Ti knăm anei, Đại tướng Nguyễn Trọng Nghĩa, Khua anôk bruă kđi čar lĭng kahan yang ƀuôn Việt Nam, bi ala Khua gĭt gai Đảng, Knŭk kna mđup brei Anăn knăl Pô jhŏng ktang lĭng kahan yang ƀuôn kơ Anôk bruă hâo hưn hriăm mjuăt. Bi ala kơ Anôk bruă Đảng kahan gưl dlông, khua gĭt gai Phŭn bruă lĭng kahan leh anăn Anôk bruă kđi čar, Đại tướng Nguyễn Trọng Nghĩa mñă klă, 80 thŭn êgao, Anôk bruă hâo hưn hriăm mjuăt ngă jăk nanao bruă klam đru kčĕ hdră êlan phŭn kơ bruă klei mĭn, dhar kreh hlăm kluôm lĭng kahan.

Dŭm thŭn kơ anăp, boh klei dlông rŏng lăn, krĭng wăl đăo knăl lŏ dơ̆ng bi mlih pral, dleh ksiêm dlăng, Đại tướng Nguyễn Trọng Nghĩa lač klă, dŭm êpul bi kdơ̆ng hŏng lăn čar lŏ dơ̆ng mtrŭt mđĭ hdră bi kdơ̆ng hŏng hdră êlan ƀrư̆ hruê ƀrư̆ kreh knhâo; dŭm boh klei mrâo mâo hlăm boh sĭt mbĭt hŏng klei hmăi mơ̆ng klei amâo jăk mơ̆ng hdră duh mkra mnia mblei, hla pŏk yang ƀuôn leh anăn dŭm mta phŭn klei êđăp ênang amâo djŏ hdră bhiăn ba mdah klei čiăng ƀrư̆ hruê ƀrư̆ lu hĭn kơ bruă klei mĭn, dhar kreh hlăm Lĭng kahan.