Krah mlan 7, sang mrâo mơ̆ng amai Nguyễn Thị Nhường, ti ƀuôn hgŭm Ea Kao hmao bi leh, djŏ hlăm wưng bi hdơr 79 thŭn hruê kahan êka êkeh, kahan djiê êngiă.  Mâo hlăm pô mta ruă đioxin mơ̆ng ama tuôm nao leh hlăm klei bi blah, klei hdĭp amai Nhường bŏ hŏng klei suăi êmăn, knŏng čang hmăng dưi mâo sa boh sang kjăp.

"Mâo Đảng, Knŭk kna mbĭt hŏng dŭm anôk bruă êpul êya đru kơ gŏ sang mdơ̆ng sang mrâo, gŏ sang mơak, ktưn hưn snăk. Klei hmăng hmưi dŭm thŭn hŏng anei jing sĭt, anei jing boh kdrŭt čiăng kơ găp djuê gĭr ktưn, hdĭp jăk leh anăn yuôm bhăn hĭn.”

Klei hơ̆k mơak anăn hĭn mơh kluôm ênŭm hŏng dŭm čô mnuih đru mdơ̆ng sang kơ ñu jing lĭng kahan Awa Hồ. Dŭm hruê êgao, 10 čô knuă druh, kahan Êpul kahan knhăk 20, Lữ đoàn Đặc công bộ 198, Binh chủng Đặc công mâo nanao ƀô̆ mta ti anôk ngă bruă.

Mơ̆ng dŭ mdiăng mnơ̆ng dhơ̆ng, klei tur truh kơ đru ngă bruă, phung knuă druh đru leh gŏ sang Nhường bi hrŏ hnơ̆ng leh anăn bi hrŏ ênoh bi liê. Thiếu tá Nguyễn Văn Duẩn, K’iăng khua bruă kđi čar mơ̆ng Êpul kahan knhăk 20 brei thâo:

Leh mâo tŭ mă bruă klam, hmei mtrŭt leh jih jang ayŏng adei bi mklă klei gĭr bi leh djŏ hdră kčah, đru kơ diñu mâo sang kjăp, siam. Leh bi leh, anôk bruă kih mdoh jih kluôm krĭng čiăng kơ gŏ sang mŭt dôk hŏng klei hơĭt".

Tơdah hŏng Nhường jing klei mơak kơ sa boh sang mrâo, snăn hŏng gŏ sang  Phạm Thị Ngân ti ƀuôn hgŭm Tân An, knŏng čiăng kơ adŭ amâo mâo ƀrôč ôh grăp blư̆ truh hjan jing leh klei mơak prŏng. Ung ñu tuôm nao hlăm klei bi blah, dua čô anak êkei ñu hmăi djŏ mơ̆ng êa drao ruă đioxin. Sa čô djiê leh, anak adôk êbeh 40 thŭn ƀiădah amâo mâo dưi êrô êbat hjăn ôh, jih jang klei hdĭp mda jưh knang kơ amĭ ama mduôn sơăi. Adŭ anôk anak ñu hdĭp lu thŭn êgao tĭ rưč, čuôr jhat rai, mtih ƀrôč. Leh giăm sa mlan, hŏng klei nao hgŭm mơ̆ng êpul kahan ƀuôn, bruă răng mgang klei êđăp ênang alŭ wăl, Êpul hgŭm ƀĭng ngă lŏ hma leh anăn êpul bruă êdam êra, boh sang dưi mkra mđrăm mbĭt mơ̆ng tur sang, mkra gơ̆ng truh kơ bi msiam wăl sang Phạm Thị Ngân mgei ai tiê brei thâo:

“Hmư̆ hing lĭng kahan đru mkra brei sang dôk snăn bi kngăr snăk, kyuadah gŏ sang mâo klei mtô lač kơ anak jing mañ mnuih ngă bruă, ƀiădah ung nao mă bruă kbưi ka dưi wĭt ôh, ƀri mơh mâo knŭk kna đru, jing mơak snăk.”

Hlue si Nguyễn Công Thảo, K’iăng khua anôk bruă sang čư̆ êa ƀuôn hgŭm Tân An, alŭ wăl ară anei mâo giăm 480 čô mnuih mâo bruă tŭ dưn. Gưl 27/7 thŭn anei, mbĭt hŏng dŭm bruă ngă "Hdơr knga tla ai", ƀuôn hgŭm ksiêm dlăng leh anăn ba mdah klei akâo đru mkra mđĭ sang dôk kơ phung djăp klei găl. Hjăn hŏng gŏ sang Ngân, alŭ wăl lŏ mtrŭt mjhar phung mâo ai tiê kmah đru nanao.

“Knơ̆ng bruă sang čư̆ êa ƀuôn hgŭm mâo leh klei ksiêm dlăng bi klin klei hâo mdah lehanăn mâo čar, gưl dlông tŭ ư mkra mđĭ kơ 2 čô, grăp čô 30 êklăk čiăng mkra wĭt dua boh sang čiăng rơ̆ng klei hdĭp mda kơ dua gŏ sang, diñu mâo klei êđăp ênang hĭn, jăk hĭn. Êngao kơ anăn snăn, bruă Đảng Knơ̆ng bruă sang čư̆ êa ƀuôn hgŭm nao čuă phung knŭk kna dlăng ba, êngao kơ ênoh prăk mơ̆ng gưl dlông hŏng čar snăn ƀuôn Hgŭm ăt bi tĭng ngăn prăk mđup brei mnơ̆ng kơ grăp gŏ sang 200 êbâo."

Kluôm čar Dak Lak ară anei mâo 42 gŏ sang jing anak čô phung tuôm bi blah djŏ êa drao ruă dưi đru sang dôk, mâo 22 boh sang mkra mrâo leh anăn 20 boh mkra mđĭ.

Čiăng bi leh êlâo kơ hruê 27/7, dŭm anôk bruă lĭng kahan mđrăm mbĭt trŭn ngă bruă mơ̆ng knhal jih mlan 5. Hluê si Đào Mỹ, K’iăng Khua Knơ̆ng bruă sang čư̆ êa čar Dak Lak, bruă bi leh hdră êlâo hruê 27/7 amâo djŏ knŏng rơ̆ng hnơ̆ng kčah ƀiădah lŏ jing hnư mnơ̆ng bi hdơr sĭt êmĭt kơ dŭm gŏ sang anak čô phung tuôm bi blah djŏ êa drao ruă.

"Hmei gĭr bi leh bruă rŭ mdơ̆ng dŭm boh sang anei leh anăn anei ăt jing čiăng mđĭ ai, bi juh ƀiă klei luč liê mơ̆ng găp djuê diñu leh anăn bi êdah ai tiê Đảng leh anăn Knŭk kna mđing dlăng nanao kơ phung mâo ai hŏng lăn čar".

Grăp boh sang bi leh êlâo kơ hrue 27/7 amâo mâo djŏ knŏng đru kơ dŭm gŏ sang mâo anôk dôk hơĭt hĭn ôh, ƀiădah lŏ jing klei bi knăl kơ klei thâo hdơr knga mâo bi êdah hŏng dŭm bruă ngă klă mngač. Hlăk dŭm boh sang huh mđao dưi mdơ̆ng, dŭm klei luč liê kyua klei bi blah ăt dưi bi juh ƀiă, čiăng kơ dŭm gŏ sang mâo klei ênguôt hnĭng kyua klei mblah ngă mâo thiăm klei đăo knang leh anăn boh kdrŭt lŏ dơ̆ng kpưn đĭ hlăm klei hdĭp mda./.