Thŭn hriăm 2026-2027, Sang hră čiêm rông hđeh mnuih djuê ana ƀiă Gưl dua leh anăn Gưl tlâo Pi Năng Tắc, să Bác Ái Đông, čar Khánh Hòa dưi rŭ mdơ̆ng mrâo leh anăn ba yua, hrô kơ anôk bruă nah gŭ jhat rai. Ti ênhă 3,8 ha, sang hră mâo 18 adŭ hriăm, 60 adŭ dôk leh anăn sang bi lông lu mta, mkăp kơ klei čiăng hriăm, dôk jưh kơ giăm 500 čô hđeh mnuih djuê ana ƀiă krĭng Yŭ Dhŭng čar. Ênoh prăk duh bi liê êbeh 83.6 êklai prăk. Adei Kiều Năng Bảo Trâm, hđeh sang hră, brei thâo:

 “Sang hră dưi bi leh, kâo dưi hriăm hlăm sang hră prŏng siam, doh leh anăn mâo lu kdrăp hriăm djăp ênŭm. Čiăng kơ hmei mâo anôk hriăm jăk hĭn”.

Bùi Quang Quyền, Khua Sang hră gưl dua, gưl tlâo knŭk kna čiêm rông hđeh mnuih djuê ana ƀiă Pi Năng Tắc, lač klei duh bi liê, mjing klei găl čiăng kơ phung hđeh mnuih djuê ana ƀiă dưi huă ƀơ̆ng, hriăm mbĭt, nội trú đru bi hrŏ klei kbưi kơ klei găl mtô bi hriăm plah wah dŭm krĭng:

Băng: "Anei jing bruă hluê ngă hdră êlan prŏng mơ̆ng Đảng, knŭk kna čiăng ngă hnơ̆ng mtô bi hriăm bi jĕ giăm. Amâo mâo klei bi kah plah wah krĭng čư̆ čhiăng leh anăn krĭng dap mnai. Mđing truh čiăng bi knar hlăm bruă mtô bi hriăm leh anăn mđĭ kyar hĭn".

Čiăng mđĭ hnơ̆ng tŭ jăk bruă mtô bi hriăm krĭng čư̆ čhiăng, krĭng taih kbưi, mbĭt hŏng mkra mđĭ anôk bruă nah gŭ, Khánh Hòa lŏ mkra mđĭ klei găl hriăm hră, hdĭp mda mơ̆ng phung hđeh hŏng hdră đru prăk hriăm hră, êa ksâo hriăm hră, đru hdruôm hră hriăm, hră leh anăn mnơ̆ng yua hriăm hră. Bruă phung hđeh lui hriăm hră čiăng đru kơ gŏ sang, ăt dưi msir mghaih mơ̆ng hnưm.

Khánh Hòa ară anei mâo êbeh 2.24 êklăk čô mnuih, hlăm anăn mnuih djuê ƀiă êbeh 266.000 čô. Thŭn hriăm 2026-2027, kluôm čar mâo êbeh 462.000 čô hđeh ti 318 anôk bruă mtô bi hriăm. Hlăm wưng mdei prŏng, čar duh bi liê êbeh 1.143 êklai prăk mkra mđĭ, mkra wĭt sang hră, thiăm mbŏ kdrăp mtô bi hriăm leh anăn mjuăt bi hriăm phung nai. Vũ Ngọc Đương, Khua knơ̆ng bruă sang hră mtô bi hriăm čar Khánh Hòa, brei thâo:

"Dŭm anôk bruă nah gŭ ti dŭm sang hră hlăm alŭ wăl čar dưi duh bi liê jih hnơ̆ng kjăp. Mơ̆ng hdră mkŏ mkra adŭ hriăm, kdrăp mnơ̆ng, sang lu mta bruă. Phung amĭ ama phung hđeh ƀuăn rơ̆ng, sa ai tơdah drei pŏk ngă Hdră mtrŭn 71, mđĭ hnơ̆ng tŭ jăk, ƀrư̆ ƀrư̆ bi hrŏ klei kpleh hnơ̆ng tŭ jăk bruă mtô bi hriăm hlăm dŭm krĭng kwar, mjing klei mtăp mđơr hlăm hnơ̆ng tŭ jăk bruă mtô bi hriăm hlăm kluôm ala".

Mơ̆ng mtrŭt mjhar phung hđeh truh kơ grăp gŏ sang, đru hriăm hră mơar truh kơ duh bi liê sang hră, Khánh Hòa dôk mjing thiăm klei găl hriăm hră kơ phung hđeh krĭng čư̆ čhiăng, krĭng mnuih djuê ƀiă.