Ti hma prŏng 1ha ti să Ea Ana (čar Dak Lak), kahan êka Trần Quốc Đài mbĭt hŏng mô̆ mtuk mtlak mŭt hlăm yan hrui êmiêt durian. Pô ngă lŏ hma anăn ăt ba hlăm asei mlei lu pŏk boh phao mčah leh klei bi blah. Trần Quốc Đài nao kahan thŭn 1976, bi blah ti kdrăn mblah Campuchia. Leh sa gưl tiŏ mă Khmer hrah, ñu djŏ boh phao roh bi êka ti rŏng, kngan leh anăn jơ̆ng. Leh mdrao mgŭn, ñu lŏ dơ̆ng nao bi blah truh kơ bi leh bruă klam leh anăn kbiă kahan thŭn 1981. Wĭt hŏng klei hdĭp aguah tlam, ñu gĭr pla kphê, tiu leh anăn jhŏng duh bi liê kơ durian. Truh kơ ară anei, đang pla mjing 1ha ba wĭt ênoh prăk hlăm brô 900 êklăk prăk grăp thŭn. Hŏng Trần Quốc Đài, klei êka êkeh ngă kơ djăp mta bruă jing ktrŏ hĭn mkă hŏng pô mkăn, ƀiădah amâo djŏ ôh klei klei anăn mdei hĕ.

“Ngă djăp mta bruă ăt êmăn mơh, pô dôk suiah mă bruă ăt suăi êmăn leh mơh, msĕ si pô jing kahan êka srăng suăi êmăn hĭn. Kyuanăn pô mkră ăt mkria mơh, mă 6 mmông mkă hŏng pô mkăn mă 8 mmông. Pô mjuăt ƀrư̆ ƀrư̆ ăt srăng dưi mơh.”

Kăn kbưi leh hŏng đang pla mjing mơ̆ng Trần Quốc Đài jing đang kphê pla pluă hŏng durian mơ̆ng kahan êka Hà Văn Quảng. Leh dŭm thŭn mlan ngă bruă klam ti kdrăn mblah Campuchia, ñu nao ti Dak lak čô̆ kơ bruă hluê hdră bruă duh mkra mrâo. Mơ̆ng sa čô lĭng kahan, ñu lŏ dơ̆ng duh myơr hlăm êpul bruă kahan ksiêm, lĭng kahan alŭ wăl leh anăn klam ngă khua dlăng bruă Đảng să Ea Bông êlâo kơ jih thŭn mă bruă. Leh mdei mă bruă, lĭng kahan hđăp anăp lŏ wĭt hŏng bruă pưk hma. Ti ênhă 1ha kphê pla pluă hŏng durian, gŏ sang ñu dưi mâo hnư hrui wĭt mơ̆ng 600 - 700 êklăk prăk grăp thŭn.

Hŏng mnuih ƀuôn sang ti alŭ wăl, klei năng mđing mơ̆ng Hà Văn Quảng amâo djŏ knŏng jing đang pla mjing brei boh tŭ dưn bruă duh mkra, ƀiădah lŏ jing ai tiê nao êlâo mơ̆ng lĭng kahan hđăp. Êjai alŭ wăl pŏk mlar êlan klông krĭng ƀuôn sang, ñu čŏng pô myơr giăm 100m2 lăn. Mâo klei hriăm hlăm bruă mkra mjing, ñu mprăp mtô kơ ƀĭng hgŭm lĭng kahan hđăp leh anăn mnuih ƀuôn sang hdră mnêč kriê dlăng đang kphê, durian čiăng hrăm mbĭt mđĭ hnư hrui wĭt. Hà Văn Quảng brei thâo:

“Kâo wĭt mdei bruă leh anăn ngă bruă kriê dlăng đang pla mjing mơ̆ng gŏ sang. Hŏng sa čô lĭng kahan, bi lar knhuah lĭng kahan Awa Hồ, hmei nao êlâo nanao, ngă klei bi hmô čiăng kơ mnuih ƀuôn sang djiêo gah hluê ngă.”

Leh bi mŭt mbĭt anôk bruă Knŭk kna gưl să, Êpul hgŭm lĭng kahan hđăp să Ea Ana (čar Dak Lak) mâo 861 čô hgŭm, hlăm anăn 39 čô jing kahan êka, kahan ruă duam. Lu phung hgŭm wăt kơ thŭn leh khua, klei suaih pral toh hroh ƀiădah ăt nao hgŭm hlăm dŭm hdră bruă nah gŭ. Trần Quốc Đài leh anăn Hà Văn Quảng jing dua gru hmô dưi ruah čiăng pŏk mlar gru hmô mkra mjing. Phương Toại Nguyện, k’iăng khua Êpul hgŭm lĭng kahan hđăp să Ea Ana brei thâo, Trần Quốc Đài leh anăn Hà Văn Quảng  ăt jêñ jêñ mtô kơ phung hgŭm hdră mnêč kriê dlăng đang kphê, durian, tiu, đru kơ dŭm gŏ sang adôk dleh dlan bi hơĭt klei hdĭp.

“Klei bi kƀĭn grăp mlan, grăp gưl 3 mlan, hmei mkŏ mjing dŭm hdră nao čuă dlăng dŭm gru hmô mđĭ kyar bruă duh mkra tŭ dưn. Hmei hâo hưn, pŏk mlar gru hmô anei truh kơ phung hgŭm adôk kƀah hdră mnêč kriê dlăng kphê, durian, tiu hŏng hdră ba phung anăn nao dlăng đang pla mjing mơ̆ng dua čô anăn čiăng ksiêm hriăm…”

Klei bi blah kbưi leh, dŭm gru êka  hlăm asei mlei ăt adôk, ƀiădah klei mĭn mơ̆ng lĭng kahan amâo mâo mdei ti hruê kbiă kahan. Mơ̆ng kdrăn mblah thŭn anăn truh kơ dŭm đang kphê, durian hruê anei, diñu ăt duh myơr hŏng klei mă bruă knuă, hŏng ai tiê nao êlâo leh anăn bruă klam hŏng yang ƀuôn. Anăn jing klei jĕ giăm, klă sĭt kơ knhuah hdĭp lĭng kahan awa Hồ hlăm ênuk êđăp ênang: amâo djŏ knŏng  thâo bi blah êjai lăn čar Čiăng, ƀiădah lŏ hơĭt kjăp mkŏ mjing ƀuôn sang êjai lăn čar êđăp ênang./.