuih ƀuôn sang mâo sang dôk kjăp, să srăng lŏ dơ̆ng mđing đru mđĭ kyar bruă duh mkra, mđĭ klei hdĭp mda".

Mơ̆ng klei mđing dlăng anăn yơh, klei hơ̆k mơak dôk dơ̆ng mâo hlăm lu gŏ sang. Ti să Mang Yang, boh sang mrâo prŏng 65m2 mơ̆ng ayŏng Nguyễn Văn Dũng -anak mơ̆ng pô mă bruă bi kdơ̆ng hŏng klei djŏ êa drao ruă ăt dôk bi leh.

Hŏng gŏ sang êma čô mơ̆ng ñu, anăn amâo djŏ knŏng jing anôk gang mđiă hjan ôh ƀiădah lŏ jing klei knang čiăng kơ ung mô̆ hơĭt ai tiê mă bruă knuă, phung anak mâo klei găl hriăm hră jăk hĭn.

"Ung mô̆ kâo mâo klei lač jăk êdi hlăk Đảng, knŭk kna leh anăn bruă sang čư̆ êa alŭ wăl đru mdơ̆ng brei leh kơ gŏ sang sa boh sang dôk, hơĭt ai tiê mă bruă knuă leh anăn phung hđeh mâo sang huh mđao čiăng gĭr ktưn hriăm hră mơar, jing mnuih ƀuôn sang jăk êdei anei duh kơ lăn čar, ala ƀuôn.”

Klei bi blah dưi msưh kdŭn leh ƀiădah dŭm klei truh amâo jăk ăt dôk mâo hlăm klei hdĭp lu gŏ sang. Kyua anăn, grăp boh sang mrâo dưi rŭ mdơ̆ng amâo djŏ knŏng đru kơ mnuih ƀuôn sang êđăp ênang ôh ƀiă dah lŏ jing klei bi êdah klă kơ klei bhiăn “Mnăm êa hdơr kơ hnoh”. Klei thâo bi đru dôk mâo hlăm grăp boh sang, grăp klei hdĭp dưi mâo thiăm klei đăo knang leh anăn klei čang hmăng./.