Hluê si Klei hưn mdah bruă mnuih ƀuôn sang čiăng, Anôk bruă kiă kriê klei đru kơ yang ƀuôn leh anăn ktuê dlăng akâo kơ Knŭk kna mđing gĭt gai lu bruă mjêč msĕ si mjêč ksiêm duah, bi klă boh klei anôk bi lông Toán mâo klei bi knăl amâo jăk ti Tuyên Quang; mđĭ ktang bruă bi kdơ̆ng hŏng klei mkra mjing, mnia mblei mnơ̆ng mgưt, mnơ̆ntg mgưt, êa drao mgưt; mtrŭt mđĭ hdră gang mkhư̆ klei ruă êngoh bi ƀlĕ êrah; msir mghaih klei ngă soh hlăm bruă čih mkra; rơ̆ng klei êđăp ênang gang mkhư̆ , truih mdjiê klei pui ƀơ̆ng, êlan êa leh anăn msir mghaih jih klei kčŭt hưn lu mnuih, sui hruê mlan.

Dưi ƀuh, jih jang klei akâo kbiă hriê mơ̆ng dŭm mta bruă hlăk hmăi djŏ hŏng klei tŭ dưn lehanăn klei hdĭp mda mnuih ƀuôn sang. Hlăm anăn, boh klei mnơ̆ng mgưt, ƀơ̆ng mta mgưt leh anăn êa drao mgưt dôk ngă lu klei hŭi hyưt kyua amâo djŏ knŏng hmăi kơ klei suaih pral ôh ƀiădah lŏ bi rai klei đăo knang mơ̆ng mnuih blei yua, ngă luič liê kơ knơ̆ng bruă duh mkra ngă bruă djŏ hdră bhiăn. Năng mđing hĭn, klei kiă kriê ênoh ênil hlăm anôk mnia mblei ăt mâo lu phung bi ala lač mơh, Khua anôk bruă kiă kriê klei kreh knhâo, kdrăp mrâo lehanăn wăl hdĭp mda Nguyễn Thanh Hải lač, čiăng bi êdah klă hĭn dŭm klei dôk bi mĭn mơ̆ng mnuih ƀuôn sang kơ boh klei ênoh ênil mnơ̆ng dhơ̆ng hlăm wưng êgao.

"Phung bi ala kơ mnuih ƀuôn sang mâo mơh klei bi êdah msĕ snei. Êjai ênoh êa săng êa pui hlăm tar rŏng lăn đĭ, ênoh ênil mnơ̆ng dhơ̆ng hlăm anôk mnia mblei ăt mâo klei đĭ hluê leh anăn pral snăk...Ƀiădah êjai ênoh êa săng êa pui trŭn snăn ênoh ênil ti êngao anôk mnia mblei amâo mâo trŭn amâodah klei trŭn êmưt snăk. Ti phŭn agha? Si ngă klei kiă kriê kơ ênoh ênil, si ngă klei knŭk kna kiă kriê hlăm bruă anei klă mngač leh anăn si bruă klam mâo?".

Anei ăt jing boh sĭt mơ̆ng lu mnuih ƀuôn sang ƀuh klă hlăm klei hdĭp grăp hruê. Ênoh êa săng, êa pui dưi dlăng jing mta phŭn mơ̆ng lu bruă mkra mjing, dŭ mdiăng. Ƀiădah êjai ênoh êa săng êa pui trŭn, lu mta mnơ̆ng dhơ̆ng ăt dôk yuôm nanao, ngă kơ ênoh bi liê hlăm klei hdĭp mda mnuih ƀuôn sang ka dưi mkra mđĭ bi knar ôh. Klei anei mdưm leh klei akâo čiăng kơ dŭm anôk bruă kiă kriê hlăm bruă mđĭ hĭn klei ksiêm dlăng kơ anôk mnia mblei, bi kdơ̆ng hŏng klei čhĭ mnia, mkăm pioh mnơ̆ng, rơ̆ng kơ klei bi ktưn jăk hlăm klei mjing ênoh.

Sa mta phŭn mâo lu klei mđing uêñ êdi mơ̆ng mnuih ƀuôn sang jing boh klei amâo mâo jăk kơ boh tŭ klei bi lông Toán ti Klei bi lông hriăm jih gưl 3 thŭn 2026 ti Tuyên Quang. Hlăm wưng klei bi lông mâo boh tŭ dưn yuôm bhăn hŏng dŭm êklăk čô hđeh sang hră leh anăn gŏ sang, grăp klei bi knăl amâo mâo jăk brei dưi ksiêm dlăng klă nik čiăng rơ̆ng klei mtăp mđơr. K’iăng Khua knŭk kna Nguyễn Văn Thắng brei thâo:

"Bi hŏng dŭm bruă mâo lu mnuih dôk mđing msĕ si mkŏ mjing klei bi lông gưl 3 thŭn 2026, djŏ tuôm hŏng boh tŭ klei bi lông Toán ti Tuyên Quang. Knŭk kna gĭt gai leh Phŭn bruă Sang hră mơar mtô bi hriăm mbĭt hŏng dŭm anôk bruă djŏ tuôm pral ksiêm dlăng, bi mklă djŏ guôp, kluôm dhuôm. Tơdah hmao ƀuh klei ngă soh brei ƀuah mkra ktang phĭt hluê si klei kčah mtrŭn mơ̆ng hdră bhiăn, rơ̆ng klei mtăp mđơr hŏng phung bi lông lehanăn krơ̆ng kjăp klei đăo knang mơ̆ng mnuih ƀuôn sang hŏng anôk bruă mtô bi hriăm".

Klei gĭt gai mơ̆ng Knŭk kna bi êdah klei mĭn sa anăn jing amâo dêč đuĕ, amâo mdăp ôh kơ dŭm bruă mâo yang ƀuôn mđing, kyua mbĭt hŏng bruă msir mgaih djŏ mnuih, djŏ klei ngă soh, klei yuôm bhăn hĭn jing bi kjăp klei đăo knang mơ̆ng mnuih ƀuôn sang hlăm klei klă mngač mơ̆ng hdră bhiăn lăn čar leh anăn klei mtăp mđơr hlăm bruă sang hră mơar.

Mơ̆ng dŭm mta phŭn dưi bi trông hlăm Klei bi kƀĭn tal 4 mơ̆ng Dhar bruă gĭt gai Anôk bruă kƀĭin ala dưi ƀuh, hdră mnuih ƀuôn sang čŏng ngă ƀrư̆ hruê ƀrư̆ nao klă hŏng boh sĭt klei hdĭp, grăp klei akâo mơ̆ng mnuih buôn sang amâo djŏ knŏng hưn lač lač klei mĭn, klei hmăng hmưi mơ̆ng mnuih ƀuôn sang ƀiădah lŏ jing "giê mkă" boh tŭ dưn klei knŭk kna kiă kriê hlăm grăp mta bruă.